Şu gün Mary welaýatynyň pagtaçy daýhanlary, ýer eýeleri hem Hormatly Prezidentimiziň 25-nji martda “Garaşsyz,baky Bitarap Türkmenistan-bedew batly at-myradyň mekany” ýylynyň gowaça ekişine başlamaklyga beren ak patasy esasynda il içinde hormatlanylýan, at – abraýly ýaşulularyň bissimillasy bilen topraga ilkinji bereket tohumlary sepildi.
Mary welaýatynda “Garaşsyz,baky Bitarap Türkmenistan-bedew batly at-myradyň mekany” diýlip atlandyrylan 2026-njy ýylyň gowaça ekişine girişilmegi mynasybetli ilki bilen welaýat häkimliginiň mejlisler jaýynda ýörite geňeş maslahaty geçirildi. Oňa welaýat häkimliginiň ýolbaşçy düzümi, welaýatyň edara – kärhanalarynyň, syýasy partiýalaryň, jemgyýetçilik guramalarynyň ýolbaşçylary, Mejlisiň deputatlary, hormatly ýaşulular, daýhan birleşikleriniň başlyklary, ussat kärendeçiler,Baýramaly Agrosenagat orta hünär okuw mekdebiniň talyp ýaşlary gatnaşdylar. Maslahatda çykyş edenler Hormatly Prezidentimiz Arkadagly Gahryman Serdarymyzyň milli ykdysadyýetimiziň esasy pudagy bolan oba hojalygyna ylmyň gazananlaryny pugta ornaşdyryp, topragyň hasyllylygyny ýokarlandyrmakda öňde goýýan gaýragoýulmasyz wezipelerini iş ýüzüne geçirmegiň meseleleri, ekerançy daýhanlary ýokary hilli tohumlar bilen üpjün etmek, gowaça ekişi möwsüminde kuwwatly, ýokary öndürijilikli oba hojalyk tehnikalaryndan, kämil gurallaryndan netijeli peýdalanyp, bu möhüm agrotehniki çäräni öz wagtynda, ýokary hilli geçirmegiň meseleleri dogrusynda işjeň pikir alyşdylar. Soňra maslahata gatnaşanlar Mary welaýat Taryhy we ülkäni öwreniş muzeýine-de gezelenç etdiler. Olar bu ýerde halkymyzyň gadymy daýhançylyk tejribesine degişli muzeý gymmatlyklaryny gyzyklanma bilen synladylar. Maslahata gatnaşanlar soňra welaýat boýunça gowaça ekişine girişilýän ýer bolan Mary etrabynyň “Zarpçy” daýhan birleşiginiň ekin meýdanyna bardylar. Hormatly ýaşulular hem-de şu günki dabara gatnaşýan adamlar bu ýerde welaýatyň ussat ekerançy daýhanlaryna dünýäniň ösen döwletleriniň önüm öndürijilerinden satyn alnyp berlen kuwwatly hem ýokary öndürijilikli oba hojalyk tehnikalarynyň, gurallarynyň gözýetime çenli uzalyp gidýän hatarlaryny buýsanç bilen synladylar. Welaýatyň hormatlanýan ýaşululary kuwwatly oba hojalyk tehnikalarynyň, gurallarynyň kömegi arkaly dökün bilen gurplandyrylyp, ýokary hilli sürlüp, eliň aýasy ýaly endigan tekizlenilip, gowaça ekişine birkemsiz taýýar edilen meýdanda iň ýagşy umyt – arzuwlar bilen gowaça ekişine başlap berdiler.
