Hormatly Prezidentimiziň taýsyz tagallalary bilen türkmen topragynyň tebigatyny goramakda, daşky gurşawyň ýagdaýyny sagdynlaşdyrmakda giň möçberli işlere badalga berilýär. Bu ulgamyň kanunçylyk-hukuk binýady kämilleşdirilip, bu babatda öňde durýan meseleleriň oňyn çözgütlerine giň ýol açyldy. Hakykatdanam, gözel tebigatymyz öýümiz bolany üçin onuň baý we gaýtalanmajak haýwanat hem-de ösümlik dünýäsini aýawly saklamaga çalyşmalydyrys.  Bu wezipe juda derwaýys bolany üçin Arkadagly Gahryman Serdarymyz şu meseläni hemişe üns merkezinde saklaýar. Onsoňam, tebigatymyzy aýawly saklamakda her birimiziň saldamly goşandymyz bolmalydyr. Sebäbi, gözel ülkämiziň haýwanat we ösümlik dünýäsiniň köpdürlüligini saklap, ony geljekki nesillere ýetirmek şu günki nesliň derwaýys wezipesidir.  Güneşli Diýarymyzyň gözel tebigatyny goramak, onuň haýwanat we ösümlik dünýäsini, köpdürlüligini aýawly saklamak bilen tutumly işlere, bu ulgamyň kanunçylyk-hukuk binýadynyň döwrebaplaşdyrylmagyna uly üns berilýär. Bu babatda ençeme kanunlar hereket edip, tebigaty goramagyň, tebigy baýlyklarymyzdan rejeli peýdalanmagyň kanunçylygyny kesgitleýär. Bu bolsa bagy-bossanly geljegimiziň wajyp meselesiniň bähbitli çözgüdine ýardam edýär. Tebigatymyza söýgini, oňa örän aýawly çemeleşmegi terbiýelemek hem wajyp wezipe bolmagynda galýar. Şol bir wagtda ýurdumyzy bagy-bossanlyga öwürmek bilen bagly döwletimiz boýunça geçirilýän çäreleriňem ähmiýeti uludyr. Tebigaty goramak her birimiziň jana-jan borjumyz bolany üçin bu işden hiç birimiz çetde galmaly däldiris.  Maýsa KURBANOWA.  

Her bir güni beýik ösüşlere beslenýän gözel Diýarymyzda hormatly Prezidentimiziň taýsyz tagallalary netijesinde sagdyn durmuş ýörelgeleri giň gerime eýe bolýar, bedenterbiýe, sport bilen meşgullanýanlaryň sany gün geçdigiçe artýar. “Garaşsyz, baky Bitarap Türkmenistan — bedew batly at-myradyň mekany” diýen şygar astynda geçirilýän sport çäreleridir ýaryşlary halkymyzyň buýsanjyna buýsanç, guwanjyna guwanç goşýar. Arkadagly Gahryman Serdarymyzyň taýsyz tagallalary netijesinde köpçülikleýin bedenterbiýe hereketini hem-de ýokary netijeli sporty ösdürmek, sagdyn durmuş ýörelgesini kemala getirmek boýunça çäreler milli taglyma öwrüldi. Sport — bu ynsan durmuşynyň bezegidir. Gahryman Arkadagymyzyň belleýşi ýaly, sport bilen yzygiderli türgenleşmek adamy diňe bir beden taýdan taplaman, eýsem, onda erkinlik, zähmetsöýerlik, maksadaokgunlylyk duýgusyny ýokarlandyrýar. Her bir raýatyň sagdyn, berk bedenli, ruhubelent bolmagy üçin Gahryman Arkadagymyz, Arkadagly Gahryman Serdarymyz sport ulgamyny ösdürmekde uly işleri alyp barýarlar. Ýurdumyzyň ähli ýerinde döwrebap sport desgalary köpçülikleýin gurlup, ulanylmaga berilýär. Dünýäniň ösen tehnologiýalary bilen üpjün edilen sport desgalary häzirki döwürde ulynyň-kiçiniň gelim-gidimli ýerine öwrüldi. Şäherdir obalaryň keşbini bezäp oturan sport binalary hemmeleriň kalbyna ruhy baýlyk paýlaýar.  Sporty, bedenterbiýäni söýmegiň belent nusgasyny görkezýän, ýurdumyzda sporty ösdürmäge giň ýol açýan Milli Liderimize, hormatly Prezidentimize tükeniksiz alkyş aýdýarys. Sülgün AKMYRADOWA.  

  Hormatly Prezidentimiziň alyp barýan sport syýasaty ýurdumyzda sagdynlygyň we ruhubelentligiň ýörelgesiniň rowaçlanmagyna ýol açýar. Halkymyzyň saglygyny goramakda we berkitmekde bedenterbiýäni we sporty ösdürmegiň bähbitli netijesine uly ähmiýet berilýär. Şu maksat bilen Garaşsyz döwletimizde ilaty sporta köpçülikleýin çekmekde uly tagallalar edilýär. Şeýle tagallalar özüniň oňyn netijesinem berýär.  Döwlet Baştutanymyzyň sport syýasatynyň gadamynyň batlanýandygyna türkmen türgenleriniň dünýä çempionatlarynda, halkara ýaryşlarynda gazanýan üstünliklerem şaýatlyk edýär. Ýurdumyzyň çar künjeginde gurlup, ulanylmaga berlen döwrebap stadionlarda, sport mekdeplerinde we sport desgalarynda döredilen giň mümkinçilikler türgenlerimiziň ýeňişli menzillerine oňyn täsirini ýetirýär. Garaşsyz döwletimiziň sporty ösdürmäge gönükdirilen halkara ähmiýetli başlangyçlaram bütin dünýäde uly goldawa eýe bolýar. Aýratynam, dünýä çempionatlarynda we halkara sport ýaryşlarynda ýeňiş gazanýan türgenlerimiziň üstünliklerine ýokary baha berilýär. Mälim bolşy ýaly, geçen ýylyň dekabrynda hormatly Prezidentimiziň Aşgabat şäherindäki Olimpiýa şäherçesiniň başa-baş söweş sungaty sport toplumynda dünýä derejesindäki sport ýaryşlarynda baýrakly orunlara mynasyp bolan türgenlere we tälimçilere gymmat bahaly sowgatlary dabaraly ýagdaýda gowşurmagy türkmen türgenlerini täze üstünliklere ruhlandyrdy.  Begenç MOŞALAKOW.

