Awaza, 5-nji awgust (TDH). Şu gün “Awaza” milli syýahatçylyk zolagynyň Kongresler merkezinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde Merkezi Aziýa döwletleriniň Baştutanlarynyň ýedinji konsultatiw duşuşygyna gabatlanan çäre geçirildi. Foruma Gazagystan Respublikasynyň Prezidenti Kasym-Žomart Tokaýew, Täjigistan Respublikasynyň Prezidenti Emomali Rahmon, Özbegistan Respublikasynyň Prezidenti Şawkat Mirziýoýew hem-de Gyrgyz Respublikasynyň Ministrler Kabinetiniň Başlygy, Prezidentiň Diwanynyň ýolbaşçysy Adylbek Kasymaliýew gatnaşdylar.
Duşuşygyň BMG-niň Deňze çykalgasy bolmadyk ösüp barýan döwletler boýunça üçünji maslahatynyň geçýän günlerinde guralmagy onuň ähmiýetini has-da artdyrdy. Munuň özi Bitarap Türkmenistanyň halkara giňişlikdäki abraýynyň barha belende galýandygynyň nobatdaky aýdyň mysalydyr. Hormatly Prezidentimiziň baştutanlygynda ýurdumyz dünýäniň gyzyklanma bildirýän döwletleri, abraýly halkara guramalar, ilkinji nobatda, BMG-niň ýöriteleşdirilen edaralary bilen netijeli gatnaşyklary işjeň ösdürýär.
Ählumumy parahatçylygyň, durnuklylygyň, abadançylygyň, ösüşiň bähbidine strategik hyzmatdaşlyk Türkmenistanyň daşary syýasy doktrinasynyň esasy ýörelgesidir. Häzirki wagtda munuň özi halkara gatnaşyklar üçin aýratyn derwaýysdyr. Bu babatda Merkezi Aziýa döwletleri bilen däp bolan gatnaşyklaryň uly orny bar. Türkmen halkyny şol ýurtlaryň halklary bilen medeni-ruhy gymmatlyklaryň umumylygy, taryhyň dowamynda emele gelen dostluk we hoşniýetli goňşuçylyk gatnaşyklary baglanyşdyrýar. Merkezi Aziýa döwletleri ägirt uly, köpugurly kuwwata eýedir. Olaryň durnukly ösüş, ählumumy howpsuzlygy, durnuklylygy üpjün etmek ýaly meselelerde garaýyşlary meňzeşdir. Bu ýurtlar BMG-niň Baş Assambleýasynyň möhüm Kararnamalarynyň awtordaşlary bolup çykyş edip, sebit we halkara düzümleriň çäklerinde birek-biregi goldaýarlar.
Merkezi Aziýa döwletleriniň Baştutanlarynyň soňky ýyllarda geçirilen konsultatiw duşuşyklary sebit hyzmatdaşlygyny ösdürmek, häzirki döwrüň ýagdaýlaryndan we uzak möhletli geljekden ugur alyp, onuň ileri tutulýan ugurlaryny kesgitlemek babatda bu formatyň netijeli häsiýete eýedigini görkezdi. 2021-nji ýylyň awgustynda Türkmenistan üçünji konsultatiw duşuşygy kabul etdi we ol “Awaza” milli syýahatçylyk zolagynda üstünlikli geçirildi. Türkmen tarapynyň başlangyjy boýunça forumyň çäklerinde iri halkara çäreleriň birnäçesi, şol sanda Merkezi Aziýa ýurtlarynyň zenanlarynyň dialogy, ykdysady forum we beýleki çäreler guraldy. Olar duşuşygyň resmi maksatnamasynyň üstüni ýetirip, dostlukly goňşy halklaryň mundan beýläk-de ýakynlaşmagyna saldamly goşant goşdy.
2023-nji ýylda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow sebitde parahatçylygy, howpsuzlygy pugtalandyrmaga, döwletara hyzmatdaşlygy ösdürmäge goşan ägirt uly şahsy goşandy üçin Merkezi Aziýa döwletleriniň Baştutanlarynyň Hormat nyşany bilen sylaglanyldy. Sylaglamak dabarasy Täjigistanyň paýtagty Duşenbe şäherinde geçirildi. Şol ýerde şu formatdaky bäşinji duşuşyk guralypdy.