Bu ýerde şu günki dabara gatnaşýanlaryň şatlyk – şowhuny bilen yzyna ýokary öndürijilikli täze ekiji gurallar tirkelen traktorlar herekete girizilýär. Şu dabaraly pursatda topraga gowaçanyň ilkinji tohumlaryny sepýän mehanizmleriň sazlaşykly çykýan sesi daýhana egsilmeýän rysgal – döwlet eçilýän meýdanda özboluşly zähmet mukamy bolup ýaňlanýar. Kuwwatly hem ýokary öndürijilikli oba hojalyk tehnikalarynyň yzynda göýä topraga salnan nagyş kimin ilkinji göni hatarlar emele gelýär. Mary welaýatynyň pagtaçy daýhanlary “Garaşsyz,baky Bitarap Türkmenistan-bedew batly at-myradyň mekany” diýlip atlandyrylan şu ýylda bir ýüz altmyş iki müň gektar meýdana gowaça ekmegi hem-de şondan üç ýüz elli dokuz müň tonna “ak altyn” hasylyny öndürmegi aýdyň maksat edinýärler. Welaýatyň pagtaçylary şu ýyl gowaçanyň welaýatyň toprak hem howa şertlerinde ýokary hasyl berýän kesellere durnukly orta süýümli “Ýolöten – 7”, “Ýolöten – 39”, inçe süýümli “Ýolöten – 14”, şeýle hem täze önümçilige girizilen sortlaryny ekmekligi meýilleşdirýärler. Munuň üçin welaýatyň Sakarçäge etrabyndaky ýylda kyrk müň tonna tohumlyk pagtany gaýtadan işleýän kärhanasynda gowaçanyň ýokary arkaly tohumlyk çigitleri taýýar edildi. Welaýatda daýhanlar üçin iň bir gyzgalaňly döwür bolan gowaça ekişini agrotehniki möhletde geçirmek üçin kämil tehnologiýaly ekiji gurallaryň ýeterlik möçberi taýýar edildi. ”Maryobahyzmat” önümçilik birleşiginiň welaýatyň etraplaryndaky “Obahyzmat” önümçilik tehniki hyzmat ediş kärhanalarynda ekiş tehnikalaryna iş üstünde hyzmat etmek üçin göçme toparlar döredildi. Dabarada oba hojalyk hünärmenleriniň, Agrar partiýanyň Mary welaýat komitetiniň işgärleriniň, Baýramaly Agrosenagat orta hünär okuw mekdebiniň talyp ýaşlarynyň gatnaşmaklarynda geçirilen tejribe – okuw maslahatynda gowaça ekişinde, gowaçalaryň hatar aralaryny bejermekde, ekinleri dökünler bilen iýmitlendirmekde ulanylýan kämil tehnologiýaly gurallar, olaryň sanly ulgam arkaly dolandyrylyşy dogrusynda giňişleýin düşünje berildi. Dabaranyň geçýän ýerinde gurnalan bezemen sahnada welaýatyň medeniýet, sungat ussatlarynyň çykyşlaryna-da giň orun berildi. Welaýatyň Kemine adyndaky döwlet drama teatrynyň artistleriniň, şeýle hem saýlama aýdym – saz, tans, folklor, bagşylar toparlarynyň joşgunly çykyşlary daş – töwerege ýaň salyp, şu günki dabara gatnaşanlar tarapyndan gyzgyn garşy alyndy. Hormatly Prezidentimiz Arkadagly Gahryman Serdarymyzyň ýurdumyzy gülledip ösdürip, Watanymyzy ösüşleriň täze belentliklerine çykarmakda alyp barýan belent tutumly, rowaç işlerini, toprakdan dür öndürýän daýhanyň päk zähmetini, ajaýyp bahar tebigatymyzy, “Garaşsyz,baky Bitarap Türkmenistan-bedew batly at-myradyň mekany” ýylymyzy wasp edip joşgunly ýerine ýetirilen aýdym – sazlar, tanslar şu sogaply günde gowaça ekişine girişýän welaýatyň pagtaçy daýhanlaryna ruhy lezzet berdi. Bu ýerde welaýatyň meşhur estrada aýdymçylarynyň,ussat bagşylarynyň her biriniň ýerine ýetiren joşgunly aýdym- sazlarynda olaryň ýerine ýetirijilik ussatlygy,zehin-ukyplary bütin aýdyňlygy bilen ýüze çykdy. Medeniýet hem sungat wekilleriniň özboluşly zähmet baýramçylygyna öwrülen gowaça ekişi mynasybetli ýörite taýýarlanan medeni çykyşy şu günki çäräniň şatlyk – şowhunyny has-da artdyryp, dabara gatnaşýanlarda egsilmeýän ruhy galkynyşy emele getirdi.Welaýatyň belli tansçylar toparlarynyň ýerine ýetiren joşgunly tanslary dabara gatnaşýanlaryň göwün guşuny ganatlandyryp,olara egsilmeýän ruhy lezzet berdi.
