Berkarar döwletimiň täze eýýamynyň galkynyşy döwründe Hormatly Prezidentimiziň amala aşyrýan giň möçberli maksatnamalary netijesinde ýurdumyzda ähli amatlyklary bolan ýaşaýyş jaýlarynyň giden toplumy gurlup, bagtyýar raýatlarymyz döwrebap ýaşaýyş jaýlary bilen yzygiderli üpjün edilýär. Tamamlanyp barýan “Halkara parahatçylyk we ynanyşmak” ýylynda hem- de ýetip gelýän Täze ýyl baýramçylygynyň bosagasynda Mary welaýatynyň Mary şäheriniň Baýramhan köçesiniň ugrunda on alty sany, dört gatly alty ýüz kyrk öýli ýaşaýyş jaý toplumynyň dabaraly ýagdaýda açylyp ulanmaga berilmegi hem welaýatyň ähli ilatynyň baýramçylyk şatlygyny artdyryp , buýsançly başlaryny hasam belende göterdi .
Hormatly Prezidentimiziň parasatly ýolbaşçylygynda amala aşyrylýan belent maksatly işler halkymyzyň ýaşaýyş - durmuş derejesiniň ýokarlanmagyna gönükdirilýär.Täze taryhy eýýamda şähergurluşyk maksatnamasynyň üstünlikli durmuşa geçirilmegi netijesinde Mary şäheriniň gözel künjeginde täze gurulan belent ýaşaýyş jaý toplumynyň emele gelmegi hem munuň aýdyň subutnamasydyr.Döwrebap ýaşaýyş jaý toplumy şäher keşbini düýpli özgertmek bilen şäher gözelligine özboluşly bezeg berdi.Her bir maşgala ojagyna rysgal-bereket,şatlyk paýlap ýetip gelýän Täze ýyl baýramçylygy mynasybetli Mary welaýatynyň Baýramhan köçesiniň ugrunda on alty sany, dört gatly alty ýüz kyrk öýli ýaşaýyş jaý toplumynyň açylyş dabarasy ajaýyp döwrümiziň kalplary joşa getirýän toý şatlyklaryna beslendi. Häzirki zaman talaplaryna laýyk gelýän bu ýaşaýyş jaý toplumyny Mary şäher häkimliginiň we paýçylaryň buýrmasyna laýyklykda”Erkin gurluşyk”hususy kärhanasynyň gurluşykçylary ýokary hil derejesinde bina etdiler.Açylyş dabarasynyň başlangyjy täze gurylan ýaşaýyş jaý toplumynyň girelgesinden başlandy.Bu ýere ýygnanan welaýatyň bagtyýar ýaşaýjylary,ýaşuly nesliň wekilleri we mährem eneler toý ýörişi bilen täze döwrebap ýaşaýyş jaýlaryny synlap,toplumyň merkezinde bina edilen çagalar bagynyň öňündäki meýdança geldiler.Dabara meýdançasynda olary döwrümiziň saýrak dilli körpeleri we çagalary özleriniň baýramçylyk çykyşlary bilen garşyladylar.Bagtly döwrüň bagtyýar nesilleriniň Hormatly Prezidendimiziň çagalar barada edýän aladalaryny,bagtyýar çagalygy wasp edýän we ýüreklerinden joşup çykýan şadyýan tanslary hem aýdymlary toý mähellesiniň şatlygyny has-da artdyryp,göwünleri joşdurdy.Welaýatyň skripkaçylar toparynyň ussatlyk bilen ýerine ýetiren hoş owazly mukamlary hem olara ruhy lezzet paýlady. Çeperçilik mekdeplerinde bilim alýan suratkeşleriň ajaýyp zamanamyzyň waspyny ýetirýän surat eserleri bolsa myhmanlarda uly täsir galdyrdy.Bu ýerde guralan muzeý gymmatlyklarynyň,haly we haly önümleriniň,heýkeltaraşlyk sungatynyň we milli şaý - seplerimiziň sergileri hem halkymyzyň milli we medeni mirasymyza uly sarpa goýulýandygyny aýdyňlygy bilen görkezdi.Birleşen dutarçylar toparynyň belent perdelerde çalan sazlary we ýerine ýetiren aýdymlary toý şowhuny bilen sazlaşyp, uzaklara ýaň saldy. Eli çeper