Gadym döwürlerde bir ýaş ýigit ýaşapdyr. Ata-enesi oňa ýaşlykdan tüýdük çalmagy öwredipdir. Oba adamlary: “Mundanam kär bolarmy, ussaçylyk öwrenen bolsa, has gowy bolmazmydy” diýip, geň görüpdirler. Ýaş ýigit obanyň geçilerini bakýar eken. Bir gün ol geçilerini bakyp ýörkä, irkilipdir, düýşünde owadan köşk görüpdir. Köşgüň ortasynda görmegeý gyz otyr diýýär. Ýaş ýigit tisginip oýanýar, görse düýşi. Ol tukat bolup sürüsini alyp öýlerine gaýdýar. Ata-enesi onuň tukatlygyny görüp:  — Oglum, näme boldy? — diýip sorapdyrlar. Oglan düýşüni gürrüň berýär we ata-enesine şol köşgüň gözlegine gitjekdigini aýdýar. Ata-enesi: — Ýeri, gitseň sag gidip, aman gel, oglum! — diýşip, ak pata berýärler. Ýaş ýigit kerwene goşulyp, uzak ýola rowana bolýar. Bular az ýöräp, köp ýöräp barýarkalar çölüň içinde ýigidiň owadan köşge gözi düşýär. Ol kerwenbaşydan rugsat sorap, kerwenden galýar. Çünki, bu köşk düýşünde gören köşgüdi. Ýigit köşge tarap ugraýar. Ol köşge girýär, hakykatdan-da, köşgüň ortasynda owadan gyz iki sany kenizi bilen otyr ekeni. Ýigit olaryň ýanlaryna baryp, salam berýär. Emma şa gyzyndan ses çykmaýar. Kenizleriniň biri gyzyň gepläp bilmeýändigini, Kap dagynyň depesinde ösýän bir gülüň dänesini gaýnadyp içirseň geplejekdigini aýdýar. Ýaş ýigit ony alyp gelmäge gitjekdigini aýdanda kenizleriň biri:  — Wah, ol iş kyndyr, ol güli bir aždarha gorap saklaýar. Senden ozalam ony getirmäge synanyşyp janyny gurban eden ýigitler köp, gury gideniň bolar — diýýär. Ýigit şonda-da özüniň synanyşyp görjekdigini aýdyp, ýola düşýär. Ýigit diýilýän ýere barýar, görse äpet aždarha güli goraglap ýatyr ekeni. Ýigit ilki näme etjegini bilmän durýar. Birdenem, tüýdügi ýadyna düşüp, ony eline alýar-da şirin sazlardan çalyp başlaýar. Ýigidiň sazyna aždarha maýyl bolup, ýanyna gelýär. Aždarha: — Eý, ýaş ýigit, sen tüýdügi juda ökde çalýar ekeniň. Men henize çenli şeýle mylaýym owazly heň diňlemändim — diýip, ýigidi magtapdyr. Onsoň ol ýigitden näme üçin gelendigini soraýar. Ýigit başyndan geçirenlerini gürrüň berýär. Aždarha: — Eger, meniň ogluma-da, saz çalmagy öwretseň, şol güli bererin — diýýär. Ýigit razy bolýar we aždarhanyň ogluna saz çalmagy öwredýär, aždarha ýigide dermanlyk ösümligi, ýany bilenem heniz görülmedik altyn-kümüş berýär.  Ýigit aždarha bilen hoşlaşyp yzyna, şa gyzynyň ýanyna gelýär, dermanlyk ösümligiň dänelerini gaýnadyp gyza içirýär. Şa gyzy uka gidýär. Ukudan oýananyndan soňra, ol gepläp başlaýar. Muňa köşkdäkiler, diýseň, begenýärler. Dermanlyk ota üzärlik diýip at goýýarlar.  Şa gyzynyň kakasynyň bolsa, öň söz edenem bolsa, gyzyny pukara ýigide beresi gelmeýär. “Ýigide salgyt salsam güýji ýetmän yzyna gider” diýip, öz ýanyndan pikir edýär. Onsoň nökerlerine ýigidi getirmegi buýurýar. Nökerler ýigidi şanyň huzuryna getirýärler. Şa:  — Eý, ýigit, sen maňa uly ýagşylyk etdiň, ýöne şonda-da gyzymyň süýt hakyny bermeli bolarsyň — diýýär. — Bolýar, şahym! Näme getir diýseňiz getirip bererin.  — Sen gyzyma süýt haky hökmünde pylança altyndyr kümüş getirseň bolýar — diýýär. Içindenem: “Oglanjyk, ümsüm öýüňe gidersiň” diýip gülümsiräp seredýär. Ýigit şanyň ýanyndan gaýdyp, hälki aždarhanyň altyn-kümüşlerinden geregini alyp, ýene-de köşge dolanýar-da: — Ine, şahym, siziň diýen zatlaryňyz — diýen. Şa gyzyny ýigide bialaç bermeli bolýar. Ýigit şa gyzyny alyp yzyna — ata-enesiniň ýanyna dolanyp gelýär. Ata-enesi muňa örän şat bolup, uludan toý tutup, ulus-il bilen şatlyklaryny paýlaşýarlar.  Taýýarlan  Şatlyk JEPBAROW.

Sen meniň mydarym, Baýlygym, Barym. Ençe aýdyr senden habar ýok, ýarym. Azaldy umydym, Gaçdy kararym! Ara daş bolsa-da, Özüň daşlaşma! Söwer ýarym, söýgi bilen hoşlaşma!   Doýan ýokdur söwer ýardan, Söýgüden, Gutar meni bu hasratly gaýgydan. Synamyzda söýgi ody sönmesin! Ara daş bolsa-da, Özüň daşlaşma! Söwer ýarym, söýgi bilen hoşlaşma!   Aňsat däldir tapmak ýürek taýyny, Aşyk gözlär öz nurana Aýyny. Arman edäýmäli ýeneki bir gün... Ara daş bolsa-da Özüň daşlaşma! Söwer ýarym, söýgi bilen hoşlaşma!     Ata ATAJANOW. Türkmenistanyň halk ýazyjysy.

1 .Garyplyk gelmänkä, baýlygyň gadyryny bilmeli. 2. Kesel gelmänkä, saglygyň gadyryny bilmeli. 3 .Başagaýlyk gelmänkä, boş wagtyň gadyryny bilmeli (wagty biderek geçirmeli däl). 4. Garrylyk gelmänkä, ýaşlygyň gadyryny bilmeli. 5. Ölüm gelmänka, ömrüň gadyryny bilmeli. Görşümiz ýaly, ýaşuly nesillerimiziň aýdyp geçmedik zady ýok. Bize şolardan diňe ugur alyp, şol wesýetleri doly we dogry ýerine ýetiräýmek galýar.  Ýokarda agzalan bäş zadyň gadyryny bilmeseňiz, pursady eliňizden giderersiňiz. Toplan  Amanmyrat ÝAMADOW.