Bagryň ýanmak — nebsiň agyrmak, haýpyň gelmek, gynanmak. Bagryňy kebap etmek — biriniň ýa-da bir zadyň ugrunda jepa çekmek, azap görmek, ýanyp bişmek, horlanmak. Bagryň ezilmek — örän gynanmak, rehmiň gelmek, haýpyň gelmek. Bagta töwekgellik etmek — bagty synap görmek, bir işi etmäge synanyşmak. Bagtyňa boran (gar) ýagmak — şowsuzlyga sezewar bolmak, işiň şowsuz bolmak, işiň gaýtmak. Bagtyň daş ýarmak — bagtyň getirmek, işiň şowuna bolmak, edeniň oňuna bolmak.  Bazar gurmak — 1. Köp bolup üýşmek, ýygnanyşmak. 2. Jedel, dawa döretmek, gykylyk turuzmak. “Türkmen diliniň frazeologik  sözlügi” kitabyndan.

 Awstraliýa “Çägelik yklym” hem diýilýär. Onuň tutýan meýdanynyň 60 göterimi, ýagny, 4 million inedördül kilometri çägelikdir. Bu ýerde Gibson, Uly Wiktoriýa, Simpson, Günorta Awstraliýa çöllükleri biri-birine sepleşip gidýär. “Çöl — bu ýylda ygalyň 100 millimetrden az düşýän, ota-çöpe garyp künjekdir” diýilýär. Garagum çölünde ýylda 130 — 200 millimetr möçberde ygal düşýär. Ol ösümlik dünýäsine baýdyr. Onda ösümlikleriň 1 müňden gowrak görnüşiniň bardygy ylmy taýdan subut edilen. Gadymy arap dilinde Sahara “çöllük sähra” diýmegi aňladýar. Onuň meýdany 11 million inedördül kilometre deňdir. Sahara çöli diýlende, oňa Liwiýa çöli, Arap çöli, Nubiý çöli degişlidir. Saharada 60 gradusa ýetýän epgekli jöwza bolýar. Sahara iň az ygal düşýän ýer bolup, onuň ýyllyk mukdary 20 millimetrden geçmeýär. Saharada ösümlikleriň 1200 görnüşi duş gelýär. Merkezi Sahara bolsa hakyt “Ýylan ýalan ýaly” diýilýäni. Alžiriň Uly Günbatar Erg hem-de Uly Gündogar Erg çöllüklerine fransuz alymy Anri Lot: “Gündogar Erg Ýer ýüzünde iň uly beýik çöllük, özem üznüksiz öwüsýän ýellerden ýaňa hemişe çäge üfläp duran ýowuz ýer” diýen bahany beripdir. Tar çöli Hind derýasynyň goşundylarynyň arasynda ýerleşip, 300 müň inedördül kilometre uzalyp gidýär. Eýranyň günorta-gündogaryndaky Lut çöli iki bölekden ybarat. Uly Lutuň ululygy uzynlygyna 650 kilometre, ini 150 kilometre ýetýär. Metbugat materiallary esasynda taýýarlan Sähet HOJAGELDIÝEW.  

Iňlisçe “Jentelmen” sözi “ýumşak adam” diýen manyny berýär. Ilkinji suwasty geçiriji Alžir we Italiýa döwletleriniň arasynda çekilipdir. Torgaý — uçup barýarka saýrap bilýän ýeke-täk guş. Ýuko Tabeý — Jomolungma depesine ilkinji bolup çykan zenan. Geçmişde Hytaý döwletinden başlanan Beýik Ýüpek ýoly birnäçe ösen şäherleri birleşdiripdir. Onuň iň soňky nokady Italiýanyň Rim şäheri bolupdyr. Daniýa döwletiniň paýtagty adada, özi bolsa ýarym adada ýerleşýär. Balhaş bir tarapy süýji suwly, beýleki tarapy duzly suwly köldür. Ilkinji hokkeý oýny 1875-nji ýylyň 3-nji martynda Kanadanyň Monreal şäherinde geçirilipdir. “Hokkeý” fransuz sözi bolup, “Çopan taýagy” diýen manyny berýär. Dünýäde reňkleri tersine ýerleşen ýeke-täk ýolyşyk ABŞ-nyň Nýu-Ýork ştatynyň Sirakýus şäherinde ýerleşýär. Ilkinji bolup telefony oýlap tapan Aleksandr Bell. Emma ol telefony özi oýlap tapsa-da, ýekeje gezek hem öz aýaly bilen telefonda gürleşmändir. Sebäbi, onuň aýaly ker bolupdyr. Toplan Hojaberdi ABDYÝEW.  

Ruhy çeşmäm, ýüregimiň damary, Eý, mähriban enem, jana-jan enem! Seň ýüzüňde mydam Güneşiň nury, Eý, mähriban enem, jana-jan enem! Seň kalbyňy giň asmana meňzetdim, Seň mähriňi giň ummana meňzetdim, Her sözüňi şirin jana meňzetdim, Eý, mähriban enem, jana-jan enem!      Gahrymanlary hem döredýänler siz, Mähribanlary hem döredýänler siz, Şeýle uly siziň ýürekleriňiz, Eý, mähriban enem, jana-jan enem! Enelere boýun bütin Ýer şary, Tümlügi ýagtyldar ýüzňüziň nury, Siz bilen barýarys biz öňe sary, Eý, mähriban enem, jana-jan enem! Ogulgerek GULLAÝEWA.  

