Aýatda diri bolanlygynda şu ýyl 85 ýaşamaly şahyr Gurbannazar Ezizow türkmen halkynyň hakydasynda müdimi galdy. «Goşgusy Gurbannazar Ezizowyňky» jümlesi adaty zat bolup galdy, çünki sazandalar şahyryň goşgularyna aýdym ýazýarlar. Suratkeşler eserlerinde şahyryň keşbini döredýärler.
Türkmenistanyň Suratkeşler birleşiginiň sungat galareýasynda «Ynam» ady bilen žiwopis işleriniň sergisi köp adamly boldy. Oňa häzirkizaman sungatyndan ugur alýan bäş nakgaş gatnaşdy.
Rahman Rahmanow dünýä baradaky garaýşyny özüçe beýan edýär, bu gezegem ol «Ýedi oturgyç» atly eseri bilen geň galdyrdy. Surat sahna sungatynyň muşdaklary teatra baranda nirede oturýandygy möhümmi ýa-da däl diýen mesele hakda. Nakgaşyň bu işinde sýurrealizm elementleri duýulýar, bu onuň beýleki suratlarynda göze ilýär. Mysal üçin, «Iki dogan» atly işinde biri-birine garylyp giden daragtlary biri-birinden daş düşmedik gojalyga ýeten doganlar keşbinde şekillendiripdir. «Iki derwüş» atly beýleki bir işinde batyl derwüşler biri-birine gyslyşyp, sowukdan hem özüne düşnüksiz dünýäden goranýarlar. Galyberse-de, sergä gelenleriň hemmesiniň ünsüni özüne çeken «Soňky göçüm» atly suratda gözenek çyzmykly desterhandaky ýykylan küşt mallary şekillendirilipdir.
Suratkeş Perhat Işangulyýew sergä 12 suratyny hödürläpdir, olaryň ählisinde-de öküzler şekillendirilipdir. Awtoryň pikiriçe, öküz güýç-gaýratyň nyşany, olara diňe zenan maşgala özüçe erk edip biler. Perhadyň suratlary simwolizm usulynda çekilipdir.
Begenç Berkeliýewiň manzaralarynda impressionizm alamatlary mese-mälim görünýär. «Penjireden göze ilýäni» atly suratda awtor açyk äpişgeden daşa bakanda gözüne ilen ýaşyl öwsüp oturan manzara maýyl bolşuny beýan edipdir. Ol beýleki sergilerde hem görkezilen «Aýlanthus bagy» manzaralar tapgyry, şeýle hem ekspressionizm usulynda çekilen tut agajy şekillendirilen işleri bilen gözümizde galdy.
Barha gabara alýan garpyzlar, gawun kaky, guradylan pomidor, burç ekerançylyk önümleri nakgaş Amanmyrat Modyýewiň häzirkizaman žiwopis eserlerinde öz beýanyny tapdy. Amanmyrat, meselem, depe bolup ýatan kädilerde ýönekeý geometrik çyzyklaryň üýtgeşik garyşygyny görkezmäge ukyply nakgaş. Gaýtalanyp duran zatlaryň dekoratiw äheňi onuň eserlerini göze geliwli edýär.
Gahryman Goçmyradow, suratkeşleriň arasynda okumyşy bolsa gerek, sebäbi onuň işleriniň köpüsi ol ýa-da başga bir esere özüçe seslenmesi bolup görünýär. Gurbannazar Ezizowyň ýubileýine gabatlap, şahyryň adybir goşgusy esasynda ýörite «Iki agaç» suratyny taýýarlady. Çeşmäniň iki kenarynda iki agaç ösüp otyr, olaryň her biri, hamala, beýlekisine köp suw barýan ýaly görünýär. Olaryň bahyllygy tä olar biri-birine aşyk bolýança dowam edýär. Gahryman tekizliklerde şekil çekende hyýalbentligini öz erkine goýberýär, şonuň üçinem ol iki agajy we çeşmäni dik üç sütün görnüşde şekillendirip, olarda balyjyklary, almalary, şahalary, şeýle hem zenan we erkek kişileriň sudurlaryny ýerleşdiripdir.
«Düýeden uly pil bar» – Gahryman Goçmyradow «Görogly» şadessanynda bu jümläni şeýle atly suratynyň özeni edip alypdyr. Göroglyny ýesir alyp, ony düýä daňan pil üstündäki Bezirgeniň keşbini çekipdir. Goýy gyzyl reňkde çekilen surat keçäni ýatladýar.
«Ynam» sergisiniň açylyş dabarasynda çykyş edenler, şol sanda şahyryň gyzy Ýazgül hem Gurbannazar Ezizowyň goşgularyny okadylar. Bu art-taslamasyny guramaçylary myhmanlary diňe Gurbannazar Ezizowyň däl, eýsem, onuň döwürdeş şahyrlary – Gara Seýtliýewiň, Aman Kekilowyň, Berdi Kerbabaýewiň, Berdinazar Hudaýnazarowyň goşgular ýygyndylary goýlan kitap sergisi bilen tanyşmaga çagyrdylar. Halkyň söýgüli şahyrynyň ýaşan we işlän döwrüni, Gurbannazar Ezizowyň ulanan zatlary goýlan burçda şol döwrüň ruhuny görkezmäge çalşypdyrlar.
«Ynam» sergisi edebiýat-çeperçilik ruhy bilen tapawutlanyp, ol bu ýere gelenleriň ählisinde täsir galdyrdy.