Hormatly Prezidentimiziň baştutanlygynda Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasy we ony amala aşyrmak boýunça ýerine ýetirilmeli çäreleriň meýilnamasy tassyklanylyp, bu babatynda degişli işler dowamly durmuşa geçirilýär. Bilim işgärleri üçin döredilýän şeýle giň mümkinçiliklerden peýdalanyp, biziň Ýolöten etrabyndaky “Nowça” atly 10-njy çagalar bakja-bagymyzda körpeleriň aň-düşünjeli, edep-terbiýeli, bilimli bolmagy üçin ençeme işler alnyp barylýar.  Körpelere okatmagyň täze usullaryndan ugur alnyp, şeýle hem dürli görkezme esbaplaryndan peýdalanylyp döwrebap bilim berilýär. Çaganyň aňyna çalt täsir etmek maksady bilen olar dürli oýunlaryň üsti bilen sapak geçýärler. Ýurdumyzdaky her bir geçirilýän baýramçylyklarda bolsa, terbiýeçilerimiz körpeleriň gatnaşmagynda baýramçylyk çärelerini yzygiderli guraýarlar. Olaryň irginsiz yhlasy bilen çagalarymyz etrap, welaýat derejesinde geçirilýän bäsleşiklerde baýrakly orunlary eýelemegi başarýarlar. Çagalar bakja-bagymyzyň abraýyny ýokarlandyrmakda janaýaman zähmet çekýän terbiýeçileriň arasyndan Orazgül Geldekowanyň, Sona Şaýymowanyň, Gunça Orazberdiýewanyň, Gülälek Hojagulyýewanyň, Jemal Jumaýewanyň atlaryny uly buýsanç bilen aýtmak bolýar. Ogulsona JUMAGELDIÝEWA.

Türkmeniň sähra giňişligini düýedir sygyrsyz, goýundyr geçisiz göz öňüne getirmek asla mümkin däl. Halkymyz maldarçylygy özüniň ýaşaýyş hajatlaryny üpjün edýän kesp-käri hasaplapdyr. Türkmen hojalygynyň esasy pudagy bolan maldarçylykda et önümlerini öndürmek bilen bir hatarda, mallardan alynýan süýdi yrýa etmän, ondan köp görnüşli süýt önümleri taýýarlanylýar. Süýt önümlerini taýýarlamak işi bilen esasan enelerimiz meşgullanypdyrlar. Enelerimiziň taýýarlan şol süýt önümleri uzak wagtlap zaýalanman saklanypdyr. Geň görmeli ýeri, süýt önümleri taýýarlanylanda hiç hili elektrik enjamy ýa-da himiki garyndy ulanylmandyr. Onda diňe ýerli iş usullaryndan peýdalanylypdyr. Süzme, peýnir, sargan, deleme, düýe çaly, eprik, motal ýaly, süýt önümlerini taýýarlamak üçin, ilkinji nobatda, gönezlik zerur bolupdyr. Gönezligi enelerimiz özboluşly aýratyn usul bilen taýýarlapdyrlar. Onuň taýýarlanylyşy halkymyzyň arasynda, umuman, birmeňzeşräk bolupdyr. Ýöne, onuň käbir tapawutlyklary hem bar. Türkmenistanyň günbatar çäklerinde ýaşaýan ilatyň arasynda peýnir üçin täze doglan guzynyň, towşanyň ýa-da keýigiň maýalygyny (kyrkgasanak) alyp, onuň içine goýnuň owuz süýdüni guýup, gönezlik taýýarlapdyrlar. Şeýle görnüşde alnan gönezligiň bir çemçesi bir bedre töweregi süýdi uýatmaga ýetipdir. Gönezlik diňe bir suwuk görnüşinde taýynlanylman, eýsem, ol gury, un görnüşinde-de taýýarlanylypdyr. Biziň welaýatymyzyň çäklerinde sarganyň gönezligi üçin üç-dört gün bolan guzynyň maýalygy alnypdyr. Onuň içine duz, zäk goşulan owuz süýdüni, üstündenem turşadylan süýdi guýup, maýalygyň gapdallaryny daňyp, asyp goýupdyrlar. Şemal çalyp duran ýerde asylan maýalygyň içindäki zatlar wagtyň geçmegi bilen gurap, gury un görnüşli gönezlige öwrülipdir. Ahal sebitlerinde peýnirlik üçin gönezlik taýýarlanylanda guzy maýalygynyň içine duz, zäk goşulan owuz süýdüni guýupdyrlar. Süýt uýandan soň onuň suwuny özüne çekmegi üçin gönezlige gawunyň çigidi hem atylypdyr. Gojaman Jeýhunyň kenaryny ýakalap oturan türkmenlerde bolsa, gönezlik taýýarlamak birneme tapawutly bolupdyr. Munuň üçin sanlyja gün bolan guzynyň maýalygyny alyp, duz atylan owuz süýdünde saklapdyrlar. Soňra maýalygyň duzuny ýuwupdyrlar. Taýýar bolan gönezligi süýdüň içinde eýläk-beýläk hereketlendirip, süýdi uýadypdyrlar. Şeýle usulda taýýarlanylan gönezlik birbada 20 litr süýdi uýatmaga mümkinçilik beripdir. Enelerimiziň hojalyk işlerine ussatlygynyň netijesinde özleriniň ýerli usullaryny peýdalanyp, süýdi uýadyp, goýaldyp taýýarlan süýt önümleri il arasynda tagamlylygy we dermanlyk häsiýetleri bilen meşhurdyr. Umuman, halkymyzda maldarçylyk hojalygynyň önümleriniň görnüşleri, olaryň taýýarlanylyşy örän gyzykly we özboluşlydyr. Enelerimiziň şeýle asylly däplerini öwrenmek, olary has-da kämilleşdirmek biziň hemmämiziň borjumyzdyr. Kümüş HUDAÝGULYÝEWA.

Zenan bolsaň, hojalygyň hysyrdysy az däl. Biş-düş, içeriniň syrym-süpürimi, kir ýuwmak ýaly gündelik işlerden başga-da, belli bir wagtdan hökman başyna baraýmaly, gaýtalanyp duran aladalar hem bar. Endige öwrülip giden bu işlere sarp bolaýjak wagt belli bolansoň, hersi üçin degerli pursat tapylýar. Ýöne bir işi — öz kitap tekjämi tertipleşdirmek işini welin hiç haçan çaklan wagtymda tamamlap bilemok. Bu ýerdäki kitaplardyr bukjalaryň barysy edil eziz joralarym, mähriban adamlarym ýaly bolup gidensoň, bir ýakynlaşsam, ýanlaryndan daşlaşyp bilemok. Şonuň üçin hem bu işiň başyna aglaba agşam naharyndan soň barýaryn...  Şeýle agşamlaryň birinde içine okuwçy gündeliklerim salnan bukjama gözüm düşdi. Tertipläp goýaýmaly welin, açman saklanyp bilmedim. Üstünden ýigrimi iki, ýigrimi üç ýyl geçen okuwçy gündeliklerimiň sahypalary saralyp başlanam bolsa, bahalar edil düýn goýlan ýalydy. Emaý bilen sahypalaryny agdaryp oturşyma, on ýyllap höwes bilen alan bahalarymy birin-birin synladym. Her bir goýlan baha, her bir çekilen gol, mugallymyň ejeme-kakama, olaryň mugallyma ugradan gysga ýazgylary göýä bir taryhy ýatlama. On ýyllap bileje okan synpdaş oglan-gyzlarymyzy ýatladyp duran hepdeler diýjekmi, eziz mugallymlarymy ýatladyp duran bahadyr gollar diýjekmi, bulary görüp oturşyma şol okuwçy ýyllaryma gaýdyp baran ýaly boldum. Bir-de ýylgyryp, bir-de gamlanyp oturşyma şu gündelikleriň şu güne gelip ýetmegine sebäp bolan bir waka ýadyma düşdi. Ikinji synpy tamamlap, çärýeklik bahalarymy ejem bilen kakama görkezenimde, uly buýsanç bilen aýdan berekellasyndan soň kakam şeýle diýipdi: — Gyzym, gündelikleriňi her okuw ýyly tamamlanandan soň ykjamlapjyk ýygnap goý. Ynha, nesip bolsa, orta mekdebi tamamlanyňdan soň on ýylky alan bahalaryňa göz aýlarsyň. Olar seniň şonça ýylky gazanjyňdyr, baýlygyňdyr, şolara seredip, seni mugallymçylyk mekdebine kabul ederler. Kakamyň bu sargydyna çaga ýüregim bilen ynanyp, bar pikirim, arzuwym, maksadym orta mekdebi diňe göreldeli bahalar bilen jemläp, gündeliklerim bilen mugallymçylyk mekdebine barmak boldy. Göräýmäge şeýle sada ýaly görünýän sargydyň manysy özüm ulaldygymça artyp barýar. Şol okuwçy döwrüm göreldeli okamaga höweslendiren, hormatly mugallymçylyk kärine ýollan sargytlar bu gün meniň üçin gymmatly ýatlamaly bukja öwrüldi.  Içimi hümledip, oýlanyp oturşyma ukudan oýanyp, ýanyma gelen 8 ýaşlyja gyzym Ülkeriň: «Eje, aý eje, doňup galdyň-a” diýen enaýyja sesine tisginip gitdim. “Wah, ýok gyzym, ynha şulary görüp, köp pikire çümäýipdirin” diýdim. Ülker elimdäki gündelikleri görüp, sorag yzyna sorag berýärdi: “Eje, seniňem gündeligiň bardymy? Senem diňe 4-5-lik bahalar alýardyňmy?” Bir soragyna jogap bermänkäm, beýleki soragyna başlaýardy. Onuň üçin ejesiniň mekdepde näçelik bahalar bilen okandygy örän gyzyklydy. Hasam ol 3-nji synpyň gündeligini içgin gyzyklanma bilen synlaýardy. Birdenem: “Eje, menem nesip bolsa 3-nji synpymam diňe gowy bahalar bilen tamamlajak. Özem gündeligimi hasam arassaja, ykjamja edip saklajak” diýip başyny galdyrdy-da: “Edil sen ýaly” diýip, enaýyja ýylgyryp goýberdi. — Nesip bolsa, gyzym! — diýip, başyny sypadym. Gündeliklerim, gör sizde näçe ýyllaryň zähmeti, höwesi, ýatlamasy, terbiýesi ýatyr...  Tekjämiziň galan işini ukudan kemsiz açylan gyzym bilen bile bitirdik. Az-owlak ýadawlygyň we ýitirilen wagtymyzyň öwezini bolsa ýakymly, näzik duýgulara gaplanan süýji ukymyz bilen doldurdyk. Sülgün GURBANOWA.