Ody öçürip bilmeýän bolsaň, iň bolmanda, ony ölçerme!  Hiç aýdara zadyň bolmasa onda gowusy dymmakdyr.  Oňatlyga garaşsagam, ýaramazlyga taýýarlyk görýäris.  Baýlyk, zat, emläk wagtlaýyndyr.  Ösüş diňe siziň öz öýüňiziň ösüşinde däl-de, ol töweregiňdäkileriň ösüşindedir. Iň güýçli adamlar, köplenç, ýalňyz bolýarlar.  Her bir kynçylyk öz çözgüdi bilen gelýändir. Bile gitsek, bile-de öseris.  Toplan Hojageldi ATAÝEW. 

Berkarar döwletiň täze eýýamynyň Galkynyşy döwründe sagdyn iýmitlenmek saglygy berkitmegiň we keselleriň öňüni almagyň ygtybarly serişdesi bolup durýar. Hormatly Prezidentimiz Serdar Berdimuhamedowyň taýsyz tagallalary esasynda biziň geljegimiz bolan çagalaryň sagdyn ösmegi, olaryň fiziki we akyl taýdan kämil bolmagy we orta mekdeplerde ýokary hilli bilim almagy üçin birnäçe aladalar edilýär. Soňky ýyllarda çagalaryň we uly adamlaryň arasynda semizlik meselesi dünýä derejesinde uly alada döredýär. Munuň esasy sebäpleri nädogry iýmitlenmek, fiziki işjeňligiň azlygy, ýokary kaloriýaly iýmitleriň köp ulanylmagy hasaplanylýar. Şeýle ýagdaýlarda mekdepde berilýän sapaklaryň, esasan hem himiýa dersiniň gowy özleşdirilmegi aýratyn ähmiýete eýedir. Sebäbi, himiýa sapagynda diňe bir teoriýa, kesgitlemeler we formulalar öwredilmän, eýsem, iýmitlik maddalaryň düzümi we bedendäki aýlanyşygy hem öwredilýär. Himiýa dersinde okuwçylar beloklar, uglewodlar, ýaglar, witaminler we minerallar barada maglumat alýarlar. Bu maddalaryň hersiniň bedende ýerine ýetirýän aýratyn wezipesi bar. Mysal üçin, beloklar bedeniň ösüşi we dokumalaryň dikeldilmegi üçin zerur bolup, bedende gurluşyk materialy bolup hyzmat edýär. Şeýle-de, beloklar bedende bolup geçýän hadysalary işjeňleşdirýär, gormonal sazlaşygy saklaýar we kesellere garşy immuniteti ýokarlandyrýar. Adam günde 80 — 100 gram belogy harçlaýar. Şonuň üçin ol süýt önümlerini, ýumurtgany, balygy köpräk iýmeli bolýar.  Uglewodlar esasy energiýa çeşmesi hasaplanylýar, olaryň synalaryň ösmeginde we ýaralaryň bitmeginde ornunyň uludygyny aýtmak gerek. Ýöne olaryň artykmaç mukdary ýag görnüşinde toplanyp, semizlige sebäp bolup biler.  Witaminler iýmitimiziň iň gymmatly bölegidir. Olar synalaryň biologik işjeňligini artdyrmak bilen, esasy iýmit maddalarynyň kadaly, tygşytly, doly we dogry siňmegini üpjün edýär, süňkleriň ösmegine ýardam berýär, görüjiligi artdyrýar, bagryň, beden mäzleriniň işleýşini kadalaşdyrýar, süňkleri, dişleri, saçy berkidýär, derini tämizleýär.  Umuman, himiýa dersi diňe bir bilim bermek bilen çäklenmän, çagalaryň saglygyny goramakda hem ähmiýeti uludyr. Ol iýmitiň düzümini düşünmäge, zyýanly önümleri tanamaga we sagdyn ýaşaýyş ýörelgelerini ösdürmäge kömek edýär. Gözelnabat UMMADOWA.

