Türkmenistanyň Ministrler Kabinetiniň mejlisi

Habarlar

Iň täze habarlar

355 27.07.2024

Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onuň gün tertibine döwlet durmuşynyň birnäçe meseleleri girizildi.

Ilki bilen, Mejlisiň Başlygy D.Gulmanowa çykyş edip, döwlet durmuşynyň dürli ulgamlaryny kanunçylyk taýdan üpjün etmek boýunça alnyp barylýan işler barada maglumat berdi. Hususan-da, häzirki wagtda ministrlikleriň we pudaklaýyn dolandyryş edaralarynyň wekilleri bilen bilelikde hereket edýän kanunlary seljermek, kanun taslamalaryny taýýarlamak boýunça işleriň dowam etdirilýändigi bellenildi. Şeýle hem Türkmenistanyň Halk Maslahatynyň nobatdaky mejlisine taýýarlyk görmek baradaky guramaçylyk toparynyň mejlisiniň geçirilendigi aýdyldy. Onda Halk Maslahatynyň mejlisiniň geçiriljek senesini bellemek, guramaçylyk toparyny döretmek we onuň düzümini tassyklamak, forumyň gün tertibini we deslapky maksatnamasyny, degişli resminamalary taýýarlamak, welaýatlaryň, etraplaryň, şäherleriň halk maslahatlarynyň işine guramaçylyk-usulyýet taýdan ýardam bermek bilen baglanyşykly beýleki meseleler ara alnyp maslahatlaşyldy.

BMG-niň Çagalar gaznasynyň Türkmenistandaky wekili bilen duşuşygyň geçirilendigi hakynda habar berildi. Bellenilişi ýaly, Mejlisiň deputatlary Türkmenistanda daşary söwda düzgüni barada Ähtnamany taýýarlamak bilen bagly meseleler boýunça iş duşuşygyna, ÝHHG-niň Aşgabatdaky merkezi tarapyndan guralan okuw maslahatyna, ýurdumyzy durmuş-ykdysady taýdan ösdürmegiň Maksatnamasyndan gelip çykýan wezipeleriň, “Pähim-paýhas ummany Magtymguly Pyragy” ýylynyň syýasy-jemgyýetçilik ähmiýetini wagyz etmek, kabul edilen kanunlaryň many-mazmunyny ilata düşündirmek boýunça dürli çärelere gatnaşdylar.

Hormatly Prezidentimiz häzirki döwrüň talaplaryna laýyk gelýän täze kanun taslamalaryny işläp taýýarlamagyň möhüm wezipeleriň biri bolup durýandygyny belledi we bu ugurda alnyp barylýan işleri netijeli dowam etdirmegiň möhümdigine ünsi çekdi.

Ministrler Kabinetiniň Başlygynyň orunbasary H.Geldimyradow Garaşsyz Döwletleriň Arkalaşygyna gatnaşyjy döwletleriň Zähmet, iş üpjünçilik we ilaty durmuş taýdan goramak boýunça maslahat beriş geňeşiniň 37-nji mejlisiniň guramaçylyk meseleleri barada hasabat berdi.

Bellenilişi ýaly, 2017-nji ýylyň oktýabrynda geçirilen GDA-nyň sammitinde Gahryman Arkadagymyzyň başlangyjy esasynda Arkalaşyga gatnaşyjy döwletleriň strategik ykdysady hyzmatdaşlygy hakynda Jarnama işlenip taýýarlanyldy we 2019-njy ýylyň oktýabrynda Aşgabatda geçirilen GDA-nyň döwlet Baştutanlarynyň Geňeşiniň mejlisinde biragyzdan kabul edildi. Bu Jarnamada GDA gatnaşyjy döwletleriň işiniň ileri tutulýan ugurlarynyň hatarynda zähmet, iş bilen üpjünçilik we ilaty durmuş taýdan goramak ulgamlarynda hyzmatdaşlygy giňeltmek hem göz öňünde tutuldy. Şunuň bilen baglylykda, GDA-nyň ykdysady ulgamda hereket edýän pudaklaýyn hyzmatdaşlyk edaralary bilen gatnaşyklary has-da işjeňleşdirmek boýunça degişli işleriň alnyp barylýandygy aýdyldy.

Wise-premýer şu ýylyň 14-nji iýunynda sanly ulgam arkaly GDA gatnaşyjy döwletleriň ygtyýarly edaralarynyň, GDA-nyň Ýerine ýetiriji komitetiniň we degişli edaralarynyň wekilleriniň gatnaşmagynda geçirilen duşuşygyň netijeleri barada hasabat berip, hormatly Prezidentimiziň garamagyna maslahat beriş geňeşiniň nobatdaky mejlisini Aşgabat şäherinde şu ýylyň oktýabrynda geçirmek baradaky teklibi hödürledi.

Döwlet Baştutanymyz hasabaty diňläp, ýurdumyzyň Garaşsyz Döwletleriň Arkalaşygyna agza ýurtlar bilen söwda-ykdysady we medeni-ynsanperwer ugurlarda hyzmatdaşlygy yzygiderli berkidýändigini belledi. Şeýle hem bu guramanyň pudaklaýyn edaralary bilen gatnaşyklar giňeldilýär diýip, hormatly Prezidentimiz aýtdy we wise-premýere Aşgabat şäherinde geçiriljek Garaşsyz Döwletleriň Arkalaşygyna gatnaşyjy döwletleriň Zähmet, iş üpjünçilik we ilaty durmuş taýdan goramak boýunça maslahat beriş geňeşiniň nobatdaky mejlisine gowy taýýarlyk görmegi we ony ýokary derejede geçirmegi tabşyrdy.

Ministrler Kabinetiniň Başlygynyň orunbasary B.Amanow “Türkmengaz” döwlet konserniniň “Galkynyş” gaz käninde goşmaça gazylmagy göz öňünde tutulýan gaz guýularynyň gurluşygyny zerur bolan serişdeler bilen üpjün etmek boýunça alnyp barylýan işler barada hasabat berdi. Bellenilişi ýaly, “Galkynyş” gaz käni türkmen tebigy gazyny goňşy we sebit döwletlerine bökdençsiz ibermekde çig mal çeşmesi bolup hyzmat edýär. Käni özleşdirmegiň birinji tapgyrynda önüm berýän gaz guýularynyň goşmaça guýularyny burawlamak, önümçilige girizmek meýilleşdirilýär. Şunuň bilen baglylykda, olaryň uzak wagtlap bökdençsiz we ygtybarly işlemegini üpjün etmek zerur bolup durýar.

Hormatly Prezidentimiz Serdar Berdimuhamedow hasabaty diňläp, «Galkynyş» gaz käninde goşmaça gazylmagy göz öňünde tutulýan gaz guýularynyň buraw işlerini ýerine ýetirmek üçin zerur bolan enjamlary we serişdeleri satyn almak boýunça teklibi goldaýandygyny aýtdy hem-de wise-premýere bu babatda birnäçe tabşyryklary berdi.

Ministrler Kabinetiniň Başlygynyň orunbasary T.Atahallyýew oba hojalyk toplumynda, ýurdumyzyň welaýatlarynda möwsümleýin oba hojalyk işleriniň geçirilişi barada hasabat berdi.

Bellenilişi ýaly, häzirki wagtda welaýatlaryň gowaça ekilen meýdanlarynda hatarara bejergi, gowaçanyň ujuny çyrpmak, mineral dökünler bilen iýmitlendirmek, ösüş suwuny tutmak işleri alnyp barylýar. Şunuň bilen birlikde, pagta kabul ediş harmanhanalaryny, oba hojalyk tehnikalaryny möwsüme taýýarlamak boýunça işler dowam edýär. Geljek ýylda bugdaýyň bol hasylyny ösdürip ýetişdirmek maksady bilen, ekiş geçiriljek meýdanlarda sürüm, tekizlemek işleri, bugdaý tohumlaryny, ekişde ulanyljak tehnikalary, ekijileri möwsüme taýýarlamak işleri geçirilýär. Daşoguz hem-de Lebap welaýatlarynyň şaly ekilen meýdanlarynda mineral dökünler bilen iýmitlendirmek, ösüş suwuny tutmak işleri ýerine ýetirilýär. Welaýatlaryň maldarçylyk hojalyklarynda mallary talabalaýyk idetmek, olaryň baş sanyny artdyrmak, ot-iýmleriň ätiýaçlyk gorlaryny döretmek boýunça degişli çäreler görülýär. Ekerançylyk meýdanlarynyň suw üpjünçiligini, ýerleriň melioratiw ýagdaýyny gowulandyrmak, suw serişdelerini tygşytly we netijeli peýdalanmak maksady bilen, suwaryş, şor suw akabalaryny arassalamak boýunça işler geçirilýär.