Häzirki wagtda sebitiň içinde, şeýle hem beýleki döwletler we halkara ykdysady birleşikler bilen özara gatnaşyklarda hyzmatdaşlygyň döwrebap usullarydyr nusgalary zerur bolup durýar. Olar ählumumy ykdysadyýetiň üýtgäp durýan ýagdaýlaryna, täze ykdysady merkezleriň kemala gelmegine, innowasiýalaryň, sanly tehnologiýalaryň ähli ýerlerde ornaşdyrylmagyna laýyk gelmelidir. Olaryň ählisi özara bähbitli hyzmatdaşlygyň täze, geljegi uly ugurlara çykarylmagyny talap edýär. Şoňa görä, häzirki wagta çenli şu formatda birnäçe sammitleriň we duşuşyklaryň geçirilendigini bellemek gerek. Umuman, ýokary derejedäki yzygiderli duşuşyklar hemme ugurlar boýunça bilelikdäki işe kuwwatly itergi berdi. Sebit hyzmatdaşlygyny ösdürmek boýunça “Ýol kartalarynyň” kabul edilmegi muňa oňyn täsir etdi. Olarda özara gatnaşyklary pugtalandyrmak boýunça çäreler kesgitlenildi.
...Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow forumy açyp we belent mertebeli myhmanlary mübärekläp, hemmelere BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşmaga çakylygy kabul edendikleri, Merkezi Aziýa döwletleriniň Baştutanlarynyň şu duşuşyga gatnaşýandygy üçin minnetdarlyk bildirdi. Gahryman Arkadagymyzyň belleýşi ýaly, bu forum Merkezi Aziýa döwletleriniň Baştutanlarynyň doganlyk Özbegistanyň paýtagty Daşkent şäherinde geçiriljek ýedinji konsultatiw duşuşygyna taýýarlyk tapgyry bolup durýar.
Soňra türkmen halkynyň Milli Lideri şu ýylyň güýzünde nobatdaky konsultatiw duşuşygy kabul edýän döwletiň Baştutany hökmünde Özbegistan Respublikasynyň Prezidenti Şawkat Mirziýoýewe söz berdi.
Dostlukly döwletiň Baştutany, ilki bilen, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy we hormatly Prezidentimiz Serdar Berdimuhamedowy hem-de türkmen halkyny ajaýyp Awazada Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň geçirilmegi bilen tüýs ýürekden gutlady. “Bu maslahata döwlet we hökümet Baştutanlarynyň, BMG-niň Baş sekretary Antoniu Guterrişiň gatnaşmagy dünýä bileleşiginiň ünsüni sebitimiz üçin örän wajyp meselelere çekmäge mümkinçilik berer. Sammitiň Türkmenistanyň başlangyjy boýunça yglan edilen Halkara parahatçylyk we ynanyşmak ýylynda geçirilmegi ýurduň halkara abraýynyň barha artýandygynyň nobatdaky güwäsidir” diýip, Özbegistanyň Lideri aýtdy. Şeýle hem ol Gahryman Arkadagymyza Merkezi Aziýa döwletleriniň Baştutanlarynyň şu ýylyň noýabrynda Daşkent şäherinde geçiriljek ýedinji konsultatiw duşuşygyna taýýarlyk görmegiň çäklerinde geçirilýän şu duşuşygy guramak baradaky başlangyç üçin minnetdarlyk bildirdi.
Soňra Prezident Ş.Mirziýoýew konsultatiw duşuşygyň başlygy hökmünde bu formatda geçirilýän bilelikdäki işler barada habar berdi. Bellenilişi ýaly, şu ýylyň başynda başlyklyk etmegiň konsepsiýasy we çäreleriň tertibi kabul edildi. Olar biziň ýurtlarymyzyň teklipleri esasynda işlenip taýýarlanyldy hem-de milli utgaşdyryjylar tarapyndan ylalaşyldy. Özbek Lideri özara bähbitli hyzmatdaşlygy giňeltmäge, gatnaşyklaryň anyk maksatnamalaryny ilerletmäge gönükdirilen çärelere aýratyn üns berilýändigini belledi. Şu geçen döwürde Howpsuzlyk geňeşiniň sekretarlarynyň, senagat, energetika, suw hojalygy we ekologiýa ministrlikleriniň ýolbaşçylarynyň duşuşygy geçirildi. Media hem-de ýaşlar forumy üstünlikli guraldy. Ýylyň ahyryna çenli parlamentara forumy, goranmak, söwda, ulag ministrleriniň duşuşyklaryny geçirmek göz öňünde tutulýar. Medeni-ynsanperwer çäreler hem möhüm ähmiýete eýe bolar. Olar biziň doganlyk halklarymyzy has-da ýakynlaşdyrar. Sebit hyzmatdaşlygynyň täze gün tertibini kemala getirmek, onuň kadalaşdyryjy hukuk binýadyny pugtalandyrmak maksady bilen, sammitiň jemleýji resminamalaryny taýýarlamak işleri alnyp barylýar.