Türkmen ili Berkarar döwletiň täze eýýamynyň Galkynyşy döwrüni ýeňişlere beslemek bilen hormatly Prezidentimiz Arkadagly Gahryman Serdarymyzyň başda durmagynda  has-da bagtyýar geljeginiň binýadyny berkden tutýar. Gahryman Arkadagymyzyň başyny başlan belent maksatlaryny Arkadagly Gahryman Serdarymyz üstünlikli dowam edýär. Döwletimiziň we jemgyýetimiziň durmuşynda amala aşyrylýan syýasy özgertmeler ykdysady ösüş-özgerişler bilen sazlaşykly utgaşdyrylýar. Şeýlelikde, Garaşsyz, baky Bitarap döwletimiz bedew bady bilen öňe barýar. “Garaşsyz, baky Bitarap Türkmenistan — bedew batly at-myradyň mekany” ýylynyň 15-nji iýulynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde Türkmenistanyň Halk Maslahatynyň Prezidiumynyň mejlisi geçirildi. Türkmen halkynyň Milli Lideri çykyşynda, ilki bilen, Watanymyzyň Garaşsyzlygynyň 35 ýyllygynyň baýramyna taýýarlyk görülýändigini belledi. Bu senäniň taryhy ähmiýetini, onuň il-günümizi belent maksatlara galkyndyrýandygyny nygtady. Şeýle hem mejlisde Milli Liderimiz baýramçylyk günleriniň öň ýanynda geçiriljek Türkmenistanyň Halk Maslahatynyň nobatdaky mejlisini ýokary derejede guramaçylykly geçirmek bilen bagly meseleleriň üstünde durup geçdi.  Gahryman Arkadagymyz ýurdumyzyň ösüşli menzilleri, bolup geçen syýasy wakalar barada aýdyp, şu ýylyň 23-nji sentýabrynda boljak Türkmenistanyň Halk Maslahatynyň nobatdaky mejlisi bilen bagly öňde durýan wajyp wezipeleri kesgitledi. Şeýle hem mejlisde degişli Kararlar kabul edildi. Şu wezipeleriň oňyn çözgüdi bolsa Türkmenistanyň Halk Maslahatynyň nobatdaky mejlisini ýokary derejede guramaçylykly geçirmäge mümkinçilik berer. Häzirki wagtda Türkmenistanyň Halk Maslahatynyň nobatdaky mejlisine taýýarlyk işleri welaýatymyzda-da giňden ýaýbaňlandyrylýar. Bu taryhy waka mynasybetli taýýarlyk işleri bilen bagly tagallalar işjeň häsiýete eýe bolýar. Toýlary toýlara ulaşýan türkmen ili uly toýuna barýar. Möhüm taryhy wakanyň yz ýany  toýy uludan tutuljak Beýik Garaşsyzlygymyzyň 35 ýyllygynyň baýramçylygy halkymyzy belent sepgitlere ruhlandyrýar. Şu şanly wakalara welaýatymyzyň telekeçileri hem ykjam taýýarlykly barýarlar. Täzegül JUMADURDYÝEWA.  

Türkmen halky üçin Garaşsyzlyk asyrlaryň dowamynda pederlerimiziň köňlünde beslän, taryhyň ak säheri bolup dörän mukaddes bir gymmatlykdyr. Bu mukaddeslik parahatçylygyň, asudalygyň we kämil döwletlilik ýörelgesiniň belent owazydyr. Çünki, onda milletiň taryhy ýoly, şu günki galkynyşy hem-de geljekki nesilleriň abadan durmuşy jemlenendir. Şanly 35 ýyllyk menziliň sepgidinde bu owaz has-da belentden ýaňlanyp, döwletlilik binýadymyzyň sarsmazlygyny bütin dünýä äşgär edýär. «Garaşsyz, baky Bitarap Türkmenistan — bedew batly at-myradyň mekany» diýlip yglan edilen 2026-njy ýylymyz hem beýik sepgitleriň hem-de belent maksatlara ýetmegiň aýdyň nyşanyna öwrüldi.  Welaýatymyzyň Ýolöten etrabynyň Ymambaba geňeşliginiň çäginde guruljak täze, döwrebap şäherçe geljekki nesilleriň abadan durmuşyna goýlan iň uly maýadyr. 800 gektardan gowrak meýdany tutjak bu döwrebap şäherçede 22 müň 500-den gowrak ilat üçin 4 müň 500 sany ýaşaýyş jaýy, mekdepler, çagalar baglary, saglyk merkezleri, medeniýet öýi we metjit ýaly durmuş maksatly desgalar toplumy gurlar. Ýurdumyzda ýaş nesliň döwrebap bilim goruna eýe bolmagy, ylym-bilim kuwwatynyň berkidilmegi döwlet syýasatynyň ileri tutulýan ugurlarynyň biridir. Geçen ýylda Türkmenistanyň Döwlet energetika institutynyň täze binasynyň açylmagy hem-de Halkara senagatçylar we telekeçiler uniwersitetiniň döredilmegi munuň aýdyň mysalydyr. Şonuň ýaly-da, şu ýylyň maý aýynda Türkmenbaşy şäherindäki «Balkan» gämi gurluşyk we abatlaýyş zawodynda täze gurlan «Gadamly» gury ýük gämisiniň suwa goýberilmegi halkara üstaşyr-ulag geçelgelerini ösdürmekde şanly waka öwrüldi. Mukaddes Garaşsyzlygymyzyň şanly 35 ýyllygynyň toýy Berkarar döwletiň täze eýýamynyň Galkynyşy döwründe täze taryhy sepgitlere tarap okgunly öňe gitmegimiziň kepilidir. Garaşsyzlyk mukamy biziň geçmişimiziň mirasy, şu günümiziň ruhy kuwwaty we geljegimiziň egsilmez owazydyr. Gahryman Arkadagymyzyň                                pähim-paýhasy hem-de Arkadagly                                                            Gahryman Serdarymyzyň durnukly ösüş ýoly biziň bagtyýarlygymyzyň hemişelik badalgasydyr. Maksat JANMYRADOW.  

  “Garaşsyz baky Bitarap Türkmenistan – Bedew batly at- myradyň mekany” ýylynda ýurdumyzyň her bir güni şanly senelere hem-de taryhy wakalara  beslenýär. Türkmenistanyň Halk maslahatynyň öňüsyrasynda geçirilýän şeýle duşuşyklar diňe bir baýramçylyk çäresi bolman, eýsem etraplardan gelip gowşan teklipleri, ilat ykdysady-durmuş ösişlerini we gelejekki meýilnamalary maslahatlaşmagyň möhüm tapgyrydyr .”Halk maslahatynyň öňindäki bu duşuşyk milli demokratiýanyň taryhy ýoly , jemgyýetiň agzybirligi we döwlet dolandyrşyndaky halk häkimiýetlilik ýörelgeleri giňden delillendirýär. Garaşsyzlygymyzyň 35 ýyllyk baýramyna hem-de Türkmenistanyň  Halk Maslahatynyň  nobatdaky mejlisine taýýarlyk mynasybetli Wekilbazar etrap häkimliginiň hem-de Türkmenistanyň zenanlar birleşiginiň Wekilbazar etrap zenanlar bölüminiň bilelikde guramagynda “Türkmenistanyň Halk Maslahaty- döwletligiň we jebisligiň nusgasy” ady bilen aýdym-sazly  duşuşyk geçirildi. Duşuşykda çykyş edenler Türkmenistan yň Halk Maslahatynyň döwlet dolandyryşyndaky hem-de halkynyň  bähbitlerini goramakdaky orny, ýurdumyzda alynylyp barylýan belent özgerdişler eri giňden wagyz etdiler. Çärede Garaşsyzlygymyzyň 35 ýyllyk ýylynda ýetilen sepgitler hem-de öňde duran möhüm wezipeler barada buýsançly sözler aýtdylar. Duşuşyga gatnaşyjylar ýurdumyzy durnukly ösüşler bilen öňe alyp barýan Türkmen halkynyň Milli Lideri Gahryman Arkadagymyza we Arkadagly Gahryman Serdarmyza özleriniň ýürekden çykýan hoşallyk sözlerini aýtdylar! Ülker Orazgeldiýewa.