Hormatly Prezidentimiz hasabaty diňläp, oba hojalyk pudagyny toplumlaýyn ösdürmegi we onuň işini kämilleşdirmegi dowam etdirmegiň wajypdygyny belledi. Şunuň bilen baglylykda, döwlet Baştutanymyz gowaça ekilen meýdanlarda ideg işlerini agrotehniki kadalara laýyk geçirmegi, pagta arassalaýjy kärhanalary, kabul ediş nokatlaryny, pagta hasylyny daşamakda ulanyljak awtoulaglary möwsüme talabalaýyk taýýarlamagy tabşyrdy. Hormatly Prezidentimiz geljek ýylyň bugdaý hasylynyň düýbüni tutmak, ýerleri ekiş möwsümine taýýarlamak boýunça degişli işleri geçirmegiň möhümdigine ünsi çekip, ýokary hilli bugdaý tohumyny, ekişde ulanyljak oba hojalyk tehnikalaryny taýýarlamaga möhüm ähmiýet bermegiň wajypdygyny nygtady. Wise-premýere beýleki möwsümleýin oba hojalyk ekinleriniň bol hasylyny ýetişdirmek işlerini hem talabalaýyk alyp barmak tabşyryldy.

Ministrler Kabinetiniň Başlygynyň orunbasary B.Annamämmedow gözegçilik edýän ulgamlarynda alnyp barylýan işleri kämilleşdirmek boýunça görülýän çäreler barada hasabat berdi.

Bellenilişi ýaly, häzirki wagtda ýurdumyzyň beýleki pudaklary bilen bir hatarda, gurluşyk pudagynda-da düýpli özgertmeler amala aşyrylýar. Önümçilige öňdebaryjy tehnologiýalar giňden ornaşdyrylýar. Şunuň bilen baglylykda, döwlet Baştutanymyzyň garamagyna gurluşykda milli çykdajy-ölçeg binýadyny işläp taýýarlamak we nyrh emele getirmek ulgamyny kämilleşdirmek boýunça işleri maliýeleşdirmegiň Tertibi esasynda binýady işläp taýýarlamak üçin degişli Kararyň taslamasy hödürlenildi.

Hormatly Prezidentimiz hasabaty diňläp, ýurdumyzda alnyp barylýan gurluşyk-gurnama, durkuny täzelemek, düýpli abatlaýyş işleriniň bahalaryny döwrüň talabyna laýyklykda işläp düzmegiň möhüm wezipeleriň biri bolup durýandygyny belledi. Döwlet Baştutanymyz Türkmenistanda gurluşykda nyrh emele getirmegiň döwlet maglumat ulgamyny döretmek maksady bilen, degişli Karara gol çekip, resminamany wise-premýere sanly ulgam arkaly iberdi we birnäçe tabşyryklary berdi.

Ministrler Kabinetiniň Başlygynyň orunbasary B.Atdaýew awgust aýynda “Kids Ekspo: ähli zat çagalar üçin” atly halkara sergi ýarmarkasyny geçirmäge görülýän taýýarlyk barada hasabat berdi.

Bellenilişi ýaly, sergi ýarmarkasynda ýurdumyzyň we daşary ýurtlaryň öňdebaryjy haryt öndürijileriniň çagalar, okuwçylar, talyplar üçin harytlaryny, ýokary hilli, ekologik taýdan arassa önümleri, okuw esbaplaryny, elektron harytlary hödürlemek göz öňünde tutulýar. Şunuň bilen birlikde, pudakda iş alyp barýan kompaniýalaryň tejribe alyşmagy, çagalar üçin ussatlyk sapaklarynyň, bäsleşikleriň guralmagy, meşhur Modalar öýleriniň çagalar üçin täze lybaslarynyň dabaraly görkezilişini guramak meýilleşdirilýär.

Döwlet Baştutanymyz hasabaty diňläp, 19-njy awgustda paýtagtymyzda geçiriljek sergi ýarmarkasyna Türkmenistanyň we daşary ýurtlaryň öňdebaryjy haryt öndürijileriniň gatnaşmagyny üpjün etmegiň zerurdygyny belläp, wise-premýere bu halkara sergini guramaçylykly geçirmäge gowy taýýarlyk görmegi tabşyrdy.

Ministrler Kabinetiniň Başlygynyň orunbasary M.Mämmedowa şu ýylyň awgust aýynda geçiriljek esasy çäreleriň Tertibi barada hasabat berdi.

Bellenilişi ýaly, 2024-nji ýylyň «Pähim-paýhas ummany Magtymguly Pyragy» ýyly diýlip yglan edilmegi mynasybetli dürli maslahatlary, «tegelek stol», döredijilik duşuşyklaryny, wagyz-nesihat çärelerini, sergileri, aýdym-sazly dabaralary geçirmek göz öňünde tutulýar. Şeýle hem ozal yglan edilen döredijilik bäsleşikleriniň jemi jemlener. Tomusky dynç alyş möwsüminde çagalaryň, ýetginjekleriň arasynda medeni-köpçülikleýin çäreleri, döredijilik, zehin bäsleşiklerini, sport ýaryşlaryny geçirmek meýilleşdirilýär. Awgust aýynda «Awaza» milli syýahatçylyk zolagynda «Awaza — dostluk mekany» atly medeni-köpçülik, sport çärelerini, Hazar deňziniň güni mynasybetli maslahaty guramak göz öňünde tutulýar. «Ýaňlan, Diýarym!» telebäsleşiginiň welaýatlar boýunça jemleýji tapgyrlary, Aşgabat şäherinde «Çalsana, bagşy!» bäsleşiginiň jemleýji tapgyry hem geljek aýyň esasy çäreleriniň hatarynda görkezildi.

Hormatly Prezidentimiz hasabaty diňläp, «Pähim-paýhas ummany Magtymguly Pyragy» ýylynda Watanymyzda beýik ösüşlerimizi beýan edýän birnäçe dabaraly çäreleriň geçirilýändigini belledi. Şunuň bilen baglylykda, wise-premýere awgust aýyndaky çäreleri ýokary guramaçylyk derejesinde geçirmek tabşyryldy.

Ministrler Kabinetiniň Başlygynyň orunbasary B.Orazdurdyýewa Türkmenistanyň Garaşsyzlygynyň 33 ýyllyk baýramy mynasybetli geçirilýän zehinli çagalaryň “Garaşsyzlygyň merjen däneleri” bäsleşiginiň döwlet tapgyryna görülýän taýýarlyk işleri barada hasabat berdi.

Döwlet Baştutanymyzyň “Edebiýat, medeniýet we sungat işgärleriniň, höwesjeň aýdymçy ýaşlaryň hem-de zehinli çagalaryň arasynda Türkmenistanyň Prezidentiniň “Türkmeniň Altyn asyry” baýragyny almak ugrundaky bäsleşigi yglan etmek hakynda” Kararyna laýyklykda, zehinli çagalaryň arasynda yglan edilen “Garaşsyzlygyň merjen däneleri” bäsleşiginiň döwlet tapgyryny şu ýylyň sentýabrynda geçirmek meýilleşdirilýär. Türkmenistanyň Bilim we Medeniýet ministrlikleriniň guramagynda bäsleşigiň etrap, şäher, welaýat tapgyrlary guramaçylykly geçirilip, olara 1011 çagadan ybarat bolan 64 sany döredijilik topary, ýaşajyk aýdymçylar gatnaşdylar. Bäsleşigiň tapgyrlarynda eziz Watanymyzy, ajaýyp döwrümizi wasp edýän aýdym-sazlary ýokary ussatlyk bilen ýerine ýetirmekde tapawutlanan çagalaryň 21-si, çagalar tans, aýdym-saz we halk döredijilik toparlarynyň 13-si saýlanylyp alyndy hem-de jemi 361 çaga döwlet tapgyryna gatnaşmaga hukuk gazandy. Bäsleşigiň jemleýji tapgyryny şu ýylyň 6-njy sentýabrynda Ahal welaýatynyň Ak bugdaý etrabynyň “Nowruz ýaýlasyndaky” “Türkmeniň ak öýi” binasynda geçirmek meýilleşdirilýär.

Hormatly Prezidentimiz hasabaty diňläp, milli medeniýetimizi, sungatymyzy ösdürmek, ýaş nesillerimizde sungata bolan söýgini döretmek, olaryň tebigy zehinlerini ýüze çykarmak we kämilleşdirmek maksady bilen, ýurdumyzda aýdym-saz, döredijilik bäsleşikleriniň yzygiderli geçirilýändigini belledi. Döwlet Baştutanymyz zehinli çagalaryň «Garaşsyzlygyň merjen däneleri» bäsleşiginiň döwlet tapgyryny geçirmek bilen bagly teklibi goldap, wise-premýere degişli işleri geçirmegi tabşyrdy.

