Şu gün — 6-njy awgustda «Awaza» milli syýahatçylyk zolagynda BMG-niň Deňze çykalgasy bolmadyk ösüp barýan döwletler boýunça üçünji maslahaty öz işini dowam etdirýär. Häzirki wagtda bu ýerde ulag we aragatnaşyk, sanlylaşdyrma, durnukly energetika mowzuklaryna bagyşlanan maslahatlaryň birbada üçüsi, şeýle hem Günorta-Günorta hyzmatdaşlygy boýunça ministrler duşuşygy hem-de Ýaşlar forumy geçirilýär. Maslahatlaryň mejlislerinde gatnaşyjy ýurtlaryň ýokary derejeli wekilleri deňze çykalgasy bolmadyk ösüp barýan ýurtlar babatda forumyň gün tertibine girizilen derwaýys meseleleri ara alyp maslahatlaşýarlar.
«Tegelek stoluň» başyndaky maslahatlar
Günüň birinji ýarymynda geçirilen ýokary derejedäki «tegelek stoluň» başyndaky maslahatda deňze çykalgasy bolmadyk ösüp barýan ýurtlar üçin söwdanyň mümkinçiliklerini giňeltmek, söwda amallaryny ýönekeýleşdirmek we sebitleýin integrasiýany goldamak mowzugyna bagyşlandy. Onda degişli döwletleriň bütindünýä söwdasynda eýeleýän orny we ony ýokarlandyrmak, üstaşyr geçelgeler we söwda ýollary üçin edilýän harajatlar bilen bagly meseleler ara alnyp maslahatlaşyldy. Bu ugurdaky çözgütler hökmünde söwda amallaryny ýeňilleşdirmek boýunça ylalaşyklaryň, sanly we elektron söwdanyň ornuna üns çekildi.
Günüň ikinji ýarymynda meýilleşdirilen ýokary derejedäki «tegelek stoluň» başyndaky maslahat howanyň üýtgemeginiň, tebigy betbagtçylyklaryň ýaramaz netijelerine garşy göreşmek we uýgunlaşmak bilen bagly mowzugy bagyşlanýar. Maslahatda howanyň üýtgemeniň ýaramaz netijelerine garşy göreşmegi maliýeleşdirmek, öňünden habar beriş ulgamlaryna elýeterliligi giňeltmek, şeýle hem töwekgelçiligi azaltmak strategiýalaryny ornaşdyrmak wezipeleri, şeýle hem howanyň üýtgemeginiň netijelerine garşy uýgunlaşmagy maliýeleşdirmek we gaýtadan dikeldilýän energiýa taslamalaryny durmuşa geçirmek boýunça halkara goldawyny bermegiň ähmiýeti barada pikir alşylýar.
Günorta-Günorta hyzmatdaşlygy boýunça ministrler duşuşygy
Günorta-Günorta hyzmatdaşlygy boýunça ministrler duşuşygy — ösüp barýan ýurtlaryň ikisiniň ýa-da üçüsiniň arasynda özara tejribe alyşmak, bilimlerini, serişdelerini we tehniki nou-haularyny paýlaşmak, şeýle hem sebit we sebitara derejesindäki hyzmatdaşlyk arkaly ösüş gazanmaga gönükdirilen meýdança bolup durýar. Şu günki duşuşyk «Deňze çykalgasy bolmadyk ösüp barýan ýurtlaryň durnukly, durmuşa ukyply we üýtgeýän ösüşini üpjün etmek üçin Günorta-Günorta hyzmatdaşlygynyň mümkinçiliklerini açmak» mowzugynda geçirilýär. Duşuşyga gatnaşyjylar deňze çykalgasy bolmadyk ösüp barýan ýurtlara kömek bermek üçin Günorta-Günorta hyzmatdaşlygyny has-da ilerletmegiň we onuň mümkinçiliklerinidir ýollaryny ara alyp maslahatlaşýarlar.
Ýaşlar forumynyň nobatdaky güni
Ýaşlar forumynda «Ýaşlar syýasaty iş ýüzünde: Deňze çykalgasy bolmadyk ýurtlar üçin sebitleýin liderligi we strategik maýa goýumlary güýçlendirmek» atly ýaşlar syýasaty bilen baglanyşykly ugurdaş çäre, «Deňze çykalgasy bolmadyk ösüp barýan ýurtlaryň geljegi üçin parahatçylyk we ynanyşmak köprülerini döretmek», «Deňze çykalgasy bolmadyk ösüp barýan ýurtlar üçin strategik serişde hökmünde demografik diwidend» diýen mowzuklar boýunça nesilleriň arasyndaky tematiki dialoglar geçirilýär.
***
Şeýle hem günüň dowamynda köpçülikleýin habar beriş serişdeleriniň wekilleri üçin brifinglerdir metbugat maslahatlary yzygiderli guralýar. Şeýle çäreler forumyň esasy hem-de ugurdaş çäreleri barada maglumat almaga, BMG-niň, Türkmenistanyň we beýleki döwletleriň ýokary derejeli wekilleri bilen sowal-jogap alyşmaga mümkinçilik döredilýär.
«Watan» gazeti.