         Mary welaýatynyň Mary şäheriniň “Türkmeniň ak öýi” binasynyň ýanyndaky köpçülikleýin dabaraly çäreleri geçirmäge niýetlenen binasynda ýurdumyzyň gallaçy babadaýhanlarynyň döwlete galla tabşyrmak baradaky borçnamalaryny üstünlikli ýerine ýetirmekleri hem-de Arkadag şäherinde gurulýan metjidiň “Arkadagyň ruhy” metjidi diýlip atlandyrylmagy mynasybetli toý sadakasy berildi. Döwrebap Arkadag şäherinde gurulýan uly metjidiň il sylagly ýaşulularyň teklibi bilen “Arkadagyň ruhy” metjidi – diýlip atlandyrylmagy hem-de ýurdumyzyň babadaýhanlarynyň döwlete galla tabşyrmak baradaky borçnamalaryny üstünlikli ýerine ýetirmekleri mynasybetli Mary welaýat häkimliginiň gurnamagynda Hormatly Prezidentimiziň adyndan berlen toý sadakasyna welaýatyň din wekilleri, mährem eneler, welaýatyň jemgyýetçilik guramalarynyň agzalary, edara – kärhanalaryň ýolbaşçylary, bilim, saglyk we medeniýet ulgamlarynyň işgärleri, welaýatyň bagtyýar ýaşaýjylary gatnaşdylar. Toý sadakasyna gatnaşanlar Arkadag şäherinde gurulýan täze metjidiň mynasyp atlandyrylmagyny goldamak bilen ol ýerde geljekde mukaddes dinimiz bolan yslam dininiň ybadatlaryny ýerine ýetirmek üçin ähli mümkinçilikleriň dörediljekdigini bellediler. Türkmen halkynyň Milli Lideri Gahryman Arkadagymyzyň dowamatly işlerini üstünlikli durmuşa geçirýän Hormatly Prezidentimiz Arkadagly Gahryman Serdarymyzyň tagallasy bilen ýurdumyzyň dürli künjeklerinde döwrebap metjitler gurlup, milli däp – dessurlarymyzy berjaý etmäge giň ýollar açylýar. Yslam dünýäsinde metjit, köpri we ýol gurmak sogap hem-de parz işleriň biri hasaplanýar. Gahryman Hajy Arkadagymyzyň we Arkadagly Gahryman Hajy Serdarymyzyň halkymyzyň bagtyýar durmuşy üçin edýän sogaply işleri il – günümiziň ýürek buýsanjyny hasam belende göterýär. Zähmetsöýer babadaýhanlaryň döwlete galla tabşyrmak baradaky borçnamalaryny üstünlikli ýerine ýetirmekleri, akylly şäher hasaplanylýan Arkadag şäherinde gurulýan metjidiň ýaşulularyň teklibi bilen “Arkadagyň ruhy” metjidi– diýlip atlandyrylmagy mynasybetli berlen toý sadakasynda tagam – duz dadylyp, aýat – töwir okaldy. Toý sadakasynyň dowamynda il agzybirligi, ýurt abadançylygy, Gahryman Hajy Arkadagymyzyň we Arkadagly Gahryman Hajy Serdarymyzyň janlarynyň sag, ömürleriniň uzak, umumyadamzat bähbitli işleriniň rowaç bolmagy dileg edildi. Bu ýerde welaýatyň bagşy-sazandalarynyň bu şatlykly waka mynasybetli aýdym-sazly çykyşlary giňden ýaýbaňlandy. Olaryň döwlet Berkararlygyny, ýurt asudalygyny, Watanymyzda gazanylýan beýik ösüşlerini taryplap ýerine ýetiren şirin mukamlary toý sadakasyna gatnaşanlaryň buýsançly başlaryny belende göterdi. Sadakaňyz hakyň keremli dergähinde kabul bolsun Gahryman Hajy Arkadagymyz hem-de Arkadagly Gahryman Hajy Serdarymyz! Çarymuhammet Saparow