Berkarar döwletiň täze eýýamynyň Galkynyşy döwründe hormatly Prezidentimiziň ýöredýän parasatly içeri hem-de daşary syýasaty Garaşsyz, hemişelik Bitarap Türkmenistan döwletimiziň durmuş-ykdysady ösüşine giň ýol açýar. Diýarymyzyň ähli ulgamlarynda ösüşlerdir özgerişlere ýetilýär. Ýurdumyzda gurlup, ulanylmaga berilýän täze zawod-fabrikleriň ýokary hilli önümleriniň mukdary ýylsaýyn artýar. Senagat kärhanalarynda gymmatly çig mal bolan pagtadan taýýarlanylýan önümleri öndürmekde ösüşlere ýetilýär. Ýurdumyzyň pagta arassalaýjy kärhanalarynda pagta hasyly gaýtadan işlenilip, süýüm alynýar we kämil hem çylşyrymly tehnologiýalaryň kömegi bilen egirme fabriklerinde dünýä ülňülerine laýyk gelýän ýüplükleriň dürli ölçeglerdäki görnüşleri öndürilýär.  Ýüplük egriji fabrikleriň biri hem 1997-nji ýylda işe başlan Tagtabazar etrabyndaky pagta egirme kärhanasydyr. Bu ýerde ýokary hilli we dürli ölçeglerdäki ýüplükleriň taýýarlanylýandygy barada fabrigiň hünärmenleri gürrüň berdiler. — Fabrigimizde 300-den gowrak işgär bolup, olar üç çalşykda işleýärler. Bu ýerde işler 7 bölümde alnyp barylýar. Gündizki çalşykda Ahmet Seýitmyradow, Aýmyrat Arnamuhammedow, Mekan Amanow, Halmyrat Bäşimow we beýleki işçi operatorlar göreldeli işleýärler. Kärhanamyzyň baş inženeri Nurmyrat Öwezow işçileriň we hünärmenleriň höwesli işlemekleri üçin ähli tagallalary edýär. Çünki, fabrigimizde işleriň guramaçylykly alnyp barylmagy hem-de önümleriň ýokary hilli bolmagy ünsden düşürilmeýär. Işgärlerimiziň döredijilikli zähmetinden kemala gelýän ýokary hilli önümlerimize isleg barha artýar. Fabrigimizde öndürilýän önümler dürli ölçeglerde bolup, olara ata Watanymyzda, daşary ýurtlarda hem uly isleg bildirilýär — diýip, fabrigiň direktorynyň wezipesini wagtlaýyn ýerine ýetiriji Gurbanmyrat Arnamyradow gürrüň berýär. Hawa, fabrikde zähmet joşýar. Halkara parahatçylyk we ynanyşmak ýylynda fabrigiň agzybir işgärleri janaýaman zähmet çekýärler. Olaryň her biri öz iş orunlarynda berk durup, öndürilýän önümleriň ýokary hilli hem-de islegli önümler bolmagy barada yhlas edýärler.  Halkara parahatçylyk we ynanyşmak ýylynda 4270 tonna nah ýüplük taýýarlamaklygy maksat edinýän kärhananyň işgärleriniň gadamlary batly.  Çary AMANGELDIÝEW.

Berkarar döwletiň täze eýýamynyň Galkynyşy döwründe hormatly Prezidentimiziň saýasynda ýurdumyzyň ähli pudaklary bilen bir hatarda oba hojalygy uly ösüşlere eýe bolýar. Bu pudagyň ýokary depginler bilen ösmegi adamlaryň ýaşaýyş-durmuş derejesiniň, maddy hal-ýagdaýynyň has-da ýokarlanmagynda aýratyn ähmiýete eýedir. Saçaklarymyzyň rysgal-berekedi bolan gallany, “ak altyn” hasaplanýan pagtany köp öndürmek, her gektar ýeriň hasyllylygyny ýokarlandyrmak üçin suw, mineral dökünler, kuwwatly tehnikalar bilen ýeterlik üpjün edilýär. Topragyň her daban ýerini mukaddes saýýan ýer eýeleri özleri hakynda edilýän uly aladalara mynasyp jogap bermek maksady bilen tutanýerli zähmet çekýärler.  Şu günler ekerançylyk meýdanlarynda beýleki ekinler bilen birlikde gowaçalara ideg etmek işleri guramaçylykly alnyp barylýar. Ýerden saýlanyp ugran, gyradeň boý alýan göni hatarly gowaçanyň hatararasyny ýumşatmak, ýekelemek, haşal otlardan arassalamak işleri bellenilen möhletlerde geçirilýär. Gowaça ähli zerur zatlaryň wagtynda berilmegini talap edýän ekin. Bu zatlara örän oňat düşünýän pagtaçy kärendeçiler, mehanizatorlar atyzly pellerde bolup, ähli yhlasyny gününi sanap ösýän gowaçalara siňdirýärler.  Arkadagly Gahryman Serdarymyzyň tagallalary bilen üstünliklere beslenýän şu ýylymyz halkymyz üçin taryhy ýyllaryň biri bolar. Çünki dowam edýän ýylymyzda hemişelik Bitaraplygymyzyň 30 ýyllyk toýuny bellemäge giňden taýýarlyk görülýär. Bu şanly senä welaýatymyzyň oba hojalyk işgärleri hem zähmet sowgatlary bilen barmagy maksat edinýärler.  Biz hem hormatly Prezidentimiziň saýasynda Watanymyzyň gülläp ösmegi, özgermegi üçin zähmet çekmegi özlerine borç hasaplaýan oba zähmetkeşlerine uly üstünlikleri arzuw edýäris. Durdynabat BAÝRAMOWA.