gelin – gyzlaryň ümä üýşüp, ene mamalarymyzdan miras galan el hünärlerini we tikin işlerini ussatlyk bilen ýerine ýetirýän görnüşleri bu dabara aýratyn öwüşgin çaýdy. Türkmen Halkynyň Milli Lideri Gahryman Arkadagymyzyň beýik başlangyçlaryny üstünlikli dowam etdirýän Hormatly Prezidentimiz Arkadagly Gahryman Serdarymyzyň halkymyzyň hal - ýagdaýyny gowulandyrmak, ilatymyzy ýaşaýyş jaýlary bilen üpjün etmek barada amala aşyrýan döwlet ähmiýetli işlerine begenip buýsanýan bagtyýar raýatlar soňra täze ýaşaýyş jaý toplumynyň açylyş dabarasyna gatnaşdylar. Welaýatyň bagtyýar ýaşaýjylarynyň, Türkmenistanyň mejlisiniň deputatlarynyň, welaýat Halk maslahatynyň agzalarynyň, jemgyýetçilik guramalarynyň , edara kärhanalaryň , bilim, saglygy goraýyş, medeniýet ulgamlarynyň işgärleriniň , täze ýaşaýyş jaýlaryň eýeleriniň, gurluşykçylaryň , ýaşuly nesliň wekilleriniň , mährem eneleriň we bagtyýar ýaşlaryň gatnaşmagynda geçirlen bu dabara ýokary ruhubelentlige beslendi. Dabaranyň geçýän ýerinde guralan medeni çäre giň gerimde ýaýbaňlandy. Welaýatyň medeniýet we sungat işgärleri, estrada aýdymçylary , birleşen tans toparlary bu dabarany özleriniň täsirli çykyşlary bilen bezediler.Kalplary joşa getirýän aýdym- sazlarda Gahryman Arkadagymyzyň we Arkadagly Gahryman Serdarymyzyň il ýurt bähbitli dünýä nusgalyk işleri , ösüşleriň batly gadamlary bilen öňe barýan eziz diýarymyz , ýetip gelýän täze ýyl baýramy joşgunly wasp edildi . Açylyş dabarasynda çykyş eden adamlar täze jaýyň eýeleri bolan bagtyýar raýatlary gutlamak bilen olara täze ýyl arzuwlaryny aýtdylar. Halkymyzy döwrebap ýaşaýyş jaýlary bilen üpjün etmekde alyp barýan işleri üçin Gahryman Arkadagymyza hem –de Hormatly Prezidentimiz Arkadagly Gahryman Serdarymyza alkyş sözlerini beýan etdiler. Dabarada täze ýaşaýyş jaýyny almak bagtyna eýe bolan bagtyýar raýatlara täze jaýlaryň açarlary dabaraly ýagdaýda gowşuryldy. Paýly gurluşyk esasynda bina edilen jaý toplumynyň gurluşygyna gatnaşan gurluşykçylara Hormatly Prezidentimiziň adyndan gymmat bahaly sowgatlaryň gowşurylmagy dabaranyň şatlykly pursatlarynyň biri boldy . Soňra ähli amatlyklary bolan ýaşaýyş jaý toplumynyň açylyş dabarasy türkmen halkymyzyň täze öwüşginli milli toý däp –dessurlary bilen utgaşdy. Täze ýaşaýyş jaýyna täze ýyl baýramynyň bosagasynda göçüp gelen döwletli maşgalanyň bagtyýar ojagynda tutulan durmuş toýunyň dabarasy uzaklara ýaň saldy. Öňüni bedew atlara atlanan merdana ýigitleriň çekmegi bilen toý gelnalyjysynyň täze jaýyň öňüne gelmegi dabaranyň şatlygyny hasam artdyrdy. Bu ýerde toý toýlaýan bagtyýar ýaşlar aýdym –sazlaryň hoş owazlarynyň astynda üzärlik tütetmek , süýji nogul seçmek , toý haladyny ýapmak ýaly asylly däp –dessurlary bilen garşylandy. Hatar gurlan üsti basdyrmaly tapçanlar, olaryň üstündäki naz-nygmatly saçaklar toý bezegine öwrülip, toý pişmeleri bişirilip, gazanlarda milli tagamlar taýýarlanyp, myhmanlara dürli milli tagamlar hödür kerem edildi. Täze ýaşaýyş jaýlaryndan paýly bolan bagtyýar