 Mary welaýat häkimliginiň gurnamagynda “Garaşsyz, baky Bitarap Türkmenistan-bedew batly at-myradyň mekany” ýylynda Türkmenistanyň Garaşsyzlygynyň 35 ýyllyk baýramynyň ýokary derejede geçirilmegini gazanmak hem-de Türkmenistanyň Halk maslahatynyň nobatdaky mejlisini geçirmek babatda görülýän taýýarlyk işleriniň ähmiýetini wagyz – nesihat etmek bilen baglanyşykly maslahat geçirildi. Bu maslahat “Türkmenistanyň Halk Maslahaty – geňeşli iliň döwletli ýoly” – diýlip atlandyryldy. Döwletimiziň mukaddes Garaşsyzlygynyň 35 ýyllygyna hem-de halkymyzyň jemgyýetçilik durmuşynda uly syýasy taryhy waka öwrüljek Türkmenistanyň Halk maslahatynyň nobatdaky mejlisine ykjam taýýarlyk görmek bilen bagly geçirilen bu maslahata Türkmenistanyň Halk Maslahatynyň Diwanynyň iş dolandyryjysy, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanynda döredilen Ýaşulular geňeşiniň agzasy, welaýat häkimliginiň jogapkär işgärleri, etrap – şäher häkimlikleriniň orunbasarlary, Türkmenistanyň Mejlisiniň deputatlary, welaýat, etrap, şäher Halk maslahatynyň agzalary, jemgyýetçilik guramalarynyň hem-de ýaşuly nesliň wekilleri, mährem eneler, edara – kärhanalaryň, bilim, saglyk, medeniýet ulgamlarynyň ýolbaşçylary gatnaşdylar. Maslahatdaky çykyşlarda halkymyzyň bagtyýar we abadan durmuşyny üpjün etmekde, watanymyzyň şan – şöhratyny belende götermekde, il – günümiziň agzybirligini, abadançylygyny berkitmekde jemgyýetiň wekilçilikli iň ýokary edarasy bolan halk maslahatynyň orny örän uludyr – diýlip bellenildi. Täze taryhy döwürde halkymyz türkmen halkynyň milli Lideri Gahryman Arkadagymyzyň hem-de Hormatly Prezidentimiz Arkadagly Gahryman Serdarymyzyň daşyna mäkäm jebisleşmek bilen nurana geljege, ýagty ertirlere tarap batly gadamlar bilen öňe barýar. Döwletimiziň dünýäniň ösen döwletleriniň hatarynda orun alyp, halkymyzyň ýaşaýyş – durmuş derejeleri ýokarlanýar. Amala aşyrylýan giň möçberli ykdysady özgertmeler jemgyýetçilik durmuşynyň ähli taraplaryny gurşamak bilen Gahryman Arkadagymyzyň “Döwlet adam üçindir” hem-de Hormatly Prezidentimiziň “Watan halky bilen watandyr”, “Döwlet halky bilen döwletdir” diýen baş şygarlaryna esaslanyp, bagtyýar halkymyzyň eşretli durmuşda ýaşamagynyň bähbitlerine gönükdirilýär – diýlip, maslahatdaky çykyşlarda aýratyn nygtalyp geçildi. Döwletimizi uly ösüşlere, belent sepgitlere ýetirmekde Türkmenistanyň Halk Maslahatynyň möhüm orny bardyr. Türkmenistanyň Halk Maslahaty agzybirligiň we abadançylygyň kämil nusgasydyr. Halkymyz her bir işiň başyny tutanda il-güne geňeşip maslahat salýar. Ata – babalarymyzyň asyrlardan aşyp gelýän nusgalyk däplerinden ugur alnyp geçirilýän Türkmenistanyň Halk Maslahatynyň mejlisinde hem taryhy çözgütler we il – ýurt bähbitli kararlar kabul edilýär. Raýatlarymyzdan we jemgyýetçilik guramalaryndan gelip gowuşýan teklipleriň nazara alnyp, bähbitli çözgütleriň kabul edilmegi bolsa halkymyzyň erk – isleglerine doly laýyk gelýär. Munuň özi halkymyzyň zähmet çekmäge bolan höweslerini ýokarlandyryp, olaryň ata – Watanymyza bolan buýsançlaryny hasam belende göterýär – diýlip çykyşlarda aýdyldy. Ýurdumyzyň bagtyýar ilaty döwletimiziň Garaşsyzlygynyň 35 ýyllyk baýramyny mynasyp zähmet üstünlikleri bilen garşylamagy maksat edinip, ynamly gadamlar bilen şanly toýa barýar. Ýurdumyzyň zähmetsöýer babadaýhanlarynyň şu ýyl döwlete galla tabşyrmak baradaky borçnamalaryny üstünlikli ýerine ýetirmeklerem bu şanly toýa mynasyp toý sowgatlary boldy. Uly toý şatlyklaryna, dabaralara beslenjek günleriň öňüsyrasynda geçiriljek Türkmenistanyň Halk Maslahatynyň nobatdaky mejlisi hem halkymyzyň kalbynda ýatdan çykmajak taryhy wakalaryň biri bolup, ýurdumyzyň taryhyna altyn harplar bilen ýazylar. Bu maslahat halkymyzyň durmuşynda täze sahypalar açar. Halkymyz öz aýdyň geljegini, bagtyýar we eşretli durmuşynyň hözirini Gahryman Arkadagymyzyň hem-de Hormatly Prezidentimiz Arkadagly Gahryman Serdarymyzyň dünýä nusgalyk alyp barýan döwletli il – ýurt bähbitli işlerinde aýdyň görýär – diýip, çykyşlarda buýsanç sözler beýan edildi. Ýurdumyzyň Ministrler Kabinetiniň giňişleýin mejlisinde Hormatly Prezidentimiziň ýurt Garaşsyzlygymyzyň 35 ýyllyk şanly toýuny we Türkmenistanyň Halk Maslahatynyň nobatdaky mejlisini guramaçylykly geçirmek bilen bagly beren tabşyryklary, Gahryman Arkadagymyzyň Türkmenistanyň Halk Maslahatynyň Prezidiumynyň mejlisinde eden çuň manyly çykyşy we beren gymmatly maslahatlary halkymyzyň kalbynda ýokary ruhubelentlik duýgusyny döretdi. Munuň özi ýurdumyzy mundan beýläk-de gülledip ösdürmekde, belent sepgitlere ýetirmekde halkymyzyň ýaşaýyş – durmuş derejelerini ýokarlandyrmakda alnyp barylýan dünýä nusgalyk işleriniň aýdyň subutnamasydyr. Ýurdumyzy mundan beýläk-de okgunly ösdürmäge gönükdirilen maksatnamalaryň üstünlikli durmuşa geçirilmegi döwletimiziň mukaddes Garaşsyzlygynyň 35 ýyllyk toýunyň şan – şöhrata beslenýän ýylynda halkymyzyň ykdysady ösüşlere goşýan mynasyp goşantlarydyr - diýlip, dabaraly maslahatyň dowamyndaky çykyşlarda durlup geçildi. Maslahata gatnaşanlar Garaşsyz, baky Bitarap ýurdumyzy rowaçlyklaryň aýdyň ýollary bilen öňe alyp barýan Türkmenistanyň Halk Maslahatynyň Başlygy, türkmen halkynyň Milli Lideri Gahryman Arkadagymyza hem-de Hormatly Prezidentimiz Arkadagly Gahryman Serdarymyza alkyş sözlerini aýtdylar. Çarymuhammet Saparow.

