Halkara parahatçylyk we ynanyşmak ýylynda ýurdumyz boýunça giňden bellenilen Hasyl toýunyň baýramçylyk dabaralary Mary welaýatynda-da göwünleri joşa getirýän toý şatlyklaryna beslendi. Mary welaýat häkimliginiň, welaýat medeniýet müdirliginiň, Türkmenistanyň zenanlar birleşiginiň Mary welaýat bölüminiň, welaýatyň jemgyýetçilik guramalarynyň bilelikde gurnamagynda geçirilen belent tutumly toý çäresi welaýatyň gözel künjeginde ýerleşýän halkymyzyň milli ruhuna ýugrulan ,,Türkmeniň ak öýi” binasynyň çar ýanyny gurşap aldy. Bu baýramçylyk güninde welaýatyň ýaşuly nesliniň wekilleri bilen birlikde oba hojalyk işgärleri, hasyl ussatlary, pagtaçy-kärendeçileri, gallaçylary, ussat ekerançylary oba hojalyk pudagyna dahylly edara-kärhanalaryň işgärleri dabaranyň geçirilýän ýerine toý ýörişi bilen geldiler. Hasyl toýunyň dabarasynda çykyş eden adamlar welaýatyň ähli oba zähmetkeşlerini baýramçylyk mynasybetli mähirli gutlap, olara gelejekde hem yhlasly zähmet çekip Hormatly Prezidentimiziň ýurdumyzyň oba-hojalyk pudagyny ösdürmekde alyp barýan işlerine özleriniň mynasyp goşantlaryny goşmaklaryny arzuw etdiler. Hasyl toýunyň dabarasynda döwlete bugdaý, pagta we beýleki oba hojalyk önümlerini tabşyrmakda belent sepgitleri eýeleýän kärendeçileriň birnäçesine Hormatly Prezidentimiziň adyndan baýramçylyk sowgatlary hem gowşuryldy. ,,Türkmeniň ak öýi” binasynyň öňünde giň gerimde ýaýbaňlanan toý çäresi soňra welaýatyň medeniýet we sungat işgärleriniň, estrada aýdymçylarynyň birleşen tans toparlarynyň Hasyl toýuny belent heňlerde wasp edýän çykyşlary bilen dowam etdi. Bu ýerde welaýatyň Kemine adyndaky döwlet drama teatrynyň medeniýet işgärleri bilen bilelikde ýerine ýetiren edebi-sazly çykyşlary toý çäresine hasam bezeg berdi. Berkarar döwletiň täze eýýamynyň Galkynyşy döwrüne mahsus ýerine ýetirilen çykyşlarda Arkadagly Gahryman Serdarymyzyň oba hojalyk pudagyny ösdürmekde alyp barýan il-ýurt bähbitli, döwlet ähmiýetli işlerini, oba hojalyk işgärleriniň gazanýan üstünlikleri, eşretli zamanamyzy hem-de Hasyl toýy wasp edildi. Aýdym-sazlaryň, döwrebap tanslaryň uzaklara ýaň salan şirin owazlary toý çäresine gatnaşýan mähelläniň göwünlerini joşdurdy. Hemişelik Bitaraplygymyzyň şanly 30 ýyllyk baýramçylygyna uly ruhubelentlik bilen barylýan günlerde geçirilen bu hasyl toýunyň dabarasyna gatnaşýan welaýatyň ýaşuly nesliniň wekilleri, mährem eneler, oba hojalyk pudagynyň öňdebaryjylary kalplary joşa getirýän toý çykyşlaryndan ruhy lezzet aldylar. Döwrebap binanyň toý sahnasynda pagtanyň we bugdaýyň döredilen ajaýyp şekilleri bolsa baýramçylyk çäresine özboluşly gözellik çaýdy.