Ministrler Kabinetiniň Başlygynyň orunbasary, daşary işler ministri R.Meredow Türkmenistanyň wekiliýetiniň şu hepdede Pakistan Yslam Respublikasyna amala aşyran gulluk iş saparynyň netijeleri barada hasabat berdi.

Günorta Aziýa döwletleri bilen gatnaşyklary ösdürmek ýurdumyzyň daşary syýasatynyň ileri tutulýan ugurlarynyň biri bolup durýar. Şolaryň hatarynda Pakistan Yslam Respublikasy hem bar. Bu ýurt bilen gatnaşyklar däp bolan dostlukly häsiýete eýedir. Özara bähbitli ikitaraplaýyn hyzmatdaşlygy pugtalandyrmak maksady bilen, saparyň çäklerinde Yslamabatda birnäçe gepleşikler we maslahatlaşmalar geçirildi. Şunuň bilen baglylykda, Türkmenistanyň wekiliýetiniň Pakistan Yslam Respublikasynyň Prezidenti Asif Ali Zardari tarapyndan kabul edilendigi bellenildi. Duşuşygyň dowamynda syýasy-diplomatik, söwda-ykdysady, medeni-ynsanperwer ulgamlarda döwletara gatnaşyklary ösdürmegiň meselelerine garaldy.

Ýurdumyzyň wekiliýetiniň Pakistanyň Premýer-ministri Şahbaz Şarif bilen duşuşygynyň çäklerinde türkmen-pakistan hyzmatdaşlygynyň esasy ugurlary ara alnyp maslahatlaşyldy. Şunda giň gerimli bilelikdäki taslamalaryň — Türkmenistan — Owganystan — Pakistan — Hindistan gaz geçirijisiniň, Türkmenistan — Owganystan — Pakistan ugry boýunça elektrik geçirijisiniň we optiki-süýümli aragatnaşyk ulgamynyň gurluşygy bilen bagly taslamalaryň durmuşa geçirilişine aýratyn üns çekildi.

Saparyň dowamynda daşary işler ministrleriniň derejesinde ikitaraplaýyn syýasy geňeşmeler geçirildi. Bellenilişi ýaly, Türkmenistan bilen Pakistan halkara we sebit guramalarynyň çäklerinde netijeli hyzmatdaşlyk edip, öňe sürülýän başlangyçlarydyr teklipleri özara goldaýarlar. Şunuň bilen baglylykda, Türkmenistanyň Ählumumy howpsuzlyk strategiýasyny işläp taýýarlamak barada öňe süren başlangyjyny durmuşa geçirmek boýunça tagallalary birleşdirmäge degişli mesele ara alnyp maslahatlaşyldy. Şeýle-de Birleşen Milletler Guramasynyň, Yslam Hyzmatdaşlyk Guramasynyň, Ykdysady Hyzmatdaşlyk Guramasynyň we beýleki abraýly guramalaryň çäklerinde hyzmatdaşlygy mundan beýläk-de pugtalandyrmak boýunça bilelikde iş alyp barmak hakynda ylalaşyldy. Gepleşikleriň çäklerinde halkara we sebit gün tertibiniň möhüm meseleleri boýunça pikir alşyldy. Ikitaraplaýyn gatnaşyklaryň şertnama-hukuk binýadyny berkitmek baradaky meselä garaldy.

Ykdysady hyzmatdaşlyk boýunça bilelikdäki türkmen-pakistan hökümetara toparynyň ýolbaşçylarynyň duşuşygynda toparyň işiniň netijeliligini ýokarlandyrmak boýunça birnäçe teklipler beýan edildi. Saparyň çäklerinde Türkmenistanyň wekiliýetiniň we Pakistan Yslam Respublikasynyň nebit ministriniň arasynda gepleşikler guraldy. Onuň dowamynda ýangyç-energetika pudagynda netijeli hyzmatdaşlygy ösdürmegiň geljegi gyzyklanma bildirilip ara alnyp maslahatlaşyldy. TOPH gaz geçirijisiniň gurluşygyny durmuşa geçirmäge aýratyn üns çekildi. Şunuň bilen baglylykda, ýakyn wagtda degişli gepleşikleri geçirmek barada ylalaşyldy. Şeýle hem Türkmenistandan Pakistana suwuklandyrylan gazy, gazhimiýa, nebithimiýa önümlerini ibermek meseleleri ara alnyp maslahatlaşyldy.

Pakistanyň Hökümetiniň haýyşy boýunça ýurdumyzyň wekiliýeti “Frontier Works Organization” guramasy we “National Logistics Corporation” kompaniýasynyň ýolbaşçylary bilen duşuşyklary geçirdi. Olarda bu düzümleriň işleýän ugurlarynda hyzmatdaşlygy ýola goýmagyň hem-de giňeltmegiň mümkinçilikleri ara alnyp maslahatlaşyldy. Hususan-da, “National Logistics Corporation” kompaniýasy türkmen tarapy bilen Hytaý — Pakistan — Owganystan — Türkmenistan, soňra Merkezi Aziýa we Hazar sebiti ýurtlaryna awtomobil ýük daşamalary boýunça bilelikde iş alyp barmaga taýýardygyny beýan etdi.

Saparyň dowamynda dostlukly ýurduň beýleki döwlet edaralarynyň ýolbaşçylary bilen hem duşuşyklar geçirildi. Gepleşikleriň netijeleri esasynda syýasy-diplomatik hyzmatdaşlygy pugtalandyrmak, parlamentara gatnaşyklary höweslendirmek, daşary syýasat edaralarynyň ugry boýunça yzygiderli duşuşyklary geçirmek tejribesini dowam etdirmek boýunça teklipler taýýarlanyldy. Syýasy-diplomatik gatnaşyklarda ýokary döwlet we hökümet derejesindäki saparlardyr gepleşiklere möhüm orun berilýär.

Ikitaraplaýyn söwda-ykdysady gatnaşyklary giňeltmek maksady bilen, orta möhletli hyzmatdaşlygy ösdürmegiň Maksatnamasyny işläp taýýarlamak we kabul etmek, bilelikdäki hökümetara toparyň mejlisleriniň azyndan iki ýyldan bir gezek guralmagyny ýola goýmak, onuň mejlislerine işewürler toparlarynyň, ylmy edaralaryň we beýleki gyzyklanma bildirýän taraplaryň wekillerini gatnaşdyrmak, kabul edilen çözgütleriň ýerine ýetirilişine gözegçilik guralyny döretmek teklip edilýär. Şunuň bilen bir hatarda, energetika ulgamynda, hususan-da, gaz pudagynda hyzmatdaşlygy işjeňleşdirmek boýunça teklipler beýan edildi. Durmuş ulgamynda gatnaşyklar barada aýdylanda, türkmen diplomatlaryny Pakistanyň Diplomatik akademiýasy tarapyndan guralýan okuwlara ibermek, Döwletmämmet Azady adyndaky Türkmen milli dünýä dilleri institutynda urdu dili bölümini açmak meselelerini öwrenmek teklip edilýär.

Hormatly Prezidentimiz Serdar Berdimuhamedow hasabaty diňläp, türkmen-pakistan gatnaşyklarynyň ýokary depginde ösdürilýändigini kanagatlanma bilen belledi. Döwlet Baştutanymyz syýasy, ykdysady, medeni-ynsanperwer ugurlar boýunça ikitaraplaýyn hyzmatdaşlygy ösdürmäge degişli geçirilen gepleşikleriň iki döwletiň arasyndaky gatnaşyklary mundan beýläk-de berkitmäge ýardam berjekdigini nygtap, hödürlenen teklipleri goldady we wise-premýer, daşary işler ministrine degişli tabşyryklary berdi.

Hormatly Prezidentimiz mejlisi dowam edip, Türkmenistanyň ýakyn hyzmatdaş döwletleriniň biriniň hem Eýran Yslam Respublikasy bolup durýandygyny belledi. Biziň ýurtlarymyz dost-doganlyk gatnaşyklaryny alyp barýarlar. Şunuň bilen baglylykda, döwlet Baştutanymyz 30-njy iýulda Eýran Yslam Respublikasynyň täze saýlanan Prezidentiniň resmi wezipä girişmek dabarasyna gatnaşmak üçin wise-premýer, daşary işler ministri, Ykdysady hyzmatdaşlyk boýunça türkmen-eýran toparynyň türkmen tarapynyň başlygy R.Meredowy Eýran Yslam Respublikasynyň Tähran şäherine gulluk iş saparyna ibermek hakynda Buýruga gol çekdi.

Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew ýurdumyzda sanly ykdysadyýeti ösdürmek, hünärmenleri taýýarlamak, daşary ýurtlardan getirilýän harytlaryň ornuny tutýan önümleri öndürýän önümçilikleri döretmek boýunça alnyp barylýan işler barada hasabat berdi.

“Türkmenistanda sanly ykdysadyýeti ösdürmegiň 2021 — 2025-nji ýyllar üçin Döwlet maksatnamasyny” amala aşyrmak boýunça ýerine ýetirilmeli çäreleriň meýilnamasyna laýyklykda, milli programma önümlerini döretmek we enjamlary öndürmek işlerinde kiçi we orta telekeçiligi goldamak göz öňünde tutulýar. Bellenilişi ýaly, “Tehno Merkez” ýapyk görnüşli paýdarlar jemgyýeti tarapyndan ýurdumyzda dürli görnüşli serwer, maglumat saklaýjy we kiberhowplardan goraýjy enjamlaryň önümçiligini ýola goýmagyň maksadalaýykdygy öwrenildi. Şunuň bilen birlikde, geljekde serwer enjamlaryna abatlaýyş, tehniki goldaw bermek işlerini hem-de “akylly” şäher, “akylly” öý ulgamlary üçin zerur bolan enjamlaryň önümçiligini ýola goýmak göz öňünde tutulýar. Munuň özi goşmaça iş orunlaryny döreder, işgärleriň hünär derejesini ýokarlandyrar. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, ýurdumyzda sanly ykdysadyýeti ösdürmäge uly üns berilýändigini, daşary ýurtlardan getirilýän harytlaryň ornuny tutýan önümçilikleri ýola goýmakda maksatnamalaýyn işleriň durmuşa geçirilýändigini nygtady. Döwlet Baştutanymyz ýurdumyzda serwer, maglumat saklaýjy we kiberhowplardan goraýjy enjamlaryň önümçiligini ýola goýmak baradaky teklibi goldap, agentligiň ýolbaşçysyna bu ugurda degişli işleri geçirmegi tabşyrdy.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

14 03.03.2026

Aýdym-sazly dabara

Gül-gülzarlyga beslenip gelen baharyň ilkinji günlerinde bellenilýän 8-nji mart Halkara zenanlar gününe bagyşlanyp geçirilýän aýdym-sazly dabaralar Mary welaýatynyň çäginde hem giň gerim alýar. Murgap etrap häkimliginiň, Murgap etrap zenanlar bölüminiň, Türkmenistanyň Demokratik partiýasynyň Murgap etrap komitetiniň, Murgap etrap medeniýet bölüminiň hem-de Murgap etrap bilim bölüminiň bilelikde gurnamaklarynda “Zenan-zemin lälesi” diýen at bilen geçirilen aýdym-sazly dabara hem turuwbaşdan uly şatlyk-şowhuna beslendi. Mährem eneleriň, dürli kärde zähmet çekýän işewür zenanlaryň gatnaşmaklarynda Murgap şäherçesiniň “Bagt öýi” toý mekanynda geçirilen bu baýramçylyk dabarasynda etrabyň medeniýet we sungat işgärleri, ussat aýdymçylary we tans toparlary uly joşgun bilen çykyş etdiler. Güler ýüzli zenanlary bir saçagyň başyna jemlän bu baýramçylyk dabarasynyň dowamynda belentden ýaňlanan aýdym-sazlarda gülläp ösýän eziz Diýarymyz hem-de Hormatly Prezidentimiziň zenanlarmyz barada edýän ägirt uly aladalary we zeminiň lälesi, asmanyň aýy, durmuşyň güli hasaplanýan zenanlarymyz joşgun bilen wasp edildi. Baýramçylyk dabarasyndan göwünleri galkynan bagtyýar zenanlar özlerine döredilýän şeýle ajaýyp mümkinçilikler üçin Gahryman Arkadagymyza we Arkadagly Gahryman Serdarymyza buýsançly sözlerini aýtdylar. Dursun Ilbegiýewa.

16 03.03.2026

“Iň eýjejik gyzjagaz – 2026”

Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Bilim ministrliginiň Milli bahar baýramy mynasybetli ýurdumyzyň umumy bilim berýän orta mekdepleriniň 2-4-nji synplarynda okaýan okuwçy gyzlarynyň arasynda yglan eden “Iň eýjejik gyzjagaz – 2026” atly şadyýan bäsleşigiň Mary şäher tapgyry geçirilip, ol ýokary ruhubelentlige beslendi. Ýaşlar guramasynyň Mary şäher geňeşiniň gurnamagynda geçirilen bäsleşigiň bu tapgyryna şäheriň eýjejik gyzlarynyň uly topary gatnaşyp, olar bu ýerde öz şadyýan çykyşlaryny belent joşgun bilen ýerine ýetirdiler. Bäsleşige gatnaşan gyzjagazlar Hormatly Prezidentimiziň alyp barýan rowaç işlerini, Ata Watanymyzy, bagtyýar çagalygy we dost-doganlygy wasp edýän aýdym-sazlary ýerine ýetirmek, milliliklerimizi wasp edip goşgy okamak we ene-mamalarymyzdan dowam edip gelýän el işleriniň görnüşleri boýunça öz ukyp-başarnyklaryny görkezmek ýaly şertler boýunça bäsleşdiler. Bu ýerde has ezberlik bilen çykyş edip tapawutlanan gyzjagazlar ýeňiji boldular we olar bäsleşigiň welaýat tapgyryna gatnaşmaga hukuk gazandylar. Dursun Ilbegiýewa.