Prezident Şawkat Mirziýoýew bu konsultatiw resminamalaryň kabul edilmeginiň sebitimizde uzak möhletli geljek üçin işiň strategik ugurlaryny kesgitlemäge mümkinçilik berjekdigini aýtdy. Daşkent sammitiniň çäklerinde syýasy dialogy çuňlaşdyrmak, serhetýaka söwdany ösdürmek boýunça anyk başlangyçlaryň ençemesini öňe sürmek göz öňünde tutulýar. Onuň gün tertibine suw, energetika ulgamlarynda hyzmatdaşlygyň möhüm meseleleri giriziler. Munuň özi biziň sebitimiz üçin örän wajypdyr. Şeýle hem ulag we howanyň üýtgemegi bilen bagly meselelere-de garalar.
Özbegistanyň Prezidenti Merkezi Aziýa döwletleriniň Baştutanlarynyň konsultatiw duşuşygynyň sebit dialogynyň örän möhüm hem-de zerur formatyna öwrülýändigine ünsi çekdi. “Häzirki wagtda biziň öňümizde sebitiň durnukly ösüşini we rowaçlygyny üpjün etmek wezipesi durýar” diýip, özbek Lideri nygtady hem-de utgaşykly, ylalaşykly çemeleşmeleriň sebit ösüşiniň, abadançylygynyň umumy maksatlaryna ýetmäge mümkinçilik berjekdigine ynam bildirdi. Sözüniň ahyrynda Prezident Şawkat Mirziýoýew myhmansöýerlik we şu günki maslahatyň ýokary derejede guralandygy üçin türkmen tarapyna ýene-de bir gezek minnetdarlyk bildirdi.
Türkmenistanyň Halk Maslahatynyň Başlygy Gurbanguly Berdimuhamedow çuň manyly çykyşy üçin Özbegistanyň Liderine minnetdarlyk bildirdi. Gahryman Arkadagymyz Türkmenistanyň halkynyň adyndan duşuşyga gatnaşyjylary tüýs ýürekden mübärekläp, Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatyna gatnaşmaga çakylygy kabul edendikleri üçin minnetdarlygyny beýan etdi. Bu ýokary wekilçilikli forumyň çäklerinde Merkezi Aziýa döwletleriniň Baştutanlarynyň duşuşygyny geçirmegiň teklip edilendigini aýdyp, türkmen halkynyň Milli Lideri bu başlangyjy goldandyklary üçin tüýs ýürekden hoşallygyny bildirdi. Munuň özi biziň pikirlerimiziň umumydygyny, raýdaşlygymyzy, doganlyk ýurtlaryň ýolbaşçylarynyň jogapkärçiligini, olaryň ösüşiň uly wezipelerini çözmekde ysnyşykly hyzmatdaşlyga taýýardygyny görkezýär. Şunuň bilen baglylykda, häzirki wagtda goňşy döwletleriň hyzmatdaşlygynyň okgunly ösýändigini, munuň bolsa köptaraply gatnaşyklaryň täze usullaryny gözlemegiň we döretmegiň zerurdygyny şertlendirýändigi nygtaldy.