      Mary welaýat häkimliginiň, Dünýä türkmenleriniň ynsanperwer birleşiginiň Mary welaýat bölüminiň we Türkmenistanyň Demokratik partiýasynyň welaýat komitetiniň, Kärdeşler Arkalaşyklarynyň welaýat birleşmesiniň bilelikde gurnamaklarynda dabaraly maslahat geçirildi. Döwletimiziň mukaddes Garaşsyzlygynyň 35 ýyllygy mynasybetli geçirilen bu dabara “Garaşsyz eýýamly türkmen döwletim Tugumyz asmanda baky parlasyn” – diýlip atlandyryldy. Bu maslahata dünýä türkmenleriniň ynsanperwer birleşiginiň şahsy agzalary, birleşigiň Mary welaýat bölüminiň köpçülikleýin agzalary, welaýatyň jemgyýetçilik guramalarynyň wekilleri gatnaşdylar. Maslahatdaky çykyşlarda Gahryman Arkadagymyzyň beýik başlangyçlaryny üstünlikli dowam etdirýän Hormatly Prezidentimiz Arkadagly Gahryman Serdarymyzyň halkymyzyň dost-doganlyk, hoşniýetli goňşuçylyk, ynsanperwerlik ýaly asylly ýörelgelerine eýerip alyp baran döwlet syýasatynyň barha rowaçlyklara beslenýändigini aýratyn nygtalyp geçildi. Ýurdumyz “Açyk gapylar” syýasatyndan ugur alyp daşary döwletlerde ýaşaýan türkmen doganlarymyza dost-doganlyk goluny uzadýar, olara yzygiderli ynsanperwer kömeklerini berýär. Häzirki döwürde dünýäniň çar künjegine ýaýran ildeşlerimiz ýurdumyzyň bedew bady bilen ösüşlerine, Watanymyzyň şan-şöhratyna çäksiz buýsanýarlar, Hormatly Prezidentimiziň daşary döwletlerde ýaşaýan watandaşlarymyz bilen ysnyşykly, dostlukly gatnaşyklary ýola goýmakda uly işleri amala aşyrýar. Mukaddes Garaşsyzlygymyzyň 35 ýyllygy mynasybetli dünýä türkmenleriniň ynsanperwer birleşigi hem birnäçe işleri durmuşa geçirýär. Bu şanly toýa görülýän taýýarlyk işleriniň dabaralary birleşigiň ähli agzalarynyň köňül kalbyny diýseň joşdurýar – diýlip, çykyşlarda buýsançly sözler beýan edildi. Dabaraly maslahatyň dowamy welaýatyň medeniýet  we sungat ussatlarynyň, estrada aýdymçylarynyň aýdym-sazly çykyşlary bilen utgaşdy. Ýerine ýetirlen çykyşlarda Hormatly Prezidentimiziň amala aşyrýan ynsanperwerlik syýasaty, dost-doganlyk gatnaşyklary, Berkarar döwletiň täze eýýamynyň Galkynyşy döwri joşgunly wasp edildi. Maslahata gatnaşanlar halkymyzy baky bagtyýarlygyň goýnunda ýaşadýan türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza alkyş we hoşallyk sözlerini aýtdylar Çarymuhammet Saparow.

“Garaşsyz, baky Bitarap Türkmenistan – bedew batly, at – myradyň mekany” ýylynda ýurdumyzda geçiriljek halk maslahatynyň ähmiýeti we nobatdaky Halk maslahatyny ýokary guramaçylykly geçirmekde öňde durýan wezipelere bagyşlanyp Mary welaýat häkimliginiň, Demokratik we Agrar partiýalarynyň welaýat komitetiniň, Kärdeşler Arkalaşyklarynyň welaýat birleşmesiniň, Ýaşlar guramasynyň welaýat geňeşiniň, welaýat Zenanlar bölüminiň bilelikde gurnamagynda “Türkmenistanyň Halk maslahaty- belent özgertmeleriň aýdyň binýady” ady bilen maslahat geçirilip, ol çuň many-mazmuna eýe boldy.  Mary welaýat kitaphanasynda geçirilen bu maslahata Türkmenistanyň Mejlisiň deputatlary, welaýat, etrap, şäher halk maslahatynyň agzalary, welaýatyň jemgyýetçilik guramalarynyň wekilleri hem-de bilim, saglyk, medeniýet we sport ulgamlarynyň işgärleri ruhubelentlik bilen gatnaşdylar. Maslahatyň dowamyndaky çykyşlarda  türkmen halkynyň milli lideri, türkmenistanyň halk maslahatynyň başlygy Gahryman Arkadagymyzyň geçiren Türkmenistanyň Halk Maslahatynyň prezidiumynyň mejlisinde eden taryhy çykyşy we şol mejlisde beren tabşyryklaryny durmuşa geçirmekde öňde durýan wezipeler dogrusynda täsirli gürrüňler edildi.   Şeýle hem bu ýerde ,,Garaşsyz, Baky Bitarap Türkmenistan – bedew batly at – myradyň mekany” ýylynda ýurdumyzda giňden toýlanjak mukaddes Garaşsyzlygymyzyň şanly 35 ýyllygyny zähmet ýeňişlerine beslemek bilen baglanyşykly işler barada-da aýratyn nygtaldy. Maslahatda çykyş edenler Hormatly Prezidentimiziň parasatly baştutanlygynda Berkarar döwletiň täze eýýamynyň Galkynyşy döwründe bedew bady bilen öňe barýan eziz Diýarymyzda gazanylýan beýik ösüşleriň ählisiniň halkymyzyň bolelin durmuşyny üpjün etmeklige gönükdirilendigini, Halk maslahatynyň nobatdaky mejlisinde hem il-ýurt bähbitli meselelere garaljaklygy dogrusynda-da buýsanç bilen bellediler. maslahata gatnaşanlar halkymyzy ösüşiň täze belentliklerine tarap ynamly öňe alyp barýan türkmen halkynyň Milli Lideri, türkmenistanyň halk maslahatynyň başlygy Gahryman Arkadagymyza hem-de Arkadagly Gahryman Serdarymyza alkyş hem hoşallyk sözlerini beýan etdiler. Dursun Ilbegiýewa.