16 02.03.2026

Şatlyk-şowhuna beslenen dabaralar

Ýurdumyzda şu ýylyň 13-nji fewralynda geçirilen Ministrler Kabinetiniň giňişleýin mejlisiniň dowamynda Hormatly Prezidentimiz 2026-njy ýylyň ,,Garaşsyz, baky Bitarap Türkmenistan – bedew batly at myradyň mekany” ýyly diýlip yglan edilmegi mynasybetli atçylyk we atly sport ugurlary boýunça çäreleriň Maksatnamasyny tassyklap, onda bellenen wezipeleri üstünlikli amala aşyrmak babatda tabşyryklary berdi. Şunuň bilen baglylykda Mary welaýatynyň Mary şäherinde degişli Maksatnama laýyklykda ,,Galkynyş” milli at üstündäki oýunlar toparynyň halkara giňişliginde gazanan nobatdaky üstünligine bagyşlanan dabara geçirildi. “Galkynyş” milli at üstündäki oýunlar toparynyň “Garaşsyz, baky Bitarap Türkmenistan – bedew batly at-myradyň mekany” ýylynyň başynda ýurdumyza getiren uly abraýy, şöhrat – şany ähli halkymyzy buýsandyrýar. Olaryň sirk sungatyny ösdürmekde gazanan şöhraty diňe türkmen halkyny däl, eýsem dünýäniň halklaryny, atşynaslaryny, sirkçilerini haýrana goýýar. Mälim bolşy ýaly, şu ýylyň ilkinji aýynda ,,Galkynyş” milli at üstündäki oýunlar toparyna Monako Knýazlygynyň Monte – Karlo şäherinde geçirilen 48-nji halkara sirk sungaty festiwalynda sirk sungatyna uly goşandy üçin Bütindünýä sirk federasiýasy hem-de Ýewropa Sirk assosiýasiýasy tarapyndan halkara şahadatnamalarynyň gowşurylmagy türkmen bedewleriniň dünýädäki şan – şöhratynyň barha artýandygynyň ýene bir aýdyň güwäsine öwrüldi. Şu ajaýyp waka mynasybetli Mary welaýatynda giň gerimde ýaýbaňlanan dabaralar uly ruhubelentlige beslendi. Halkymyzyň milli buýsanjy we guwanjy bolan behişdi bedewlerimiziň owazasyny äleme ýaýýan ,,Galkynyş” milli at üstündäki oýunlar topary Mary welaýatynyň merkezi Mary şäherinde dabaraly garşylandy. Toparyň agzalary şäheriň görkana köçeleri boýunça toý ýörişini amala aşyryp, Mary şäheriniň merkezindäki Mary welaýat kitaphanasynyň öňündäki giň meýdançada guralan dabara gatnaşdylar. Bu ýerde welaýatyň medeniýet we sungat ussatlary özleriniň ajaýyp çykyşlaryny görkezdiler. Dabaranyň dowamynda ýerine ýetirilen çykyşlarda Hormatly Prezidentimiz Arkadagly Gahryman Serdarymyzyň hem-de türkmen halkynyň Milli Lideri Gahryman Arkadagymyzyň il – halk, döwlet hem-de bütin adamzat bähbitli beýik hem-de rowaç işleri, halkymyzyň guwanjyna hem buýsanjyna öwrülen ahalteke bedewlerimiz wasp edildi. Soňra myhmanlar binanyň içine girip, bu ýerde guralan sergi bilen ýakyndan tanyşdylar. Şeýle-de paýhas ojagynyň beýleki bölümlerine aýlanyp gördiler. Myhmanlar şäheriň merkezindäki Baş baýdak meýdançasynyň hem-de welaýatyň Kemine adyndaky döwlet drama teatrynyň öňündäki dabaralara gatnaşyp, joşgun bilen ýerine ýetirilen çykyşlara uly gyzyklanma bilen tomaşa etdiler. Şäheriň medeni ojaklarynyň öňündäki meýdançalarda guralan dabaralara gatnaşan meşhur ,,Galkynyş” at üstündäki oýunlar toparynyň agzalary soňra ,,Türkmeniň ak öýi” binasyna bardylar. ,,Türkmeniň ak öýi” binasynyň öňündäki toý meýdançasynda at üstündäki oýunlar toparynyň agzalary uly toý şatlygy bilen garşylandy. Binanyň çar ýanynda milli mirasymyza degişli şaý-sepler, at esbaplary, altyn kümüşden ýasalan bezeg serişdeleri, amaly haşam we şekillendiriş sungatyna degişli saýlama eserler ýerleşdirilipdir. Şanly waka mynasybetli bu ýerde guralan dabaranyň dowamynda welaýatyň medeniýet, sungat işgärleri ýörite taýýarlan baýramçylyk çykyşlaryny görkezip, bu ýere gelen adamlara ruhy lezzet paýladylar. Görkezilen sahna çykyşlaryndan göwünleri galkynan myhmanlar “Türkmeniň ak öýi” binasynyň girelgesinde giňden ýaýbaňlandyrylan sergini synlamakdan hem ruhy lezzet aldylar. Sergide milli mirasymyzyň, amaly-haşam we şekillendiriş sungaty hem-de surat, nakgaşçylyk eserleriniň, Milli Liderimiz Gahryman Arkadagymyzyň, Hormatly Prezidentimiz Arkadagly Gahryman Serdarymyzyň jöwher paýhasyndan dörän ajaýyp kitaplary ýerleşdirilipdir. Sergini synlan her bir adam türkmen milletiniň özüniň ebedi mirasyna, behişdi bedewlerine nä derejede ýokary baha berýändigine göz ýetirdiler. Bezemen binanyň tomaşa zalynda guralan dabaralar ähli medeni çäreleriň seresi boldy. ,,Türkmeniň ak öýi” binasynyň sahnasynda şowhunly çykyşlar giň gerimde ýaýbaňlandyryldy. Çykyşlarda halkara festiwallaryň, bäsleşikleriň iň ýokary baýraklaryna mynasyp bolup gelýän ,,Galkynyş” milli at üstündäki oýunlar toparynyň dünýädäki meşhurlygy barada nygtaldy. Çykyş edenler ,,Garaşsyz, baky Bitarap – Türkmenistan bedew batly at – myradyň mekany” ýylynyň ilkinji aýynda topara Monte-Karlo şäherinde geçirilen 48-nji halkara sirk sungaty festiwalynda Bütindünýä sirk federasiýasy hem-de Ýewropa Sirk assosiýasiýasy tarapyndan halkara şahadatnamalaryň gowşurylmagy tutuş halkymyzy buýsandyrandygyny aýratyn bellediler. Türkmen bedewleri türkmen halkynyň milli buýsanjy, guwanjy, mertligiň, wepalylygyň nyşanydyr. Ýurdumyzda berkarar döwletiň täze eýýamynyň galkynyşy döwründe atçylygy we atçylyk sportyny ösdürmäge, tejribeli atşynaslary, seýisleri, çapyksuwarlary we beýleki hünärmenleri taýýarlamaga, olaryň ýaşaýyş-durmuş derejesini ýokarlandyrmaga ähli zerur şertler döredilýär. Ata – babalarymyzyň atşynaslyk däpleri gaýtadan dikeldilýär we türkmen bedewlerimiziň dünýädäki at-abraýy has-da belende galýar. Bu ýerde çykyş edenler türkmen halkynyň Milli Lideri Gahryman Arkadagymyzyň türkmen bedewlerimize bagyşlap döreden eserlerinde türkmen bedewleriniň gelip çykyşy, taryhy ösüş ýoly, tohum aýratynlyklary hem-de olaryň türkmen halkynyň durmuşyndaky orny giňden açylyp görkezilýär – diýip, aýratyn bellediler. Mälim bolşy ýaly Gahryman Arkadagymyz ýakynda Arkadag şäherine gelip, Aba Annaýew adyndaky Halkara atçylyk akademiýasynyň ,,At – myrat” okuw merkezine, Gurbanguly Berdimuhamedow adyndaky howandarlyga mätäç çagalara hemaýat bermek boýunça haýyr – sahawat gaznasynyň adyndan bir million bäş ýüz müň manat hem-de Hormatly Prezidentimiziň kabul eden çözgüdi esasynda ,,Galkynyş”milli at üstündäki oýunlar toparyna üç million manat pul baýragyny we toparyň agzalarynyň her birine nepislik bilen ýasalan at eýerlerini sowgat beripdi. Mälim bolşy ýaly geçen ýylyň dowamynda ýerine ýetirilen işleriň jemlerine bagyşlap geçirilen ýurdumyzyň Ministrler Kabinetiniň giňişleýin mejlisiniň dowamynda Hormatly Prezidentimiz 2026-njy ýylyň ,,Garaşsyz, baky Bitarap Türkmenistan – bedew batly at - myradyň mekany” ýyly diýlip yglan edilmegi mynasybetli atçylyk we atly sport ugurlary boýunça çäreleriň Maksatnamasynyň işlenip taýýarlanandygyny aýdyp, degişli resminama gol çekdi. Şunuň bilen baglylykda, Mary welaýatynyň Mary şäherinde degişli Maksatnama laýyklykda, şu ýylyň esasy çäreleriniň biri bolan ,,Galkynyş” milli at üstündäki oýunlar toparynyň halkara giňişlikde gazanan nobatdaky üstünligine bagyşlanyp geçirilen dabaralar buýsançly başlary hasam belende göterdi. Bu bolsa milli sirk sungatynyň ösmeginde mynasyp paýy bolan toparyň agzalarynyň ýurdumyzyň sebitleri boýunça guraýan baýramçylyk ýörişiniň dowamyna öwrüldi – diýip, bu ýerde çykyş edenler aýratyn bellediler. Ýurdumyzda atçylygy we atçylyk sportyny ösdürýän türkmen halkynyň Milli Lideri Gahryman Arkadagymyza hem-de Hormatly Prezidentimiz Arkadagly Gahryman Serdarymyza alkyş sözlerini beýan etdiler. Binanyň tomaşaçylar zalynda görkezilen aýdym-sazly çykyşlar hem öz şowhuny bilen köplerde täsir galdyrdy. Dabarada welaýatyň medeniýet we sungat ussatlarynyň ýerine ýetiren şowhunly çykyşlarynda gamyşgulak bedewlerimizi, olaryň ýyndamlygyny, owadanlygyny wasp edýän aýdymdyr sazlary belentden ýaňlandy. Medeniýet işgärleriniň ýerine ýetiren her bir joşgunly çykyşlaryny tomaşaçylar dowamly el çarpmak bilen garşyladylar. “Galkynyş” milli at üstündäki oýunlar toparynyň agzalarynyň görkezen sirk oýunlaryna tomaşaçylar uly gyzyklanma bilen tomaşa etdiler. Toparyň oglan – gyzlarynyň welaýatyň bagtyýar ýaşaýjylaryna görkezen çylşyrymlydan täsin we täsirli oýunlary, çapyp barýan atyň üstünde amala aşyran tilsimleri her bir adamyny haýrana goýdy. Sahna çykan atlaryň dürli oýunlaryny tomaşaçylar dowamly el çarpmak bilen mübäreklediler. At üstünde görkezen her bir oýunlar sirk sungatynyň muşdaklarynyň ünsüni özüne çekip, olarda ýatdan çykmajak täsirler galdyrdy. Görkezilen çykyşlardan soňra dabara gatnaşanlar Hormatly Prezidentimiz Arkadagly Gahryman Serdarymyza ýüzlenme kabul etdiler. ,,Galkynyş” milli at üstündäki oýunlar toparynyň agzalarynyň halkara giňişliginde gazanan üstünliklerine bagyşlanan dabaralardan soň agzaçar wagtynda toý sadakasy berildi. Onda okalan aýat-töwirlerde Berkarar Watanymyzyň abadançylygy, halkymyzyň agzybirligi, Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak, il-ýurt bähbitli tutumly işleriniň rowaç bolmagy dileg edildi. Toýmyrat Gurbanow, Çarymuhammet Saparow.