Merkezi Aziýa döwletleriniň Baştutanlarynyň konsultatiw duşuşyklary şolaryň biridir. Häzirki wagtda şu duşuşyklar sebitiň her bir ýurdunda yzygiderli geçirilýär. Tejribeler konsultatiw duşuşyklary geçirmek başlangyjynyň örän zerurdygyny, derwaýys wezipeleri çözmekde hyzmatdaşlygyň ruhuna laýyk gelýändigini görkezdi. “Bu gün onuň diňe bir syýasy dialogyň sebitleýin formaty bolmak bilen çäklenmän, eýsem, halkara ähmiýetli çäredigini ynamly aýtmak bolar” diýip, Türkmenistanyň Halk Maslahatynyň Başlygy belledi. Şeýle duşuşyklar Merkezi Aziýada döwletara gatnaşyklaryň möhüm bölegi bolup, şol bir wagtyň özünde goňşy ýurtlar bilen gatnaşyklary pugtalandyrmaga, sebitara hyzmatdaşlygyň nusgalaryny kemala getirmäge oňyn täsir edýär, köp babatda yklym derejesinde özara bähbitli gatnaşyklary ösdürmek üçin şertleri üpjün edýär. Konsultatiw duşuşyklarda kabul edilen çözgütleriň esasynda netijeli umumy syýasy dialog ýola goýuldy. Sebit we ählumumy howpsuzlygy üpjün etmek üçin ulgamlaýyn işler alnyp barylýar, halkara düzümlerde tagallalary utgaşdyrmak kämilleşdirilýär, sebit we halkara gün tertibiniň möhüm meseleleri boýunça maslahat beriş, pikir alyşmak tejribesi ornaşdyrylýar.
“Häzirki wagtda ýurtlarymyzyň arasyndaky özara düşünişmek we ynanyşmak ýokary derejä çykaryldy. Şunuň netijesinde biz öz öňümizde uzak möhletleýin döwür üçin bilelikdäki wajyp we anyk wezipeleri goýup, iri taslamalaryň başyny başlap, özara gatnaşyklaryň strategik ugurlaryny kesgitläp bilýäris” diýip, Gahryman Arkadagymyz aýtdy hem-de munuň diňe bir alty döwletiň durmuş-ykdysady ösüşine kuwwatly itergi bermek bilen çäklenmän, eýsem, sebit proseslerine-de örän netijeli täsir etjekdigine, Merkezi Aziýanyň, goňşy döwletleriň we Azerbaýjanyň dünýä hojalyk gatnaşyklaryna çalt ýakynlaşmagyna, uly maýa goýumlary, täze tehnologiýalary, bilimleri çekmäge ýardam etjekdigine ynam bildirdi. “Biziň gatnaşyklarymyzy döwrebap ýörelgelerde guramak bilen, umumy ösüş binýadyna daýanýandygymyzy, köpasyrlyk oňyn tejribäni ulanyp, taryhy dowamatlylygy, döwletlerimiziň häzirki geosyýasy we ykdysady ýagdaýlardaky ornunyň dikeldilmegini üpjün edýändigimizi aýratyn nygtamak gerek” diýip, Türkmenistanyň Halk Maslahatynyň Başlygy belledi.
“Ykdysady hyzmatdaşlygy yzygiderli we maksada okgunly pugtalandyrmak şu formatyň hyzmatdaşlygynyň ileri tutulýan ugry bolup durýar. Bu babatda geljegiň örän uludygyny, kuwwatlyklaryň birleşdirilmeginiň, umumy serişdeler, geografik, önümçilik, tehnologik mümkinçilikleriň ulanylmagynyň diňe bir milli ykdysadyýetleriň ösmegine ýardam etmek bilen çäklenmän, eýsem, Ýewraziýada tutuş geoykdysady arhitektura düýbünden täze many-mazmun we häsiýet bermäge ýardam etjekdigini aýtsak, hakykatdan daş düşdügimiz bolmaz. Häzirki wagtda ykdysadyýet hem-de onuň strategik pudaklary — energetika we ulag biziň işimiziň ileri tutulýan ugry bolup durýar. Energetika ulgamynda uly üstünlikler gazanyldy. Döwletlerimiziň çäkleri arkaly energiýa serişdeleriniň uly möçberi iberilýär. Ýurtlarymyzyň her biri olaryň möçberini artdyrmak, täze bazarlara çykmak babatda tagalla edýär. Merkezi Aziýa döwletleri we Azerbaýjan ägirt uly serişdeler binýadyna eýedir, energiýanyň dürli görnüşlerini çykarmak hem-de işläp taýýarlamak boýunça yklymda öňdäki orunlary eýeleýärler, geografik taýdan amatly ýerleşýändigini nazara almak bilen, eksporta ibermegiň infrastrukturasyny ösdürýärler. Biz energiýa akymlaryny diwersifikasiýalaşdyrmaga, olaryň howpsuzlygyny, ygtybarlylygyny üpjün etmäge esaslanýan umumy garaýyşlardan, ýörelgelerden ugur alýarys. Bu babatda bilelikdäki giň gerimli taslamalary amala aşyrmak, döwrebap üstaşyr infrastrukturany gurmak üçin öz artykmaçlyklarymyzy we mümkinçiliklerimizi birleşdirmek möhüm bolup durýar” diýip, Milli Liderimiz aýtdy.