Ýurdumyzda saglygy goraýyş ulgamynda alnyp barylýan işler, gazanylýan üstünlikler Gahryman Arkadagymyzyň, Arkadagly Gahryman Serdarymyzyň öz halky üçin edýän bimöçber tagallalarynyň miwesidir. Berkarar döwletiň täze eýýamynyň Galkynyşy döwründe sagdyn durmuş ýörelgesini ösdürmekde welaýat gan bankynyň işgärleri hem irginsiz zähmet çekýärler. Ganyň bejeriş häsiýetlerine öňki döwürlerde hem üns berlipdir. Gadymy döwürlerde-de gan ýaşaýyş güýjüniň çeşmesi hasaplanypdyr we onuň kömegi bilen agyr kesellerden sagalmagyň, saplanmagyň ýollary tapylypdyr. Gan bejeriş serişdesi hökmünde ulanylypdyr. Asuda ýaşaýşyň hem-de ynsan saglygynyň hatyrasyna gan tabşyrmagyň ynsanperwer manysy bar. Bedeniň kesellemeginiň, ýürek-damar keselleriniň, iýmit siňdiriş işiniň bozulmagynyň öňüni almakda, bedende ganyň öz-özünden täzeden döremeginde ganyň uly ähmiýetiniň bardygy tassyklanyldy.  “Raýatlaryň saglygyny goramak hakynda” Türkmenistanyň Kanunyna laýyklykda meýletin gan tabşyrýan her bir adam donor bolup bilýär. Türkmenistanyň Zähmet kodeksiniň 156-njy maddasy esasynda donorlara ýeňillikler kepillendirilýär. Ýagny, donorlar gan tabşyran günleri işden boşadylýar we olara goşmaça dynç güni berilýär.  Häzirki wagtda bizde ýüzlerçe işjeň donorlar bolup, olar bellenen tertipde gan tabşyrýarlar. Biziň welaýat gan bankymyzda gan we gan önümleriniň onlarça görnüşi taýýarlanylýar. Welaýat gan bankymyzyň işgärleri welaýatymyzyň saglygy goraýyş edaralaryny gan we gan önümleri bilen üpjün etmek ugrunda yhlaslaryny gaýgyrmaýarlar. Biz halkymyzyň saglygyny gorap saklamak üçin gan tabşyryp, özüne hem il-gününe kömek berýän donorlarymyza guwanýarys.  Ynsan saglygyny goramak babatynda döredýän ähli mümkinçilikleri üçin Gahryman Arkadagymyza, Arkadagly Gahryman Serdarymyza jan saglygyny, il-ýurt ähmiýetli tutumly işlerinde hemişe rowaçlyklaryň hemra bolmagyny arzuw edýäris.    Çeper ANNADURDYÝEWA.

Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda Garaşsyz, hemişelik Bitarap Türkmenistan Diýarymyzyň her bir güni parahatçylyga, asudalyga beslenýär. Her bir ynsanyň durmuşynda bolşy ýaly, halkyň, döwletiň ykbalynda hem ýatdan çykmajak pursatlar, wakalar bolup geçýär. Türkmen halkynyň gadymdan gelýän hoşniýetlilik, ynsanperwerlik häsiýetleri we däpleri döwletimiziň oňyn Bitaraplyga esaslanýan daşary syýasatynyň özeni bolup durýar. Ýurdumyzyň daşary syýasat strategiýasyny amala aşyrmakdaky uly üstünlikler, halkara hyzmatdaşlygy ösdürmekde we umumadamzat ösüşlerine dahylly meseleleriň oňyn çözgütlerini tapmakda Arkadagly Gahryman Serdarymyzyň alyp barýan syýasaty dünýä bileleşigi tarapyndan goldanylýar. Türkmenistan döwletimiz Birleşen Milletler Guramasy bilen işjeň hyzmatdaşlyk alyp barýar. 1992-nji ýylyň 2-nji martynda BMG-niň Baş Assambleýasynyň 46-njy sessiýasynyň 82-nji mejlisinde Türkmenistanyň bu Guramanyň deňhukukly agzalygyna kabul edilýändigi hakynda karar kabul edildi. Agza ýurtlaryň her biri BMG-niň Düzgünnamasynda beýan edilen, halkara gatnaşyklarynyň esasy ýörelgelerine esaslanýan şertleri öz üstüne borç edip alýar. 1995-nji ýylyň 12-nji dekabrynda BMG-niň Baş Assambleýasy 185 döwletiň, şeýle hem 2015-nji ýylyň 3-nji iýunynda BMG-niň Baş Assambleýasynyň 69-njy mejlisinde 193 döwletiň biragyzdan goldamagynda “Türkmenistanyň hemişelik Bitaraplygy” atly Rezolýusiýa ikinji gezek kabul edildi. Şonuň ýaly-da, bu seneler Milletler Bileleşiginiň taryhynda hem möhüm sahypa öwrüldi we 12-nji dekabr BMG-niň Baş Assambleýasy tarapyndan Halkara Bitaraplyk güni diýlip yglan edildi. Üstümizdäki — Halkara parahatçylyk we ynanyşmak ýylymyzyň 21-nji martynda BMG-niň Baş Assambleýasynyň 79-njy sessiýasynyň 61-nji plenar mejlisinde ýurdumyzyň başlangyjy bilen “Türkmenistanyň hemişelik Bitaraplygy” atly Kararnamanyň biragyzdan kabul edilmegi hem ýurdumyzyň bitaraplyk syýasatyna eýerýänligini ýene bir gezek subut etdi. Ata-babalarymyzyň arzuwlan Garaşsyzlyk eýýamynyň gelmegi halkymyzyň başyny göge ýetirdi, Bitaraplyk bolsa, köňül arzuwyny gülletdi. Garaşsyz, hemişelik Bitarap ýurdumyz ylalaşygyň, parahatçylygyň we halklaryň arasyndaky dostlugyň merkezine öwrüldi. Türkmenistan döwletimiz beýleki döwletler bilen dostluk, birek-biregi hormatlamak, ynanyşmak, özara ýardam bermek esasynda gatnaşyklaryny ösdürýär we köp ýurtlar bilen hyzmatdaşlyk, söwda-ykdysady gatnaşyklary saklaýar. Türkmenistanyň hemişelik Bitaraplygy sebitde halkara hyzmatdaşlygynyň we goňşuçylyk gatnaşyklarynyň ösmegine itergi berdi. Halkara parahatçylyk we ynanyşmak ýylynyň hemişelik Bitaraplyk baýramyna barýan şu ajaýyp günlerinde ýurdumyzyň ähli ulgamynda ýetilýän belent sepgitler buýsanjyňy goşalandyrýar. Garaşsyzlygymyza eýe bolalymyz bäri diňe beýik işleri bilen dabaralanyp gelýän ýurdumyzda bu gün halkymyz bir maksada, ýagny, agzybirlik maksadyna gulluk edýär. Agzybirlik bolsa bizi ajaýyp üstünliklere, ösüşlere, abraý-mertebä ýetirýär. Döwletlilik agzybirlikden başlanýar. Agzybirligiň bar ýerinde ýetilmejek menzil ýokdur. Gahryman Arkadagymyzyň, Arkadagly Gahryman Serdarymyzyň daşyna jebisleşip, parahat ýurdumyzda toý toýlamak iň uly bagt. Goý, halkymyzy bir saçaga jem eden, ähli ýurtlar bilen dost-doganlyk gatnaşyklaryny ýola goýýan Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, bähbitli işleri rowaç alsyn! Şemşat SAÝLYÝEWA.