26 27.02.2026

Saýlawlara taýýarlyk görülýär

Şu ýylyň 29-njy martynda geçiriljek syýasy jemgyýetçilik çäresi bolan Türkmenistanyň Mejlisiniň deputatlarynyň, welaýat, etrap, şäher, halk maslahatlarynyň we Geňeşleriň agzalarynyň saýlawlaryna giňden taýýarlyk görülip, häzirki wagtda dalaşgärler bilen saýlawçylaryň duşuşyklary yzygiderli geçirilýär. 102-nji “Jemgyýet” saýlaw okrugy boýunça Türkmenistanyň Mejlisiniň deputatlygyna dalaşgär Mary welaýatynyň Mary şäher Salgyt bölüminiň Hasap we hasabat bölüminiň başlygy Jumamyradow Atajan Çarymyradowiç, Türkmenistanyň Mejlisiniň Ylym, bili, medeniýet we ýaşlar syýasaty baradaky komitetiniň baş hünärmeni Nepesowa Zyba Serdarowna, 104-nji “Peşanaly” saýlaw okrugy boýunça Türkmenistanyň Mejlisiniň Daşky gurşawy goramak, tebigatdan peýdalanmak we agrosenagat toplumy baradaky komitetiniň baş hünärmeni Myradowa Jahangül Mämmetorazowna, Mary welaýatynyň Mary şäheriniň 36-njy orta mekdebiniň müdiri Alyýew Begenç Berdimyradowiç we Türkmenistanyň Agrar partiýasynyň Mary welaýat Mary şäher komitetiniň başlygy Annadurdyýew Mekan Çarymyradowiç dagylar bilen duşuşygy Mary etrabynyň 38-nji orta mekdebinde hem-de etrabyň medeniýet öýünde duşuşyklar geçirildi. Bu ýerde ilki bilen dalaşgärleriň ynanlan wekilleri çykyş edip, olar 102-nji “Jemgyýet”, 104-nji “Peşanaly saýlaw okruklary boýunça Türkmenistanyň Mejlisiniň deputatlygyna hödürlenen dalaşgärleriň terjimehallary hem-de durmuş ýollary barada gürrüň berdiler. Soňra dalaşgäriň özileri hem çykyş edip öz maksatnamalary bilen saýlawçylary giňden tanyşdyrdylar.

59 26.02.2026

Dostlukly gatnaşyklaryň beýany

Türkmenistanyň Kärdeşler arkalaşyklarynyň Mary welaýat birleşmesiniň gurnamagynda Türkmen halkynyň Milli Lideri, Türkmenistanyň Halk maslahatynyň Başlygy Gahryman Arkadagymyzyň Amerikanyň Birleşen Ştatlaryna bolan dostlukly iş saparynyň netijelerine we “Garaşsyz, baky Bitarap Türkmenistan-bedew batly at-myradyň mekany” ýylyna bagyşlanyp maslahat geçirildi. Bu maslahatda çykyş edenler Türkmen halkynyň Milli Lideri Gahryman Arkadagymyzyň ýakynda Amerikanyň Birleşen Ştatlaryna bolan dostlukly iş saparynyň çäklerinde ýokary derejede geçirilen gepleşikleriň, duşuşyklaryň ýurdumyzy ösdürmekdäki ähmiýet we bu döwlet bilen dostlukly gatnaşyklary pugtalandyrmakdaky orny dogrusynda giňişleýin durup geçdiler. Şeýle hem çykyş edenler Hormatly Prezidentimiziň başda durmagynda diýarymyzda gazanylýan üstünlikler we Berkarar döwletiň täze eýýamynyň galkynyşy döwründe Bitarap watanymyzyň dünýä döwletleri bilen alyp barýan hoşniýetli gatnaşyklary barada-da aýratyn nygtadylar. Maslahata gatnaşanlar türkmen halkynyň milli Lideri Gahryman Arkadagymyza we Arkadagly Gahryman Serdarymyza alkyş sözlerini aýtdylar.

27 26.02.2026

Wagyz-nesihat çäresi örän täsirli boldy

“Garaşsyz, baky Bitarap Türkmenistan – bedew batly at-myradyň mekany” ýylynda ýol hereketiniň howpsuzlygyny berjaý etmek boýunça wagyz-nesihat çärelerine, okuw sapaklaryna kiçi ýaşly çagalardan başlap, ýaşuly nesliň wekillerine çenli uly ruhubelentlikde gatnaşýarlar. Köçelerde we ýollarda ýol hereketiniň düzgünleriniň berjaý edilmegi ugrunda gözegçilik güýçlendirilip, wagyz-nesihat işleri giňden ýaýbaňlandyrylýar. Şeýle guramaçylykly wagyz-nesihat çäresi Marynyň Lukmançylyk orta okuw mekdebiniň gurnamagynda ýol hereketiniň howpsuzlygyny üpjün etmek boýunça welaýat polisiýa müdirliginiň ýol gözegçilik gullygynyň, Mary welaýat Polisiýa müdirliginiň Ýangyn howpsuzlygy bölüminiň işgärleriniň, Marynyň lukmançylyk orta okuw mekdebiniň professor mugallymlarynyň we talyplarynyň gatnaşmaklarynda wagyz-nesihat duşuşygy geçirildi. Çäräniň dowamynda çykyş edenler raýatlaryň ýollarda awtoulaglar we pyýadalar bilen hereketiň sazlaşygyny giňden beýan edýän we howpsuz hereketi ündeýän şeýle hem ýangyn bilen baglanşykly ýüze çykýan we dürli tebigy hadysalaryň öňüni almak boýunça ýerine ýetirilmeli zerur çäreler barada giňişleýin söhbet etdiler. Bilim berýän ulgamlarda ýangyn howpsuzlyk talaplary, talyplaryň arasyna ýangyn söndürmegiň usullary dogrusynda hem çykyşlarda aýratyn nygtaldy. Bu ýerdäki çykyşlarda Gahryman Arkadagymyzyň, Arkadagly Gahryman Serdarymyzyň halkymyzyň saglygyny goramakda alyp barýan belent maksatly işleri dogrusyndaky çykyşlara hem giň orun berildi. Şeýle-de bu ýerde çykyş edenler ýaşlaryň ahlak taýdan arassa, beden taýdan sagdyn, ruhy taýdan kämil bolup jemgyýetimize gerekli, watanymyza, Hormatly Prezidentimize wepaly ýaşlar bolup ýetişmeklerini nygtadylar. Göwher Ataýewa.

54 26.02.2026

“Kompozitor” filmi halkyň söýgüsini gazandy

Asuda Watanymyzda her ýyly mynasyp atlandyrmak asylly däbe öwrülişi 2026-njy ýyl hem “Garaşsyz, baky Bitarap Türkmenistan – Bedew batly at-myradyň mekany” ýylynda hem toý baýramlar, dabaralar, maslahatlar giň gerime eýe bolup, şeýle çäreleriň biri hem welaýatymyzyň Ýolöten etrabynyň medeniýet öýünde Garaşsyzlygymyzyň şanly 35 ýyllygyna bagyşlanyp geçirilen milli kino hepdeliginiň çäklerinde “Kompozitor” türkmen filmine etrabyň jemgyýetçilik we syýasy guramalarynyň, birnäçe edara kärhanalarynyň işgärleri bilen bilelikde tomaşa edildi. Halkara derejede birnäçe baýraga mynasyp bolan bu çeper film, türkmen milli saz sungatynyň jadylaýjy güýjüni, medeni mirasyny we saz eserleri arkaly gahrymanlaryň içki dünýäsini açyp görkezýär. Kerim Berdimuhamedowyň sazlaryndan peýdalanylan bu eser, türkmen medeniýetini dünýä ýaýmakda möhüm oruna eýe. Filmde türkmen saz medeniýetiniň baý däpleri, milli saz gurallary we türkmen halkynyň ruhy dünýäsi içinde suratlandyrylýar. Tutuş filmiň dowamynda wakalar sazyň utgaşdyrylmagynda beýan edilip, saz esasy gural hökmünde çykyş edýär. “Kompozitor” filmi tomaşaçylaryň söýgüsine we gyzgyn elçalpyşmalaryna mynasyp bolup, olarda ýatdan çykmajak ajaýyp täsirleri galdyrdy. Tomaşaçylar ýurdumyzda milli kino sungatynyň ösmegi üçin giň ýol açýan Milli Liderimiz, Gahryman Arkadagymyza we Hormatly Prezidentimiz Arkadagly Gahryman Serdarymyza alkyş hem hoşallyk sözlerini beýan etdiler. Azat Beglanow.