Hormatly Arkadagymyzyň nygtaýşy ýaly, ýurtlarymyz yklymda tebigy giňişligi emele getirýär. Munuň özi ygtybarly we durnukly ulag geçelgeleri arkaly Aziýany hem-de Ýewropany birleşdirmäge ýardam etmelidir. Biz Merkezi Aziýany, Hazar deňzi zolagyny Gündogar — Günbatar we Demirgazyk — Günorta ugurlary boýunça kuwwatly kontinental üstaşyr-logistika merkezine öwürmek, şeýlelikde, döwrebap ýörelgeler esasynda Beýik Ýüpek ýolunyň dikeldilmegini üpjün etmek üçin uly mümkinçilikleriň bardygyna düşünýäris. Şunuň bilen baglylykda, BMG-niň Deňze çykalgasy bolmadyk ösüp barýan döwletler boýunça şu maslahaty hem-de kabul edilmegi göz öňünde tutulýan çözgütler, biziň şu günki duşuşygymyz geljekki bilelikdäki hereketlerimizi meýilleşdirmek babatda möhüm ähmiýete eýe bolar. Bellenilişi ýaly, munuň özi ekologiýa, howa bilen bagly meselelere hem gönüden-göni degişlidir. Türkmenistan häzirki ekologik wehimlere garşy durmak babatda Merkezi Aziýa döwletleriniň we Azerbaýjanyň tagallalarynyň birleşdirilmegi ugrunda çykyş edýär. Şunda Hazar deňziniň suwunyň çekilmegi, çölleşme, Aral meselesi, buzluklaryň eremegi ýaly wehimlere garşy göreşmek, suw serişdelerini rejeli ulanmak, tebigy landşafty aýawly saklamak, täsin ösümlik we haýwanat dünýäsini goramak örän derwaýys wezipeleriň hatarynda durýar.
“Pes uglerodly önümçilikleri ösdürmek, atmosfera zyňyndylary azaltmak boýunça çäreleri amala aşyrmaga gönükdirilen ädimleriň utgaşdyrylmagy hem örän wajypdyr” diýip, türkmen halkynyň Milli Lideri aýtdy we bu wezipeleri çözmekde Merkezi Aziýa döwletleriniň, şeýle-de Azerbaýjanyň hyzmatdaşlygynyň hem-de özara goldawynyň 2030-njy ýyla çenli durnukly ösüş ulgamynda ählumumy Gün tertibinde kesgitlenen maksatlara ýetmekde saldamly goşant boljakdygyna ynam bildirdi. “Biziň doganlyk halklarymyzyň arasyndaky köpugurly gatnaşyklaryň pugtalandyrylmagy wajypdyr. Häzirki wagtda, dünýäde bolup geçýän çylşyrymly ýagdaýlar bilen baglylykda, bu wezipe aýratyn derwaýyslyga eýe bolýar, olar boýunça ylalaşykly çemeleşmeleri işläp taýýarlamagy talap edýär. Biziň bilelikde diňe bir öz ösüşimiziň bähbidine däl, eýsem, tutuş dünýäniň bähbitleri üçin hem bu wezipäni mynasyp, netijeli çözüp bilmäge ukyplydygymyza ynanýaryn” diýip, Gahryman Arkadagymyz aýratyn nygtady.