2025-nji ýylyň 16-njy maýynda Moskwa şäherinde Türkmenistanyň hemişelik Bitaraplygynyň 30 ýyllygy mynasybetli “Döwrüň we siwilizasiýalaryň baglanyşygy” atly halkara maslahat geçirildi. Türkmenistanyň Russiýa Federasiýasyndaky Ilçihanasy tarapyndan Russiýanyň Ylymlar akademiýasynyň Gündogary öwreniş institutynyň binasynda guralan forum ylmy jemgyýetçiliginiň görnükli wekillerini, hususan-da N.N.Mikluho-Maklaý adyndaky Etnologiýa we antropologiýa institutynyň we beýleki ylmy merkezleriniň işgärlerini, bilermenleri, gündogarşynaslary, arheologlary we etnograflary bir ýere jemledi. Halkara maslahata gatnaşyjylar 2025-nji ýylda Türkmenistanyň hemişelik Bitaraplygynyň BMG tarapyndan ykrar edilmeginiň 30 ýyllygynyň baýram edilýändigini nygtadylar. Türkmen halkynyň belent ynsanperwer ýörelgelerine esaslanýan hemişelik Bitaraplygymyzyň taryhy umumadamzat gymmatlyklaryny, howpsuzlygy, durnukly ösüşi ilerletmek babatda BMG bilen hyzmatdaşlygy yzygiderli berkitmegiň we giňeltmegiň şöhratly ýoluny alamatlandyrýar. Şeýle hem türkmen halkynyň baý medeni we taryhy mirasyny, hususan-da Goňurdepäniň we Nusaýyň özboluşly arheologiki toplumlaryny öwrenmegiň we wagyz etmegiň möhümdigi bellenildi. Çykyş edenler Türkmenistanyň çäklerinde dürli arheologiki barlaglarynyň geçirilýändigi, türkmen halkynyň müňýyllyklardan gözbaş alýan taryhyna, onuň adamzat siwilizasiýasynyň ösmegine ägirt uly goşant goşandygyna, Merkezi we Günorta Aziýada, Ýakyn we Orta Gündogarda ençeme döwletleri gurandygyna we üstünlikli ösdürendigine şaýatlyk edýän gaýtalanmajak gymmatlyklaryň öwrenilýändigi we dikeldilýändigi barada aýtdylar.

2025-nji ýylyň 18-nji maýynda Tbilisiniň teleýaýlym diňi Türkmenistanyň Döwlet baýdagynyň reňkleri bilen yşyklandyryldy. Şol güni türkmen halky Türkmenistanyň Konstitusiýasynyň we Döwlet baýdagynyň gününi baýram edýär. Dostlukly çäre hem-de Gruziýa tarapyndan Türkmenistanyň halkara giňişliginde öňe sürýän parahatçylyk döredijilik başlangyçlarynyň işjeň goldanylmagy doganlyk türkmen halkyna bildirilýän çuňňur hormatyň we däp bolan türkmen-gruzin gatnaşyklarynyň ýokary derejesiniň nyşanydyr.

2025-nji ýylyň 19-njy maýynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Birleşen Arap Emirlikleriniň wise-prezidenti, Premýer-ministriniň orunbasary, Prezidentiň iş dolandyryş ministri Şeýh Mansur bin Zaýed Al Nahaýýanyň arasynda telefon arkaly söhbetdeşlik geçirildi. Türkmenistanyň Halk Maslahatynyň Başlygy hem-de wise-prezident Şeýh Mansur bin Zaýed Al Nahaýýan mähirli salamlaşyp, dost-doganlyga esaslanýan hem-de yzygiderli ösdürilýän türkmen-emirlikler gatnaşyklarynyň ýokary derejesine kanagatlanma bildirdiler. Türkmen halkynyň Milli Lideri söhbetdeşligiň başynda Prezident Serdar Berdimuhamedowyň mähirli salamyny beýan etdi hem-de pursatdan peýdalanyp, Birleşen Arap Emirlikleriniň Prezidenti Şeýh Mohammed bin Zaýed Al Nahaýýana, wise-prezidenti, Premýer-ministri, Dubaýyň häkimi Şeýh Mohammed bin Raşid Al Maktuma mähirli salamyny ýetirmegini haýyş etdi. Şeýh Mansur bin Zaýed Al Nahaýýan, öz gezeginde, Türkmenistanyň Halk Maslahatynyň Başlygynyň iki dostlukly ýurduň arasyndaky hyzmatdaşlygy ösdürmekdäki şahsy goşandyny belledi hem-de BAE-niň Prezidenti Şeýh Mohammed bin Zaýed Al Nahaýýanyň, wise-prezidenti, Premýer-ministri, Dubaýyň häkimi Şeýh Mohammed bin Raşid Al Maktumyň Türkmenistanyň Halk Maslahatynyň Başlygyna we Prezident Serdar Berdimuhamedowa salamyny ýetirdi. Şeýle-de wise-prezident mümkinçilikden peýdalanyp, döwlet Baştutanymyza iň gowy arzuwlaryny beýan etdi. Söhbetdeşligiň dowamynda bellenilişi ýaly, Türkmenistan bilen BAE-niň arasyndaky ikitaraplaýyn gatnaşyklar hemişe özara hormat goýmak we birek-birege goldaw bermek ýörelgelerine esaslanýar. Türkmenistanyň Halk Maslahatynyň Başlygy iki ýurduň arasyndaky söwda-ykdysady hyzmatdaşlygy ösdürmek üçin uly mümkinçilikleriň bardygyny, söwda dolanyşygynyň görkezijileriniň ýylsaýyn artmagynyň munuň aýdyň mysalydygyny belledi. Köp ýyllaryň dowamynda BAE-niň öňdebaryjy kompaniýalary bilen netijeli hyzmatdaşlyk etmegiň oňyn tejribesi toplandy diýip, türkmen halkynyň Milli Lideri aýtdy hem-de ýakynda iki sany ykdysady ähmiýetli resminama — «Türkmennebit» döwlet konserni bilen Malaýziýanyň «PETRONAS Çarigali (Türkmenistan) Sdn Bhd» kompaniýasynyň hem-de BAE-niň «ADNOC Türkmenistan RSC Limited» kompaniýasynyň arasynda Şertnama, şeýle-de «Türkmengaz» döwlet konserni bilen Malaýziýanyň «PETRONAS Çarigali (Türkmenistan) Sdn Bhd» kompaniýasynyň we BAE-niň «ADNOC Türkmenistan RSC Limited» kompaniýasynyň arasynda Şertnama gol çekilendigine ünsi çekip, munuň özara bähbitli türkmen-emirlikler hyzmatdaşlygyny has-da pugtalandyrjakdygyna berk ynam bildirdi. Telefon arkaly söhbetdeşligiň dowamynda iki dostlukly ýurduň halklarynyň bähbidine gönükdirilen we geljekde durmuşa geçirilmegi meýilleşdirilýän bilelikdäki birnäçe taslamalar ara alnyp maslahatlaşyldy. Wise-prezident Şeýh Mansur bin Zaýed Al Nahaýýan gazanylan bu möhüm ylalaşyklaryň iki doganlyk ýurduň arasynda beýleki ugurlar bilen bir hatarda, ýangyç-energetika pudagynda okgunly ösdürilýän hyzmatdaşlygyň aýdyň beýanydygyny belledi we Türkmenistanyň Halk Maslahatynyň Başlygyna hem-de Prezident Serdar Berdimuhamedowa ýene-de bir gezek tüýs ýürekden hoşallygyny beýan etdi. Söhbetdeşligiň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow we Birleşen Arap Emirlikleriniň wise-prezidenti, Premýer-ministriniň orunbasary, Prezidentiň iş dolandyryş ministri Şeýh Mansur bin Zaýed Al Nahaýýan birek-birege berk jan saglyk, döwlet işlerinde üstünlikleri, iki dostlukly ýurduň doganlyk halklaryna bolsa parahatçylyk, abadançylyk, rowaçlyk arzuw etdiler.