25 26.02.2026

Sporta höwesek türgen

Garaşsyz, baky Bitarap Türkmenistan döwletimizde hormatly Prezidentimiziň taýsyz tagallalary netijesinde ýaşlary sporta çekmekde giň mümkinçilikler döredilýär. Şol mümkinçiliklerden peýdalanýan ýaşlar bolsa ýurdumyzyň sport abraýyny ösdürmekde özleriniň mynasyp goşantlaryny goşýarlar. Şeýle sporta höwesek ýaşlaryň biri-de Baýramaly şäherindäki 10-njy orta mekdebiň 4-nji synp okuwçysy Agajan Esenowdyr. Agajan erkin göreşe aýratyn üns berýär. Ol bäş ýaşyndan bäri Baýramaly şäherindäki 2-nji sport mekdebiniň ussat tälimçisi Atajan Mämmedowdan tälim alýar. A. Esenow häzirki wagta çenli etrap, şäher, welaýat, döwlet derejesinde erkin göreş boýunça geçirilen ýaryşlarda öz ussatlygyny görkezip, Hormat hatlarynyň 18-sine, on dört kümüş hem-de iki bürünç medallara mynasyp boldy. Ýaşajyk türgeniň şeýle üstünlikleri diňe bir özüni däl, eýsem, mugallymlaryny, tälimçilerini, ene-atasyny hem guwandyrýar.

22 26.02.2026

Täze usullar ornaşdyrylýar

Berkarar döwletiň täze eýýamynyň Galkynyşy döwründe hormatly Prezidentimiziň tagallalary bilen ýaş nesle bilim-terbiýe bermek döwrebaplaşdyrylýar. Okatmagyň usulyýetini kämilleşdirmekde, hilini ýokarlandyrmakda netijeli işlere badalga berilýär. Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasy kabul edildi. Bu resminamalaryň maksady bilim bermegiň hilini dünýä ülňülerine laýyk getirmekden, okatmagyň usulyýetini kämilleşdirmekden, innowasion usullary okuw işine ornaşdyrmakdan ybaratdyr. Şeýle hem resminamada mugallymlaryň döredijilikli başarnyklaryny we ussatlygyny ýokarlandyrmak göz öňünde tutulýar. Bu Konsepsiýada bellenilen wezipeleri durmuşa geçirmekde etrabymyzyň bilim edaralarynda degerli işler alnyp barylýar. Şeýle çäreleriň täsirliligini gazanmak maksady bilen geňeşimiz tarapyndan goldaw-ýardam berilýär. “Garaşsyz, baky Bitarap Türkmenistan — bedew batly at-myradyň mekany” ýylynda-da bilim-terbiýäniň usulyýetiniň kämilleşdirilmegi ýaş nesle berilýän bilim-terbiýäniň hilini has-da gowulandyrmaga itergi berýär. Çarymyrat ESENOW.

26 27.02.2026

Saýlawlara taýýarlyk görülýär

59 26.02.2026

Dostlukly gatnaşyklaryň beýany

28 26.02.2026

Toý-baýramyň ýaraşygy

Berkarar döwletiň täze eýýamynyň Galkynyşy döwründe 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» diýlip atlandyrylmagy türkmen halkynyň müňýyllyklardan gözbaş alýan milli gymmatlyklaryna goýulýan belent sarpanyň aýdyň nyşany boldy. Bu şygar halkymyzyň taryhy ykbalynyň, ruhy dünýäsiniň hem-de ýaşaýyş pelsepesiniň jemlenmesi hökmünde ulus-ilimizi galkyndyrdy. Bedew ýylynda Garaşsyzlygymyzyň şanly 35 ýyllygynyň giňden baýram ediljekdigi buýsanjymyzy artdyrýar. Toýlaryň bezegi hasaplanylýan behişdi bedewlerimiz öz gözelligi, okgunly bady şan-şöhratymyzy dünýä ýaýýar. Munuň aýdyň mysaly hökmünde Monako Knýazlygynyň Monte-Karlo şäherinde geçirilen 48-nji halkara sirk sungaty festiwalynda «Galkynyş» milli at üstündäki oýunlar toparynyň gazanan üstünliklerini görkezmek bolar. Bu festiwalda topar sirk sungatyna goşan uly goşandy üçin halkara şahadatnamalar bilen sylaglanyldy. Bu waka şanly ýylyň özboluşly badalgasyna öwrüldi. Şeýle-de, golaýda Gahryman Arkadagymyzyň Köpetdagyň eteginde ýerleşýän Arkadag şäherindäki Aba Annaýew adyndaky Halkara atçylyk akademiýasyna we “Görogly” adyndaky Döwlet atçylyk sirkine baryp görmegi, şol ýerde “At — myrat” okuw merkeziniň çagalary hem-de “Galkynyş” milli at üstündäki oýunlar toparynyň agzalary bilen duşuşmagy ildeşlerimizde uly guwanç we hoşallyk duýgusyny döretdi. Bu duşuşyklar ýaşlaryň bedewlere bolan gyzyklanmasyny has-da güýçlendirdi. Milli Liderimiziň “At — myrat” okuw merkezine Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan 1 million 500 müň manat möçberinde sowgat berilýändigini aýtmagy jemgyýetimizde gyzgyn goldaw tapdy. Bu sahawatly ädim çagalaryň bedewlere bolan söýgüsini artdyrmakda, olaryň kalbynda mähir we watansöýüjilik duýgularyny terbiýelemekde aýratyn ähmiýete eýe boldy. Hormatly Prezidentimiziň «Galkynyş» milli at üstündäki oýunlar toparynyň maddy-enjamlaýyn binýadyny berkitmek maksady bilen bu topary 3 million manat bilen sylaglamak baradaky Karary halkymyzyň göwün guşuny göge göterdi. Bu goldaw toparyň döredijilik mümkinçiliklerini has-da giňeldip, onuň halkara abraýyny ýokarlandyrmaga uly itergi berdi. Behişdi bedewlerimiziň şöhratyna şan goşýan Milli Liderimiz Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlary sag, ömürleri uzak, tutumly işleri hemişe rowaç bolsun! Maksat JANMYRADOW.

27 26.02.2026

Taryha ýazylýan ýyllar

Ajaýyp ýylymyzyň “Garaşsyz, baky Bitarap Türkmenistan — bedew batly at-myradyň mekany” diýlip atlandyrylmagynda giň many-mazmun bar. Çünki türkmen halky bedew atyny sarpalaýar, hormatlaýar. Milli buýsanjyna we guwanjyna öwrülen ahalteke bedewleri türkmen halkynyň gymmatly medeni mirasydyr. Häzirki wagtda ajaýyp bedewlerimiziň sarpasy belent tutulýar. Ahalteke atlarynyň tohum arassalygyny gorap saklamak, olaryň abraýyny dünýä ýaýmak boýunça mynasyp işler alnyp barylýar. Üstümizdäki ýylyň 16-25-nji ýanwary aralygynda Monako Knýazlygynyň Monte-Karlo şäherinde geçirilen 48-nji halkara sirk sungaty festiwalynda “Galkynyş” milli at üstündäki oýunlar toparyna sirk sungatyna uly goşandy üçin Bütindünýä sirk federasiýasy hem-de Ýewropa Sirk assosiasiýasy tarapyndan halkara şahadatnamalaryň gowşurylmagy ähli türkmen halkyny buýsandyrdy. Bu waka 2026-njy ýylyň “Garaşsyz, baky Bitarap Türkmenistan — bedew batly at-myradyň mekany” diýen şygarynyň mazmunyny baýlaşdyryp, oňa aýratyn öwüşgin çaýdy. Şeýle buýsançly wakalara beslenýän Diýarymyzyň mundan beýläk-de gülläp ösmegi ugrunda alnyp barylýan işleriň uly üstünliklere beslenmegini arzuwlaýarys. Tawus DURDYÝEWA.