raýatlar bu günki şatlykly günde jaý toýlaryny hem uludan tutdylar. Toý dabaralarynyň çar ýany welaýatyň sport ulgamynyň türgenleriniň gatnaşmaklarynda sportyň köp sanly görnüşleri boýunça geçirlen ýaryşlar we sport görkezme çykyşlary bilen bezeldi . Tutumy uludan tutulan toýlara göwünleri galkynan ýaşuly nesliň wekilleri , mährem eneler we bagtyýar raýatlar soňra medeni, durmuş we söwda maksatly binalary bolan ýaşaýyş jaý toplumynda döredilen şertler bilen tanyşdylar hem-de bagtyýar raýatlaryň jaý toýlarynyň hormatly myhmanlary boldular. Hormatly Prezidentimiziň türkmen telekeçilerine berýän hemaýat goldawlary netijesinde Mary şäheriniň Baýramhan köçesiniň ugrunda gurlan täze ýaşaýyş jaý toplumynda ýaşaýjylar üçin ähli amatly şertler döredilipdir. Jaýlaryň hersi iki ,üç, dört we bäş otaglardan ybarat bolup, olaryň birnäçesiniň aşaky gatlarynda durmuş hyzmatlary we söwda nokatlary bar. Arassa hem owadan bezelen myhman otaglary, çagalara niýetlenen otaglar, dynç alynýan otaglar häzirki döwrüň ösen sanly ulgamly enjamlary bilen üpjün edilip, olar özboluşly aýratynlygy bilen tapawutlanýar. Otaglarda bar bolan dürli görnüşli mebelleriň türkmen telekeçileriniň hünärli gollarynyň önümleri bolmagy bolsa has hem guwandyrýar. Şeýle-de dürli tagamlary taýýarlamak üçin ähli şertleri bolan aşhana bar. Ýaşaýyş jaýynyň daş - töwereginiň abadanlaşdyrylmagy, çagalar üçin ýörite oýun meýdançalarynyň bolmagy binalaryň keşbini has-da gözelleşdirýär. Täze jaýlaryň gaz, suw, elektrik, lagym, ulgamlary bilen üpjün edilmegi Hormatly Prezidentimiziň bagtyýar raýatlarymyzyň eşretli durmuşda ýaşamagy üçin edýän ýadawsyz aladalarynyň aýdyň nyşanydyr. Gurluşyk taslamasyna laýyklykda ýaşaýyş jaýlarynyň köçelerine asfalt düşelmegi olaryň gyralarynda bag nahallarynyň oturdylmagy, yşyklar bilen üpjün edilmegi ýaşaýyş jaý toplumynyň görküne has hem gözellik çaýýar. Berkarar döwletiň täze eýýamynyň galkynyşy döwründe ýurdumyzy durmuş – ykdysady taýdan ösdürmegiň Milli maksatnamasynyň üstünlikli durmuşa geçirilmegi netijesinde bagtyýar raýatlarymyzyň ýaşaýyş – durmuş derejeleri ýokarlanyp, olar döwrebap ýaşaýyş jaýlary bilen yzygiderli üpjün edilýär. Täze jaýlaryň otaglaryna aýlanyp gören adamlar her otagyň özboluşly bezeglerini synlamak bilen şeýle döwrebap jaýlary gurdurup berýän, halkymyzyň eşretli durmuşda ýaşamaklary üçin uly aladalar edýän Türkmen halkynyň Milli Lideri Gahryman Arkadagymyza, Hormatly Prezidentimiz Arkadagly Gahryman Serdarymyza tüýs ýürekden çykýan alkyş sözlerini aýtdylar. Döwrebap ýaşaýyş jaý toplumynyň açylyş dabarasyna gatnaşan adamlar soňra toý sadakasyna gatnaşdylar.Bu ýerde okalan toý töwirlerinde ýurdumyzyň abadançylygy, il agzybirligi arzuw edilip, ýurdumyzy ösüşleriň aýdyň maksatly ýollary bilen öňe alyp barýan Türkmen Halkynyň Milli Lideri Gahryman Arkadagymyzyň hem-de Hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak, il –ýurt, umumyadamzat bähbitli işleriniň rowaç bolmagy arzuw edildi.
Çarymuhammet Saparow.