2025-nji ýylyň 18-19-njy maýynda Tähran şäherinde Eýran Yslam Respublikasynyň Daşary işler ministrliginiň ýanyndaky Syýasy we halkara barlaglar merkeziniň guramagynda Tähran dialog forumy – 2025 (Tehran Dialogue Forum) geçirildi. Forumyň işine Türkmenistanyň Ministrler Kabinetiniň Başlygynyň Orunbasary, Daşary işler ministri Raşid Meredow hem gatnaşdy.  “Hindi yklym böleginden Ýewraziýa çenli: ulag geçelgeleri, geoykdysadyýet we açylýan mümkinçilikler” atly ugurdaş bölümçede çykyş etmek bilen, R.Meredow sebitleriň durnukly ykdysady ösüşinde we özara baglanyşygynda möhüm şert hökmünde ulag-logistika arabaglanyşygyny ösdürmek babatyndaky Türkmenistanyň garaýyşyny beýan etdi. Yklym geçelgeleriniň durmuşa geçirilmeginiň halkara hyzmatdaşlygynyň esasgoýujy bölegine öwrülmelidigi nygtaldy. Şu nukdaýnazardan, Türkmenistanyň Ýewraziýa giňişliginde utgaşdyryjy meýdançany döretmäge gönükdirilen “Beýik Ýüpek ýoluny dikeltmek” başlangyjyna aýratyn üns berildi. Türkmenistanyň daşary syýasat edarasynyň ýolbaşçysy ýurdumyzyň ulag diplomatiýasy babatyndaky ileri tutýan ugurlaryny beýan etdi, şol sanda milli infrastruktura taslamalarynyň durmuşa geçirilmegi, demir we awtoulag ýollarynyň gurluşygy, Hazar deňzinde port infrastrukturasynyň döwrebaplaşdyrylmagy we sebit üstaşyr başlangyçlaryna gatnaşmagy ýaly ugurlar barada giňişleýin gürrüň berdi. Türkmenistanyň, Gazagystanyň, Özbegistanyň we Eýranyň arasyndaky ulag-logistika gatnaşyklaryny ösdürmegiň möhümdigi aýratyn bellenildi. Şeýle hem R.Meredow DÖM-lere ýetmekde durnukly ulagyň ähmiýetine, 2016-njy ýylda Aşgabatda BMG-niň durnukly ulag boýunça birinji ählumumy maslahatynyň geçirilmegi we Türkmenistanyň başlangyjy bilen BMG-niň Baş Assambleýasy tarapyndan birnäçe mowzuklaýyn kararnamalaryň kabul edilmegi ýaly işleri nazara almak bilen, Türkmenistanyň ählumumy ulag hyzmatdaşlygynyň ösdürilmegine goşýan goşandyna gatnaşyjylaryň ünsüni çekdi. Şol bir wagtyň özünde Türkmenistanyň daşary ykdysady strategiýasynyň energetika ugrunyň ähmiýeti barada bellenildi. Şu nukdaýnazardan, ýurdumyzyň energiýa serişdelerini ugratmagyň ugurlaryny diwersifikasiýalaşdyrmak boýunça edýän tagallalary, şol sanda TOPH gaz geçirijisiniň taslamasy hem-de Günbatar Aziýa sebitine elektrik energiýasynyň eksportyny giňeltmek barada aýdyldy. *** Tähran dialog forumynyň çäklerinde R.Meredow bu çärä gatnaşyjy ýurtlaryň wekilleri bilen ikitaraplaýyn duşuşyklary geçirdi, olaryň barşynda döwletara gatnaşyklaryny mundan beýläk-de ösdürmegiň meseleleri ara alnyp maslahatlaşyldy.