32 24.02.2026

Nusgalyk häsiýetler ündeldi

“Garaşsyz, baky Bitarap Türkmenistan — bedew batly at-myradyň mekany” diýlip yglan edilen ýylymyzda türkmen ili hormatly Prezidentimiziň baştutanlygynda tutanýerli zähmet çekýär. Şu tutumly işlere etrabymyzyň ýaşlary hem saldamly goşantlaryny goşýarlar. Şol bir wagtda biz düşündiriş we wagyz-nesihat çärelerine-de uly üns berýäris. Golaýda “Marygazçykaryş” müdirliginiň Ýaşaýyş jaý jemagat kontorasynyň ýygnaklar jaýynda “Ogul-atanyň dowamy, ini aganyň arkasy” atly wagyz-nesihat duşuşygy geçirildi. Ony TMÝG-niň etrap geňeşi TDP-niň etrap komiteti, “Marygazçykaryş” müdirliginiň Ýaşaýyş jaý jemagat kontorasy bilen bilelikde guradylar. Duşuşyga atlary agzalan guramalaryň we edaranyň işgärleri gatnaşdylar. Onda Ýaşaýyş jaý jemagat kontorasynyň başlygy Emir Gowkyýew, TDP-niň Oguzhan etrap komitetiniň partiýa guramaçysy Rahmanberdi Mämmeýew, TMÝG-niň etrap geňeşiniň esasy hünärmeni Sähra Ummalyýewa çykyş etdiler. Olar döwlet Baştutanymyzyň alyp barýan ýaşlar syýasatyndan gelip çykýan wezipeler hakda durup geçdiler. Ýaşlarda watansöýüjiligi, ýokary ahlaklylygy, belent adamkärçiligi, halallygy, ynsaplylygy maşgala mukaddesliginiň ruhunda terbiýelemegiň hemişe derwaýysdygy barada täsirli gürrüň etdiler. Atageldi GURBANOW.

30 24.02.2026

Möhüm waka bagyşlanyldy

Bilşimiz ýaly, ýakynda hormatly Prezidentimiz Türkmenistanyň Ministrler Kabinetiniň giňişleýin mejlisini geçirip, geçen Halkara we parahatçylyk ýylynyň jemini jemledi. Şu möhüm waka mynasybetli TDP-niň etrap komiteti, TKA-nyň etrap birleşmesi we TMÝG-niň etrap geňeşi tarapyndan maslahat geçirildi. Etrabymyzyň medeniýet öýünde geçirilen maslahata atlary agzalan guramalaryň işgärleri gatnaşdylar. Işjeň ýagdaýda geçen maslahatda TDP-niň etrap komitetiniň partiýa guramaçysy Täzegül Pirsýanowa, TKA-nyň etrap birleşmesiniň başlygy Kakajan Durdyýew, TMÝG-niň etrap geňeşiniň başlygy, welaýat halk maslahatynyň agzasy Yklymmyrat Tuwakmyradow çykyş etdiler. Olar 2025-nji ýylyň jemine bagyşlanan mejlisde bellenilişi ýaly, geçen ýylyň ýokary zähmet üstünliklerine, şanly wakalara beslenendigi barada gürrüň etdiler. Şeýle hem “Garaşsyz, baky Bitarap Türkmenistan — bedew batly at-myradyň mekany” ýylynda öňümizde has jogapkärli wezipeleriň durýandygy dogrusynda durup geçdiler. Parahat HAŞYMOW.

29 24.02.2026

Bedew batly, şan-şöhratly Watanym!

TKA-nyň welaýat birleşmesiniň mejlisler zalynda TDP-niň welaýat, Mary şäher, Oguzhan, Mary, Wekilbazar, Murgap etrap komitetleriniň bilelikde guramagynda “Bedew batly, şan-şöhratly Watanym!” ady bilen maslahat geçirildi. Maslahata Türkmenistanyň Mejlisiniň deputatlary, welaýat, şäher, etrap halk maslahatlarynyň agzalary, TDP-niň welaýat, şäher, etrap komitetleriniň işgärleri we işjeň agzalary gatnaşdylar. Maslahaty TDP-niň welaýat komitetiniň başlygy Kakageldi Gurbanow alyp bardy. Maslahatda Murgap etrabyndaky 1-nji çagalar bakja-bagynyň müdiri, Türkmenistanyň Mejlisiniň deputaty Aýjemal Allanowa, TDP-niň Wekilbazar etrap komitetiniň başlygy Tawus Gylyjowa, TDP-niň Mary etrap komitetiniň başlygy Muhammetgylyç Nepesow, TDP-niň Murgap etrap komitetiniň başlygy Gurbangül Mädenowa çykyş etdiler. Çykyş edenler şanly ýylymyzyň mynasyp şygar bilen atlandyrylandygy, ýurdumyzyň buýsançly wakalary, türkmen bedewiniň sarpalanyşy dogrusynda giňişleýin gürrüň etdiler. Aýparça AKYMOWA.

31 23.02.2026

Dalaşgärleriň duşuşyk ýygnaklary geçirilýär

“Garaşsyz, baky Bitarap Türkmenistan bedew batly at-myradyň mekany” ýylynyň 29-njy martynda geçiriljek möhüm jemgyýetçilik – syýasy çäresi bolan Türkmenistanyň Mejlisiniň Deputatlarynyň, welaýat, etrap we şäher Halk maslahatlarynyň Geňeşleriniň agzalarynyň saýlawlaryna taýýarlyk işlerine hem giň gerim berildi. Häzirki günlerde ýurdumyzyň ähli künjeklerinde bolşy ýaly Mary welaýatynda hem Halk maslahatlarynyň Geňeşleriniň agzalarynyň saýlawlary boýunça ýerlerde dalaşgärleriň duşuşyk ýygnaklary yzygiderli geçirilýär. Wekilbazar etrap medeniýet öýünde welaýat Halk maslahatlarynyň Geňeşleriniň agzalarynyň saýlawlary boýunça Türkmenistanyň Demokratik partiýasynyň Wekilbazar etrap komiteti tarapyndan hödürlenen dalaşgärleriň saýlawçylar bilen duşuşygy geçirildi. Duşuşykda dalaşgärleriň ynanylan wekilleri olaryň terjimehaly, şahsy iş başarnyklary bilen tanyşdyrdy. Soňra bu ýerde dalaşgärler aýry-aýry çykyş edip, özleriniň maksatnamalarynyň esasy ugurlaryny beýan etdiler. Duşuşygyň dowamynda dalaşgärler ýurdumyzyň mundan beýläkde gülläp ösmegine mynasyp goşantlaryny goşup, jan aýaman zähmet çekjekdiklerine ynandyrdylar. Dursun Ilbegiýewa.

35 19.02.2026

Diplomatlaryň hünär baýramçylygyna bagyşlanyldy

Ýakynda welaýat kitaphanasynyň uly mejlisler zalynda Türkmenistanyň diplomatik işgärleriniň güni mynasybetli dabaraly maslahat geçirildi. Oňa Türkmenistanyň Mejlisiniň deputatlary, welaýat, şäher, etrap halk maslahatlarynyň agzalary, welaýatyň edara-kärhanalarynyň, jemgyýetçilik guramalarynyň, köpçülikleýin habar beriş serişdeleriniň wekilleri we talyp ýaşlar gatnaşdylar. “Garaşsyz, hemişelik Bitarap Türkmenistan: parahatçylygy we durnuklylygy üpjün etmek ýoly bilen” diýlip atlandyrylan dabaraly maslahatyň öň ýanynda oňa gatnaşyjylar kitaphananyň girelgesinde medeni çykyşlara tomaşa etdiler we surat hem-de kitap sergilerini synladylar. Dabaraly maslahatda welaýat häkiminiň orunbasary, welaýat zenanlar bölüminiň başlygy Çemen Akyýewa, Türkmenistanyň Daşary işler ministrliginiň welaýat boýunça wekilhanasynyň üçünji sekretary Myrat Ýamşikow, Eýran Yslam Respublikasynyň Mary şäherindäki Baş konsuly Abdolmajid Kamjou, TMÝG-niň welaýat geňeşiniň başlygy, Türkmenistanyň Mejlisiniň deputaty Maksat Janmyradow, welaýat baş bilim müdirliginiň bölüm müdiri, welaýat halk maslahatynyň başlygynyň orunbasary Ogulgerek Abdyllaýewa çykyş etdiler. Çykyş edenler hormatly Prezidentimiziň alyp barýan parasatly içeri hem daşary syýasatynyň uly üstünliklere beslenýändigini, ata Watanymyzyň halkara abraýynyň barha belende galýandygyny uly buýsanç bilen bellediler. Şeýle-de, dünýä döwletleri bilen ýola goýulýan diplomatik gatnaşyklaryň, ykdysady hyzmatdaşlygyň geriminiň barha giňeýändigi dogrusynda durup geçdiler. Dabaraly maslahatda çykyş edenler diplomatik işgärlerini hünär baýramçylygy bilen gutlap, ýurdumyzyň gülläp ösmegi ugrunda taýsyz tagallalary edýän Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny arzuw etdiler. Sülgün ŞADYÝEWA.