“Bu ynam umumy köpasyrlyk tejribä, ruhy-ahlak gymmatlyklarynyň berkligine, mizemezligine esaslanýar. Sözüň doly manysynda, biziň halklarymyz bitewüdir. Biz bir bitewi siwilizasion giňişligi emele getirýäris, şol bir gymmatlyklara eýerýäris, beýik ata-babalarymyzyň taryhy mirasyna daýanýarys. Olar bize doganlygyň, hoşniýetli goňşuçylygyň, jebisligiň ynsanperwer ýörelgelerini miras galdyrdylar. Olara eýermek bolsa döwletlerimiz üçin hemmetaraplaýyn ösüşiň we öňegidişligiň giň gözýetimlerini açýar” diýip, Türkmenistanyň Halk Maslahatynyň Başlygy sözüniň üstüni ýetirdi. Häzirki wagtda bu mirasy aýawly saklamak we artdyrmak, halklarymyzyň arasynda özara düşünişmegi, dostlugy pugtalandyrmak örän möhümdir. Şunda medeni-ynsanperwer gatnaşyklar, döredijilik-ylmy intelligensiýanyň wekilleriniň, ýaşlaryň duşuşyklary aýratyn orun eýelemelidir. Olar giň we yzygiderli häsiýete eýe bolmalydyr. Şeýle gatnaşyklaryň döwlet tarapyndan goldanylmagy geljege goşantdyr, dowamatlylygyň hem-de häzirki wagtda bilelikdäki tagallalarymyz, şol sanda şu duşuşygyň barşynda edýän tagallalarymyz bilen has-da pugtalanýan däp-dessurlarymyzyň dowamydyr.
“Biz ýurtlarymyzyň arasyndaky gatnaşyklaryň ýokary derejesine buýsanmaga haklydyrys. Deňhukuklylyk, birek-birege hormat goýmak, açyklyk, ynanyşmak şol gatnaşyklaryň esasy häsiýetleridir. Merkezi Aziýa döwletleriniň we Azerbaýjanyň hyzmatdaşlygy sebit howpsuzlygynyň strategik şerti, durnukly ösüşiň, Ýewraziýada hem-de tutuş dünýäde bähbitleriň deňagramlylygynyň möhüm bölegi hökmünde çykyş edýär diýip, türkmen halkynyň Milli Lideri aýtdy we mundan beýläk-de bilelikde işlemek üçin özara gatnaşyklaryň ägirt uly kuwwatynyň, giň ugurlaryň bardygyna ynam bildirdi.
“Şu ýylyň noýabr aýynyň ortalarynda Daşkentde Merkezi Aziýa döwletleriniň Baştutanlarynyň nobatdaky konsultatiw duşuşygy geçiriler. Bu duşuşygyň ýokary many-mazmun we guramaçylyk derejesinde geçiriljekdigine, wajyp çözgütlere beslenjekdigine şübhelenmeýärin. Şu günki mejlisimiz bolsa, gürrüňsiz, şol konsultatiw duşuşyga taýýarlyk görmekde möhüm tapgyr bolup durýar” diýip, Gahryman Arkadagymyz aýtdy hem-de döwlet Baştutanlary tarapyndan kabul ediljek çözgütleriň hyzmatdaşlygyň ygtybarly syýasy-hukuk binýadyny pugtalandyrjakdygyna, ýurtlarymyzyň we halklarymyzyň rowaçlygyny üpjün etmäge gönükdirilen ähmiýetli maksatnamalaryň hem-de taslamalaryň durmuşa geçirilmegine ýardam etjekdigine ynam bildirdi.
Sözüniň ahyrynda Türkmenistanyň Halk Maslahatynyň Başlygy Gurbanguly Berdimuhamedow şu duşuşyga gatnaşýandyklary, netijeli we döredijilikli bilelikdäki işe taýýardyklary üçin hemmelere ýene-de bir gezek minnetdarlyk bildirdi. Türkmen halkynyň Milli Lideri çykyşyny tamamlap, Özbegistan Respublikasynyň Prezidenti Şawkat Mirziýoýewi “Hyzmatdaşlygy ösdürmäge goşandy üçin” ordeni bilen sylaglamak barada karara gelnendigini aýtdy we Türkmenistanyň Prezidentiniň degişli Permanyny okady.
Soňra Özbegistan Respublikasynyň Prezidenti Şawkat Mirziýoýewi Türkmenistanyň döwlet sylagy bilen sylaglamak dabarasy boldy. Özbegistanyň Baştutany bu ýokary sylaga dostluk we hoşniýetli goňşuçylyk gatnaşyklaryny, hyzmatdaşlygy ösdürmekde, sebitde parahatçylygy we howpsuzlygy pugtalandyrmakda, Merkezi Aziýa ýurtlarynyň bilelikdäki bähbitlerini, başlangyçlaryny halkara bileleşikde ilerletmekde bitiren uly hyzmatlary üçin mynasyp boldy.