Baýramçylyk dabarasynyň daş-töwereginde welaýatyň azyk we dokma senagaty kärhanalarynda, hususy kärhanalarynda ýokary tehnologiýalar arkaly öndürilen döwrebap harytlaryň we oba hojalyk önümleriniň şeýle-de gök we bakja önümleriniň dürli görnüşleriniň sergilerine-de uly orun berildi. Sergide görkezilen ýokary hilli harytlar we oba hojalyk önümleri ýurdumyzyň bu pudaklarynda uly ösüşleriň gazanylýandygyny aýdyňlygy bilen subut etdi. Bu sergide oba hojalyk ekinlerini ösdürip ýetişdirmekde ulanylýan dökünler hem-de amaly haşam sungatyna, el hünärine, senetçilige degişli milli gymmatlyklarymyz hem görkezildi. Tebigy ot-çöplerden taýýarlanylýan melhemlik çaýlaryň sergisi-de örän täsirli boldy. Soňra Hasyl toýunyň belent tutumly dabaralary ,,Türkmeniň ak öýi” binasynyň ýanaşyk ýerinde dowam etdi. Arkadagly Gahryman Serdarymyzyň ähli halkymyza we oba hojalyk işgärlerine iberen mähirli gutlagyndan ruhlanan welaýatyň bagtyýar raýatlary bu toý çäresine hem ýokary ruhubelentlik bilen gatnaşdylar. Bu ýerde türkmen obasynyň ajaýyp keşbi emele getirilip, ak öýler dikilip, olaryň öňünde halkymyzyň milli toý däp-dessurlaryny giňden beýan edýän çykyşlar görkezildi. Welaýatyň etrapdyr şäherlerinden gelen medeniýet işgärleriniň, folklor we döredijilik toparlarynyň, bagşy- sazandalarynyň, ussat tansçylaryň çykyşlary toý dabarasynyň şatlygyny has hem artdyrdy. Bu ýerdäki çykyşlarda halk döredijiligi boýunça läleler kakylyp, hüwdüler ýerine ýetirildi. Toýlaryň şatlyk-şowhuny toý mähellesiniň Berkarar döwletiň täze eýýamynyň Galkynyşy döwrüne bolan buýsançlaryny belende göterdi. Baýramçylyk mynasybetli guralan çykyşlar medeniýet we sungat işgärleriniň Hormatly Prezidentimiziň milli medeniýetimizi we sungatymyzy ösdürmekde alyp barýan işlerine bolan alkyş sözleri bolup ýaňlandy. Bu ýerde bagtyýar körpeleriň toý şatlyklaryna goşulyp, aýterek-günterek oýnaýan, läle kakýan we gopuz çalýan pursatlary şeýle hem ertekilerdäki gahrymanlaryň keşplerine girip oýnan oýunlary has-da ýakymly pursatlaryň biri boldy. Hatar gurulan toý gazanlarynda, palow, dograma we çekdirme ýaly birnäçe tagamlar bişirilip, toý mähellesine hödür edilmegi halkymyzyň myhmansöýerlik, myhmana hezzet-hormat etmek ýaly ajaýyp däpleriniň häzirki ajaýyp döwrümizde hem giňden dowam etdirilýändigini äşgär etdi. Gelinleriň tamdyrda çörek ýapyp, hamyr ýugrup, pişmedir beýleki milli tagamlary taýýarlamagy, bereketli türkmen topragynyň bol hasylyndan gyşlyk azyklaryň taýýarlanmagy baýramçylyk dabarasyna aýratyn bezeg berdi. Welaýatyň ussat türgenleriniň, sport ulgamynyň işgärleriniň tanap çekip, ýaglyga towusmak, göreş tutmak ýaly sportuň köp sanly görnüşleri boýunça geçirilen ýaryşlary özboluşly aýratynlyklary bilen tapawutlandy. Hasyl toýunyň giň gerimde ýaýbaňlanan çäresine gatnaşan welaýatyň bagtyýar raýatlary we oba hojalyk işgärleri oba hojalyk pudagynda amala aşyrylýan belent maksatly özgertmeleri üçin Türkmen halkynyň milli Lideri Türkmenistanyň Halk maslahatynyň başlygy Gahryman Arkadagymyza, Hormatly Prezidentimiz Arkadagly Gahryman Serdarymyza alkyş sözlerini beýan etdiler.
Merjen Çaryýarowa, Göwher Ataýewa.