2025-nji ýylyň 17-nji maýynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine geldi. Türkmen halkynyň Milli Lideri bu ýerde bolmagynyň çäklerinde Aziýa ösüş bankynyň Türkmenistandaky hemişelik wekilhanasynyň direktory Artur Andrisýak bilen duşuşdy. Aziýanyň ösüş bankynyň Türkmenistandaky hemişelik wekilhanasynyň ýolbaşçysy wagt tapyp kabul edendigi üçin Türkmenistanyň Halk Maslahatynyň Başlygyna tüýs ýürekden hoşallyk bildirip, Aziýanyň ösüş bankynyň Türkmenistan bilen netijeli hyzmatdaşlygy giňeltmegi maksat edinýändigini tassyklady. Türkmen halkynyň Milli Lideri abraýly halkara maliýe düzüminiň ýolbaşçysyny mähirli mübärekläp, Aziýanyň ösüş banky Türkmenistanyň uzak wagtdan bäri ygtybarly hyzmatdaşy hökmünde halkara maliýe institutlary bilen gatnaşyklary ösdürmekde aýratyn orun eýeleýändigini aýtdy. Aziýanyň ösüş bankynyň Dolandyryjylar geňeşi tarapyndan kabul edilen hem-de Türkmenistanyň Hökümetiniň makullan 2024-2028-nji ýyllarda Türkmenistan üçin ýurt hyzmatdaşlyk strategiýasy bellärliklidir. Bu bolsa ikitaraplaýyn hyzmatdaşlygy ösdürmegiň esas goýujy resminamasy bolup durýar diýip, Türkmenistanyň Halk Maslahatynyň Başlygy sözüni dowam etdi. Türkmen halkynyň Milli Lideri Türkmenistanyň Hökümetiniň bu strategiýanyň iş ýüzünde durmuşa geçirilmegi üçin Aziýanyň ösüş banky bilen ýakyndan hyzmatdaşlyk etmäge taýýardygyny tassyklady. Mundan başga-da, Aziýa ösüş bankynyň Türkmenistanyň dürli pudaklaryna umumy möçberi 12 million amerikan dollaryna barabar tehniki kömek berýändigini belläp, Türkmenistanyň Halk Maslahatynyň Başlygy özara gatnaşyklary ösdürmek üçin täze mümkinçilikleriň açylýandygyna ünsi çekdi. Şunuň bilen baglylykda, Aziýa ösüş banky bilen hyzmatdaşlygyň täze ugurlaryny ösdürmegi göz öňünde tutýarys diýip, türkmen halkynyň Milli Lideri belledi. Aziýanyň ösüş bankynyň Türkmenistandaky hemişelik wekilhanasynyň ýolbaşçysy sazlaşykly ösüş ýoluna düşen we kuwwatly ykdysadyýeti bolan Türkmenistanda, aýratyn-da, “akylly” şäher konsepsiýasy esasynda bina edilen Arkadag şäherinde durmuşa geçirilýän maýa goýum taslamalaryna gatnaşmagyň özleri üçin belent mertebedigini nygtady. Şeýle hem A.Andrisýak Türkmenistanyň başlangyjy bilen “Halkara parahatçylyk we ynanyşmak ýyly” diýlip yglan edilen şu ýylda ähli ugurlar boýunça uly ösüşler gazanýan hem-de halkara giňişliginde ygtybarly hyzmatdaş hökmünde ykrar edilen Türkmenistan bilen AÖB-niň arasynda ýola goýlan hyzmatdaşlyga 25 ýyl dolýandygyny aýratyn buýsanç bilen nygtady. Türkmen halkynyň Milli Lideri şu gün gol çekiljek resminamanyň energiýa tygşytlaýjy akylly tehnologiýalary ornaşdyrmak üçin gaýtadan dikeldilýän energiýa çeşmeleri ulgamynda netijeli hyzmatdaşlygy ýola goýmaga giň mümkinçilikleri açjakdygyna ynam bildirdi. Şeýle hem Türkmenistanyň Halk Maslahatynyň Başlygy hyzmatdaşlygyň umumy maksatlara ýetmekde ähmiýetlidigini belläp, bilelikdäki başlangyçlary we taslamalary durmuşa geçirmekde hemmetaraplaýyn ýardam beriljekdigine ünsi çekdi we abraýly halkara maliýe düzüminiň ýolbaşçylaryna hem-de işgärlerine üstünlikleri arzuw etdi. Şunuň bilen baglylykda, türkmen halkynyň Milli Lideri saglygy goraýyş edaralarynyň işiniň kämilleşdirilmegine möhüm ähmiýet berýändigini nazara alyp, bu ýerde lukmançylyk edaralarynyň şepagat uýalary üçin okuw merkezini açmak baradaky teklip öňe sürüldi. Munuň özi Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti O.Atabaýewanyň alyp barýan işiniň üstünlikli dowam edýändiginiň netijesidir. Türkmen halkynyň Milli Lideri ikitaraplaýyn gatnaşyklaryň derejesine ýokary baha berip, ýola goýulýan hyzmatdaşlygyň netijesinde, ýol-ulag düzümine degişli taslamalaryň durmuşa geçirilýändigini, şeýlelikde, ýurdumyzyň ykdysady taýdan kuwwatlanýandygyny, täze iş orunlarynyň döredilýändigini belledi. Duşuşygyň ahyrynda Türkmenistanyň Halk Maslahatynyň Başlygy we AÖB-niň Türkmenistandaky hemişelik wekilhanasynyň ýolbaşçysy ikitaraplaýyn hyzmatdaşlygyň geljekde hem üstünlikli ösdüriljekdigine, geljegi uly ýokary tehnologiýaly taslamalar amala aşyrylyp, olaryň ýurdumyzyň sazlaşykly ösüşine ýardam etjekdigine ynam bildirdiler. Soňra bu ýerde türkmen halkynyň Milli Lideriniň gatnaşmagynda Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komiteti bilen Aziýanyň ösüş bankynyň arasynda Özara düşünişmek hakyndaky Ähtnama gol çekildi. Iki tarapyň wekiliýetleriniň gatnaşmagynda gol çekilen resminama häzirki zaman öňdebaryjy tehnologiýalaryň we sanly çözgütleriň ornaşdyrylan “akylly” we “ýaşyl” şäher konsepsiýasyna laýyk derejede bina edilen Arkadag şäherinde energetika, suw üpjünçiligi we şäher gürluşygy pudaklaryny ösdürmäge, bu babatda zerur bolan tehnologiýalary ornaşdyrmaga, suwy we energiýany tygşytlamaga, dikeldilýän energiýa çeşmelerini ösdürmäge we suwy gaýtadan ulanmaga, agzalan ugurlarda täze taslamalary işläp düzmekde we durmuşa geçirmekde öňdebaryjy tejribe alyşmak babatda hyzmatdaşlyk etmäge gönükdirilendir. Resminama gol çekmek dabarasy tamamlanandan soň, Aziýanyň ösüş bankynyň Türkmenistandaky hemişelik wekilhanasynyň ýolbaşçysy çykyş edip, Türkmenistan bilen hyzmatdaşlygyň çäklerinde durmuşa geçirilýän maýa goýum taslamalarynyň ilerlemeginde Prezident Serdar Berdimuhamedowyň, Türkmenistanyň Halk Maslahatynyň Başlygynyň aýratyn tagallalarynyň bardygyny nygtady. Şeýle hem ol sazlaşykly ösüş ýoluna düşen Türkmenistan bilen ýola goýlan hyzmatdaşlygyň 25 ýyllygy mynasybetli dabarany guramak baradaky teklibini öňe sürdi. Türkmen halkynyň Milli Lideri aýdylan teklibi oňlady we şu günki gol çekilen resminamanyň beýik maksatlaryň amala aşmagyna ýardam berjekdigine ynam bildirip, hemmelere alyp barýan işlerinde üstünlik arzuw etdi we bu ýerden ugrady.

2025-nji ýylyň 16-njy maýynda Alaniýa şäherinde Türkmenistanyň Türkiýe Respublikasyndaky Ilçihanasynyň hem-de Alaniýa uniwersitetiniň bilelikde guramagynda Halkara parahatçylyk we ynanyşmak ýyly hem-de Türkmenistanyň hemişelik Bitaraplygynyň 30 ýyllygy mynasybetli ylmy maslahat geçirildi. Çärä Alaniýa şäher häkimliginiň başlygy Fatih Ýürkmezer, Alaniýa uniwersitetiniň rektory Aýkut Ekenji, şeýle hem Türkiýe Respublikasynyň jemgyýetçilik-syýasy edaralarynyň, ylmy we döredijilik bileleşikleriniň, KHBS-iň wekilleri we talyp ýaşlar gatnaşdylar. Çykyş edenler Türkmenistanyň başlangyjy esasynda BMG-niň Baş Assambleýasynyň kabul edilen “Halkara parahatçylyk we ynanyşmak ýyly, 2025” atly kararnamasynyň, türkmen halkynyň Milli Lideri, Türkmenistanyň Halk Maslahatynyň Başlygy tarapyndan yglan edilen “Dialog – parahatçylygyň kepili” atly halkara gatnaşyklarynyň filosofiýasynyň iş ýüzündäki beýanyna öwrülendigini bellediler. Maslahata gatnaşyjylara türkmen Bitaraplygynyň şanly senesine bagyşlanan mowzuklaýyn wideoşekiller görkezildi. Maslahatyň ahyrynda Türkmenistanyň Türkiýe Respublikasyndaky Ilçihanasy tarapyndan Alaniýa uniwersitetiniň kitaphanasyna Türkmenistanyň Prezidentiniň hem-de türkmen halkynyň Milli Lideri, Türkmenistanyň Halk Maslahatynyň Başlygynyň türk dilinde neşir edilen kitaplarynyň nusgalary sowgat berildi. Mundan başga-da, möhüm wakalar mynasybetli surat sergisi guraldy we onda Türkmenistanyň Prezidentiniň hem-de türkmen halkynyň Milli Lideriniň, Türkmenistanyň Halk Maslahatynyň Başlygynyň ilatyň ýaşaýyş-durmuş derejesini ýokarlandyrmaga, adamlaryň zähmet çekmegi we dynç almagy üçin ähli şertleri döretmäge gönükdirilen şähergurluşyk syýasatynyň üstünliklerini we onuň oýlanyşyklydygyny şöhlelendirýän surat panoramasy görkezildi. Alaniýada geçirilen çäreleriň çäklerinde Türkmenistanyň Türkiýedäki Ilçisi M.Işangulyýew şäher häkimliginiň başlygy Fatih Ýürkmezer we Alaniýa uniwersitetiniň rektory Aýkut Ekenji bilen duşuşyklary geçirildi.