Gowaça ekişiniň başlanmagy mynasybetli geçirilen dabarada Mary welaýat Polisiýa müdirliginiň Ýangyn howpsuzlygy bölüminiň hem-de Ýol gözegçiligi gullugynyň işgärleri mehanizatorlaryň arasynda ýangyn howpsuzlygynyň hem-de ýol hereketiniň düzgünlerini berjaý etmek dogrusynda düşündiriş, wagyz – nesihat çäresini geçirdiler. Bu ýerde welaýatyň oba hojalyk önümlerini gaýtadan işleýän kärhanalarynyň öz bereketli topragymyzda welaýatyň gallaçy daýhanlarynyň päk zähmeti bilen ösdürilip ýetişdirilen ak bugdaý hasylyndan öndüren dürli azyk, çörek we çörek önümleriniň, gök, bakja, miwe önümleriniň, welaýatdaky dokma kärhanalary tarapyndan öndürilip, içerki hem-de dünýä bazarynda uly islege eýe bolýan, ekologiýa taýdan arassa, ýokary hilli dokma önümleriniň, şeýle hem ösümlikleri kesellerden we mör – möjeklerden goramakda ulanylýan serişdeleriň, dökünleriň baý sergisi ýaýbaňlandyryldy. Bu sergileri synlan bagtyýar raýatlar welaýatda azyk önümleriniň, şeýle hem daşary ýurtlardan getirilýän harytlaryň ornuny tutup bilýän, bäsleşige ukyply, ýokary hilli önümleriň köpçülikleýin öndürilip, döwletimizde önüm bolçulygynyň döredilendigini aýratyn buýsanç bilen bellediler. Halkymyzyň asyrlardan – asyrlara aşyp gelýän gymmatly milli mirasynyň – haly we haly önümleriniň, elleri çeper gelin – gyzlaryň tiken nepis egin – eşikleriniň, amaly – haşam sungatyna degişli işleriň, şaý – sepleriň bu ýerdäki ak öýleriň daş – töwereginde gurnalan baý sergisi şu günki dabara aýratyn millilik ruhuny çaýdy. Sergidäki önümler şu günki çärä gatnaşan adamlaryň kalbynda halkymyzyň gymmatly milli mirasyna bolan guwanç hem buýsanç duýgusyny ýene bir gez artdyrdy. Şu ýerde elleri hünärli ussalaryň ekerançylyga hem-de daýhançylyga degişli ýasan iş gurallarynyň giň sergisini-de hemmeler gyzyklanma bilen synladylar. Dabarada welaýat bedenterbiýe we sport baradaky baş müdirliginiň türgenleri sport görkezme çykyşlarynam görkezdiler.Ussat türgenleriň sportuň tanap çekmek,ýaglyga towusmak,milli göreş we beýleki görnüşleri boýunça geçiren bäsleşikleri sport janköýerleri tarapyndan gyzyklanma bilen garşy alyndy.Olaryň çykyşlary welaýatda ussat türgenleriň ýetişýändigini bütin aýdyňlygy bilen görkezdi. Bereketli topraga sepýän tohumyňyz müň bolsun, Mary welaýatynyň ussat pagtaçy daýhanlary!
Sapardurdy Ýaýlyýew.