Prezident Şawkat Mirziýoýew ýygnananlara ýüzlenip, her bir adamyň durmuşynda şanly günleriň bolýandygyny we şu günüň özi üçin hut şeýle şanly wakadygyny aýtdy. Özbek Lideri, ilki bilen, Türkmenistanyň Halk Maslahatynyň Başlygy Gurbanguly Berdimuhamedowa hem-de hormatly Prezidentimiz Serdar Berdimuhamedowa we ähli türkmen halkyna ýokary döwlet sylagy — “Hyzmatdaşlygy ösdürmäge goşandy üçin” ordeni bilen sylaglanandygy üçin tüýs ýürekden hoşallyk bildirdi. Ol öz kärdeşleriniň, resmi wekiliýetleriň agzalarynyň gatnaşmagynda Birleşen Milletler Guramasynyň wekilçilikli maslahatynyň Türkmenistanda geçirilýän günlerinde bu ýokary sylagy Gahryman Arkadagymyzyň elinden kabul etmegiň özi üçin uly hormatdygyny aýdyp, bu sylagy Özbegistana we onuň köpmilletli halkyna aýratyn hormat-sarpanyň, tutuş Merkezi Aziýa sebitinde dostlugy, hoşniýetli goňşuçylygy, özara ynanyşmagy, hyzmatdaşlygy pugtalandyrmak boýunça umumy tagallalaryň ykrar edilmeginiň nyşany hökmünde kabul edýändigini belledi.
Dostlukly döwletiň Baştutany 2017-nji ýylyň martynda Özbegistanyň Prezidenti hökmünde öz ilkinji saparyny ýurdumyza amala aşyrandygyny, şonda Milli Liderimiziň hyzmatdaşlygy işjeňleşdirmegiň täze strategiýasyny teklip edendigini nygtady. Bu strategiýa bolsa baý taryhy tejribä, dost-doganlygyň, hoşniýetli goňşuçylygyň we özara hormat goýmagyň däplerine, köpugurly özbek-türkmen gatnaşyklarynyň ägirt uly mümkinçilikleriniň bardygyna esaslanýar. “Häzirki wagtda Özbegistanyň we Türkmenistanyň döwletara gatnaşyklary hil taýdan ýokary derejä çykaryldy. Geçen ýyllaryň dowamynda möhüm ykdysady, ynsanperwer taslamalar durmuşa geçirildi, özara söwdanyň möçberi artdy” diýip, Özbegistanyň Prezidenti belledi. Ol ýurtlarymyzyň arasyndaky doganlyk gatnaşyklaryň has-da berkidilendigini aýdyp, Gahryman Arkadagymyzyň hem-de beýleki ähli kärdeşleriniň Merkezi Aziýada hyzmatdaşlygy ilerletmekdäki goşandyny aýratyn nygtady. “Häzirki wagtda tutuş dünýä bileleşigi sebit hyzmatdaşlygynyň täze nusgasyny döretmekdäki umumy üstünligi ykrar edýär. Munuň özi biziň doganlyk ýurtlarymyzyň ählisiniň ägirt uly üstünligidir” diýip, Özbegistanyň Lideri aýtdy.
Prezident Şawkat Mirziýoýew hormatly Arkadagymyzyň türkmenleriň döredýän, halklaryň arasyndaky dostlukly gatnaşyklary ösdürýän, olary jebisleşdirýän hem-de parahatçylygy gorap saklaýan halkdygyny ençeme gezek belländigine ünsi çekdi. “BMG-niň şu günlerde geçirilýän maslahaty hem-de Halkara parahatçylyk we ynanyşmak ýylynyň çäklerinde dekabrda Aşgabatda geçiriljek sammit hem hut şeýle asylly maksatlara hyzmat eder. Biz Türkmenistanyň üstünliklerine guwanýarys” diýip, Özbegistanyň Prezidenti aýtdy we türkmen halkyny uly baýramçylyklar bilen ýene-de bir gezek gutlady.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow belent mertebeli myhmanlara ýüzlenip, olara şu günki çärä gatnaşandygy hem-de duşuşygyň netijeliligini üpjün eden işjeň çemeleşme üçin minnetdarlyk bildirip, pikir alyşmalaryň geljekde has netijeli hyzmatdaşlyk üçin oňat esas bolup hyzmat etjekdigine ynam bildirdi hem-de hemmelere üstünlikleri arzuw etdi.
Dabara tamamlanandan soňra, döwlet Baştutanlary BMG-niň Deňze çykalgasy bolmadyk ösüp barýan döwletler boýunça üçünji maslahatynyň geçirilýän ýerine ugradylar.