2025-nji ýylyň 16-njy maýynda Russiýa Federasiýasynyň Tatarystan Respublikasyna iş saparynyň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Russiýa Federasiýasynyň Prezidenti Wladimir Putiniň arasynda telefon arkaly söhbetdeşlik geçirildi. Türkmen halkynyň Milli Lideri we dostlukly ýurduň Baştutany birek-biregi mähirli mübärekläp, iki ýurduň arasynda yzygiderli ösdürilýän hyzmatdaşlygyň häzirki ýagdaýyna ýokary baha berdiler. Prezident Wladimir Putin “Russiýa – Yslam dünýäsi: KazanForum 2025” XVI halkara ykdysady forumynyň möhüm ähmiýetini belläp, bu ýokary derejeli duşuşyga gatnaşandygy üçin Türkmen halkynyň Milli Liderine tüýs ýürekden hoşallyk bildirdi. Şeýle-de ol pursatdan peýdalanyp, Türkmenistanyň Prezidenti Serdar Berdimuhamedowa mähirli salamyny, iň gowy arzuwlaryny beýan etdi. Türkmenistanyň Halk Maslahatynyň Başlygy Gurbanguly Berdimuhamedow Prezident Wladimir Putini Beýik Watançylyk urşunda gazanylan Ýeňşiň 80 ýyllygy bilen gutlap, Kazanda geçirilýän foruma gatnaşmaga çakylygy üçin minnetdarlygyny bildirdi hem-de Türkmenistanyň Prezidentiniň iň gowy arzuwlaryny ýetirdi. Söhbetdeşler Türkmenistan bilen Russiýa Federasiýasynyň arasynda dostluk, ynanyşmak, özara düşünişmek ýörelgelerine esaslanýan gatnaşyklaryň dürli ugurlar boýunça okgunly ösdürilýändigini kanagatlanma bilen belläp, döwletara dialogy mundan beýläk-de dowam etdirmegiň möhümdigini nygtadylar. Nygtalyşy ýaly, ikitaraplaýyn syýasy-diplomatik gatnaşyklar hem işjeň ilerledilýär. Ýurtlarymyz sebit we halkara guramalaryň çäklerinde netijeli hyzmatdaşlyk edýärler. Şunuň bilen baglylykda, söhbetdeşler türkmen-rus gatnaşyklarynyň iki ýurduň halklarynyň bähbidine yzygiderli pugtalandyryljakdygyna ynam bildirdiler. Söhbetdeşligiň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem-de Russiýa Federasiýasynyň Prezidenti Wladimir Putin birek-birege berk jan saglyk, rowaçlyk, alyp barýan jogapkärli döwlet işlerinde üstünlikleri, Türkmenistanyň hem-de Russiýa Federasiýasynyň dostlukly halklaryna bolsa abadançylyk we gülläp ösüş arzuw etdiler.

Foruma gatnaşmagynyň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Russiýa Federasiýasynyň Tatarystan Respublikasynyň Baştutany Rustam Minnihanow bilen duşuşdy. R.Minnihanow Milli Liderimizi ýene-de bir gezek tüýs ýürekden mübärekläp, belent mertebeli myhmana “Russiýa — Yslam dünýäsi: KazanForum 2025” XVI halkara ykdysady forumyna gatnaşmak üçin Kazana gelmek baradaky çakylygy kabul edendigi, şeýle hem netijeli hyzmatdaşlygy pugtalandyrmak boýunça beýan eden başlangyçlary üçin hoşallyk bildirdi. Tatarystanyň Baştutany Türkmenistan bilen Tatarystan Respublikasynyň arasyndaky hyzmatdaşlygyň ähli ugurlar boýunça okgunly ösdürilýändigini aýdyp, netijeli ikitaraplaýyn gatnaşyklary pugtalandyrmakda Gahryman Arkadagymyzyň uly goşandyny aýratyn belledi. Mümkinçilikden peýdalanyp, R.Minnihanow hormatly Prezidentimiz Serdar Berdimuhamedowa mähirli salamyny we iň gowy arzuwlaryny beýan etdi. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow mähirli kabul edilendigi we ýurdumyzyň wekiliýetine bildirilen myhmansöýerlik üçin minnetdarlyk bildirip, Tatarystanyň Baştutany bilen Kazanda duşuşýandygyna örän şatdygyny belledi hem-de oňa hormatly Prezidentimiziň mähirli salamyny ýetirdi. Gahryman Arkadagymyz “Russiýa — Yslam dünýäsi: KazanForum 2025” XVI halkara ykdysady forumyna gatnaşmaga çakylygy üçin hoşallygyny bildirip, meýilleşdirilen ähli çäreleriň üstünlikli geçmegini arzuw etdi. Gahryman Arkadagymyz Türkmenistanyň wekiliýetiniň şu saparynyň we dürli meýdançalarda geçiriljek duşuşyklaryň türkmen-rus strategik hyzmatdaşlygynyň möhüm bölegi bolup durýan ikitaraplaýyn gatnaşyklary giňeltmäge saldamly goşant boljakdygyna ynam bildirdi. Duşuşygyň dowamynda türkmen-tatar hyzmatdaşlygynyň häzirki ýagdaýy we geljegi ara alnyp maslahatlaşyldy. Şunuň bilen baglylykda, halklarymyzyň arasyndaky doganlyk gatnaşyklaryň däp-dessurlaryň, dilleriň meňzeşligine, medeniýetleriň umumylygyna, özara hormat goýmaga, deňhukuklylyga esaslanýandygy nygtaldy. Ýokary derejede yzygiderli geçirilýän duşuşyklar netijeli ikitaraplaýyn hyzmatdaşlygyň möhüm şertleriniň biri bolup durýar. Şunuň bilen baglylykda, Russiýa Federasiýasynyň Tatarystan Respublikasynyň Baştutanynyň şu ýyl Türkmenistana amala aşyran saparynyň ähmiýetine üns çekildi. Saparyň barşynda onuň hormatly Prezidentimiz Serdar Berdimuhamedow hem-de Gahryman Arkadagymyz bilen duşuşyklary boldy. Şunda duşuşyklaryň çäklerinde gazanylan ylalaşyklaryň türkmen-tatar gatnaşyklaryna täze itergi berjekdigine ynam bildirildi. Şeýle-de Türkmenistanyň we Tatarystanyň söwda-ykdysady ulgamda, şol sanda nebitgaz pudagynda, gämi gurluşygynda, awiasiýa, awtomobil ýük daşaýjy tehnikalaryň iberilmeginde netijeli hyzmatdaşlyk edýändigi kanagatlanma bilen bellenildi. Medeni-ynsanperwer ulgamdaky gatnaşyklar hem okgunly ösdürilýär. Duşuşygyň ahyrynda Türkmenistanyň Halk Maslahatynyň Başlygy Gurbanguly Berdimuhamedow we Tatarystanyň Baştutany Rustam Minnihanow köpugurly türkmen-tatar gatnaşyklarynyň Türkmenistan bilen Russiýa Federasiýasynyň arasyndaky strategik hyzmatdaşlygyň çäklerinde mundan beýläk-de pugtalandyryljakdygyna ynam bildirip, birek-birege berk jan saglyk, işlerinde üstünlikleri, doganlyk halklarymyza bolsa abadançylyk, rowaçlyk arzuw etdiler.

Bahar paslynyň ajaýyp gözelligi

Fotoreportaj: Futbol boýunça Türkmenistanyñ çempionaty 12-nji tapgyr Altyn Asyr - Merw

Fotoreportaj: Futbol boýunça Türkmenistanyñ çempionaty Merw 1-1 Altyn Asyr

Fotoreportaž: Mary welaýaty: Çagalary goramagyň halkara güni mynasybetli geçirilen dabaralardan pursatlar

Fotoreportaž: Mary welaýatynda Bütindünýä welosiped güni bellenilip geçildi.

Fotoreportaž: Mary welaýaty: Türkmenistanyň ÝUNESKO agzalygyna kabul edilmeginiň 30 ýyllygyna bagyşlanan dabaralardan pursatlar.

Fotoreportaj: DÇ-2026 saýlama tapgyry Türkmenistan 0-1 Eýran yslam respublikasy

Fotoreportaj: Mary şäheriniň Çagalar çeperçilik mekdebiniň okuwçylarynyň işleri