      Türkmenistanyň Demokratik partiýasynyň Mary welaýat  komitetiniň hem-de Kärdeşler arkalaşyklarynyň Mary welaýat birleşmesiniň bilelikde gurnamaklarynda “Garaşsyz,baky Bitarap Türkmenistan-bedew batly at-myradyň mekany” ýylyna “Türkmenistanyň Halk Maslahaty – demokratiýanyň milli nusgasy” diýen at bilen  maslahat geçirildi. Bu maslahata Türkmenistanyň Mejlisiniň deputatlary, welaýat, şäher, halk maslahatynyň agzalary, Türkmenistanyň Demokratik partiýasynyň Mary welaýat  komitetiniň hem-de Türkmenistanyň  Kärdeşler arkalaşyklarynyň Mary welaýat birleşmesiniň işgärleri we işjeň agzalary gatnaşdylar. Çykyş edenler  Hormatly Prezidentimiz Arkadagly Gahryman Serdarymyzyň tagallasy bilen ýurdumyzda gazanylýan beýik ösüşler, milli mirasymyza goýulýan sarpa we erkana, asuda watanymyzda  alynyp barylýan üstünlikler  barada aýratyn durlup geçildi. Şeýle hem ýurt Garaşsyzlygynyň şanly 35 ýyllyk toýuna görülýän taýýarlyk işleri we bu baýramy zähmet üstünliklerine beslemek bilen bagly gürrüňler hem maslahatda edilen çykyşlaryň içinden eriş-argaç bolup geçdi. Şeýlede bu ýerde çykyş edenler Watanymyzyň ösmegine öz mynasyp goşantlary goşmaklaryny ündediler hem-de türkmen halkynyň Milli Lideri Gahryman Arkadagymyzyň, Hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak bolmagyny, tutýan tutumly işleriniň rowaçlyklara beslenmegini arzuw etdiler. Maýa Annameredowa.

        Mary welaýat kitaphanasynda Türkmenistanyň Magtymguly adyndaky Ýaşlar guramasynyň Mary welaýat geňeşiniň gurnamagynda “Garaşsyz, baky Bitarap Türkmenistan – bedew batly, at-myradyň mekany” ýylyna bagyşlanyp geçirilen maslahat hem çuň mazmuna beslendi. Bu maslahatyň dowamynda Hormatly Prezidentimiziň parasatly ýolbaşçylygynda asuda Watanymyzda gazanylan beýik ösüşler, ýetilen belent sepgitler, şeýle hem “Garaşsyz, baky Bitarap Türkmenistan – bedew batly, at-myradyň mekany” ýylynyň şatlykly wakalary dogrusynda buýsançly gürrüňler edildi.  Bu ýerde çykyş edenler halkymyzyň asyrlar boýy döredip sungat derejesine ýetiren milli gymmatlyklary we bedew atlarmyzyň dünýä ýaýran şan-şöhraty barada-da aýratyn durup geçdiler. Maslahata gatnaşanlar halkymyzy ösüşiň täze belentliklerine sary ynamly öňe alyp barýan türkmen halkynyň milli Lideri Gahryman Arkadagymyzyň we Arkadagly Gahryman Serdarymyzyň adyna alkyş hem hoşallyk sözlerini aýtdylar. Merjen Çaryýarowa

Bahar paslynyň ajaýyp gözelligi

Fotoreportaj: Futbol boýunça Türkmenistanyñ çempionaty 12-nji tapgyr Altyn Asyr - Merw

Fotoreportaj: Futbol boýunça Türkmenistanyñ çempionaty Merw 1-1 Altyn Asyr

Fotoreportaž: Mary welaýaty: Çagalary goramagyň halkara güni mynasybetli geçirilen dabaralardan pursatlar

Fotoreportaž: Mary welaýatynda Bütindünýä welosiped güni bellenilip geçildi.

Fotoreportaž: Mary welaýaty: Türkmenistanyň ÝUNESKO agzalygyna kabul edilmeginiň 30 ýyllygyna bagyşlanan dabaralardan pursatlar.

Fotoreportaj: DÇ-2026 saýlama tapgyry Türkmenistan 0-1 Eýran yslam respublikasy

Fotoreportaj: Mary şäheriniň Çagalar çeperçilik mekdebiniň okuwçylarynyň işleri